പാലക്കാട്: ബി.ജെ.പി ഭരിക്കുന്ന പാലക്കാട് നഗരസഭ ഭിന്നശേഷിക്കാർക്കായി ആരംഭിക്കുന്ന നൈപുണ്യ വികസന കേന്ദ്രത്തിന് ആർ.എസ്.എസ് സ്ഥാപകൻ ഡോ. കെ.ബി ഹെഡ്‌ഗേവാറിന്റെ പേര്. നഗരസഭയുടെ തീരുമാനത്തിൽ പ്രതിഷേധിച്ച് തറക്കല്ലിടൽ ചടങ്ങിലേക്ക് യൂത്ത് കോൺഗ്രസ്, ഡി.വൈ.എഫ്.ഐ പ്രവർത്തകർ നടത്തിയ മാർച്ചിൽ സംഘർഷം. 
യൂത്ത് കോൺഗ്രസ് പ്രവർത്തകർ തറക്കല്ല് മണ്ണിട്ടു മൂടി വാഴനട്ടു. ഡി.വൈ.എഫ്.ഐ പ്രവർത്തകർ ശിലാഫലകം തകർത്തു. വേദിയിലേക്കു മാർച്ച് നടത്തിയ കൗൺസിലർമാർ അടക്കമുള്ള കോൺഗ്രസ് നേതാക്കളെ പൊലിസ് ബലം പ്രയോഗിച്ച് അറസ്റ്റ് ചെയ്തു നീക്കി. ശിലാസ്ഥാപനം നടത്തിയ നഗരസഭാ അധ്യക്ഷ പ്രമീളാ ശശിധരൻ, ഉപാധ്യക്ഷൻ ഇ.കൃഷ്ണദാസ് എന്നിവർ വേദിയിലിരിക്കെയാണ് സംഘടനകൾ മാർച്ച് നടത്തിയത്. 

കൗൺസിലിൽ ചർച്ചയില്ലാതെ തീരുമാനം നടപ്പാക്കുന്നതിൽ പ്രതിഷേധിച്ച് കോൺഗ്രസ് പ്രവർത്തകരുടെ നഗരസഭ മാർച്ചും സംഘർഷത്തിൽ കലാശിച്ചു. ഹെഡ്ഗേവാറിന്റെ കോലം കത്തിക്കാനുള്ള ശ്രമവും പൊലിസ് തടഞ്ഞു.  
നഗരസഭയിലേക്ക് രാഹുൽ മാങ്കൂട്ടത്തിൽ എം.എൽ.എയുടെ നേതൃത്വത്തിൽ നടത്തിയ മാർച്ചും സംഘർഷത്തിൽ കലാശിച്ചു. പൊലിസ് കസ്റ്റഡിയിലെടുത്ത യൂത്ത് കോൺഗ്രസ് ജില്ലാ പ്രസിഡൻ്റിനെ വിട്ടുകിട്ടണമെന്ന നിലപാടുമായി രാഹുൽ മാങ്കൂട്ടത്തിൽ എം.എൽ.എ ജീപ്പിന് മുന്നിൽ തടസം നിന്നു. പ്രവർത്തകനെ വിട്ടുകിട്ടിയ ശേഷമാണ് എം.എൽ.എ പിന്മാറിയത്. 

സമരത്തിനിടെ ഒരു പൊലിസുകാരന് തലയ്ക്ക് പരുക്കേറ്റു. മാർച്ച് നടത്തിയ നാല് കോൺഗ്രസ് പ്രവർത്തകരെ സൗത്ത് പൊലിസ് കസ്റ്റഡിയിലെടുത്തു. ഒന്നേകാൽ കോടി രൂപ ചെലവിൽ സ്വകാര്യ സ്ഥാപനം സാമൂഹിക പ്രതിബദ്ധതാ ഫണ്ടിലുൾപ്പെടുത്തി നിർമിച്ചു നൽകുന്ന കേന്ദ്രത്തിന് ആർ.എസ്.എസിന്റെ സ്ഥാപകനും ആദ്യത്തെ സർസംഘചാലകനുമായിരുന്ന ഡോ. കേശവ ബലിറാം ഹെഡ്‌ഗേവാറിന്റെ പേര് നൽകുന്നതാണ് പ്രതിഷേധത്തിന് വഴിവച്ചത്.

Protest over RSS founders name on municipal building The foundation stone was covered with soil and planted with bananas