തിരുവനന്തപുരം: ആശാ വർക്കർമാർക്ക് പ്രതിദിനം 232 രൂപ മാത്രമാണ് ലഭിക്കുന്നതെന്ന പ്രചാരണം വസ്തുതാ വിരുദ്ധമാണെന്ന നാഷണൽ ഹെൽത്ത് മിഷന്റെ (എൻ.എച്ച്.എം) വിശദീകരണത്തിനെതിരെ ആശാ വർക്കർമാർ രംഗത്ത്. കൃത്യമായി ഡ്യൂട്ടി പൂർത്തിയാക്കുന്ന ആശമാർക്ക് പ്രതിദിനം 666 മുതൽ 866 രൂപ വരെ ലഭിക്കുമെന്നാണ് എൻ.എച്ച്.എം സി.പി.എം മുഖപത്രത്തിന് നൽകിയ വാർത്തയിൽ വ്യക്തമാക്കിയത്. എന്നാൽ, ഇത് സർക്കാരിന് വേണ്ടി നടത്തുന്ന നുണപ്രചാരണമാണെന്ന് കേരള ആശാ ഹെൽത്ത് വർക്കേഴ്സ് അസോസിയേഷൻ സംസ്ഥാന പ്രസിഡന്റ് വി.കെ. സദാനന്ദൻ ആരോപിച്ചു.

67 ദിവസം പിന്നിട്ട ആശാ സമരത്തിനിടെ എൻ.എച്ച്.എം വസ്തുതാവിരുദ്ധമായ കാര്യങ്ങൾ പ്രചരിപ്പിക്കുന്നത് സംശയാസ്പദമാണെന്ന് സദാനന്ദൻ ചൂണ്ടിക്കാട്ടി. 90 ശതമാനം ആശമാർക്കും 10,000 മുതൽ 13,000 രൂപ വരെ പ്രതിമാസ വേതനം ലഭിക്കുന്നുവെന്ന പ്രചാരണം തെറ്റാണെന്നും അദ്ദേഹം വ്യക്തമാക്കി. മുമ്പ് എൻ.എച്ച്.എം തന്നെ പറഞ്ഞതിന് വിരുദ്ധമായാണ് ഈ വാദമെന്നും അദ്ദേഹം കുറ്റപ്പെടുത്തി.

ആശമാരെ ദിവസം 18 മണിക്കൂർ വരെ ജോലി ചെയ്യിപ്പിച്ച എൻ.എച്ച്.എം, ഇപ്പോൾ മാസം 15 ദിവസം ജോലി മതിയെന്ന് പ്രസ്താവിച്ചത് ആരെ തൃപ്തിപ്പെടുത്താനാണെന്ന് സദാനന്ദൻ ചോദിച്ചു. ഭൂരിഭാഗം ആശമാരും ആഴ്ചയിൽ ആറ് ദിവസം ഫീൽഡ് പ്രവർത്തനങ്ങൾ നടത്തുന്നവരാണ്. ഒരു ദിവസം 14 മുതൽ 18 മണിക്കൂർ വരെ ജോലി ചെയ്യുന്നവർക്ക് ഈ ജോലിഭാരം മൂലം ആരോഗ്യപ്രശ്നങ്ങളും ഉണ്ടായിട്ടുണ്ട്. 15 ദിവസം കൊണ്ട് ഡ്യൂട്ടികൾ പൂർത്തിയാക്കാൻ സാധിക്കില്ലെന്നും അദ്ദേഹം വ്യക്തമാക്കി.

ആശാ സമരം ഒത്തുതീർപ്പാക്കണമെന്നാവശ്യപ്പെട്ട് ഹൈക്കോടതിയിൽ സമർപ്പിച്ച പൊതുതാൽപര്യ ഹർജിയിൽ, വേതനം പരിഷ്കരിക്കാൻ കമ്മിറ്റി രൂപീകരിച്ച് പ്രവർത്തനം ആരംഭിച്ചുവെന്ന് സർക്കാർ തെറ്റായ സത്യവാങ്മൂലം നൽകിയതായി കേരള ആശാ ഹെൽത്ത് വർക്കേഴ്സ് അസോസിയേഷൻ സംസ്ഥാന വൈസ് പ്രസിഡന്റ് എസ്. മിനി ആരോപിച്ചു. സമരത്തിന് നേതൃത്വം നൽകുന്ന സംഘടനയാണ് തങ്ങളുടേതെങ്കിലും, കമ്മിറ്റി രൂപീകരണത്തെക്കുറിച്ച് സർക്കാർ ഇതുവരെ അറിയിച്ചിട്ടില്ലെന്നും മിനി വ്യക്തമാക്കി.