തെല്‍ അവീവ്: ഗസ്സയില്‍ ഹമാസിന്റെ തടവിലുള്ള ബന്ദികളെ മോചിപ്പിക്കലല്ല നെതന്യാഹു സര്‍ക്കാര്‍ പ്രധാനമായും ലക്ഷ്യമിടുന്നതെന്ന് ഇസ്‌റാഈല്‍ ധനമന്ത്രി ബെസാലേല്‍ സ്‌മോട്രിച്ച്. ഗസ്സയില്‍ ഹമാസ് ഇനി ഉണ്ടാവില്ല എന്ന് ഉറപ്പു വരുത്തലാണ് യുദ്ധത്തിന്റെ ലക്ഷ്യമെന്നും  സ്‌മോട്രിച്ച്പറഞ്ഞു. 

റേഡിയോ ഗാലെ ഇസ്‌റാഈലിനോടാണ് മന്ത്രിയുടെ പ്രതികരണം. 'സത്യം പറയട്ടെ, ബന്ദികളെ തിരികെ കൊണ്ടുവരിക എന്നത് ഏറ്റവും പ്രധാനപ്പെട്ട കാര്യമല്ല'

'തീര്‍ച്ചയായും അത് വളരെ പ്രധാനപ്പെട്ട ഒരു ലക്ഷ്യമാണ്, പക്ഷേ മറ്റൊരു ഒക്ടോബര്‍ 7 ഉണ്ടാകാതിരിക്കാന്‍ ഹമാസിനെ നശിപ്പിക്കണമെങ്കില്‍, ഗാസയില്‍ ഹമാസ് തുടരുന്ന ഒരു സാഹചര്യം ഉണ്ടാകകരുതെന്ന് നിങ്ങള്‍ മനസ്സിലാക്കേണ്ടതുണ്ട്,' സ്‌മോട്രിച്ച് പറഞ്ഞു. 

ഹമാസിന്റെ തടവില്‍ ഇപ്പോഴും 59 ബന്ദികളുണ്ടെന്നാണ് റിപ്പോര്‍ട്ട്. ഇസ്‌റാഈല്‍ യുദ്ധം നിര്‍ത്തിയാല്‍ ബന്ദികളെ വിട്ടുനല്‍കാമെന്ന നിലപാടിലാണ് ഹമാസ്. അതേസമയം, യുദ്ധം അവസാനിപ്പിക്കാന്‍ ഉദ്ദേശമില്ലെന്നാണ് ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു ആവര്‍ത്തിച്ച് വ്യക്തമാക്കുന്നത്.

അതേസമയം, ഇസ്‌റാഈല്‍ ധനമന്ത്രിയുടെ പ്രസ്താവനക്കെതിരെ ബന്ദികളുടെ ബന്ധുക്കള്‍ രംഗത്തെത്തി. ധനമന്ത്രിയുടെ പ്രസ്താവനയെ നാണക്കേട് എന്നതിനപ്പുറം മറ്റൊരു വിശേഷണവും നല്‍കാനാവില്ലെന്ന് അവര്‍ ചൂണ്ടിക്കാട്ടി. ഈ സര്‍ക്കാര്‍ ബന്ദികളെ ഉപേക്ഷിക്കാന്‍ മനഃപൂര്‍വ്വം തീരുമാനിച്ചിരിക്കുന്നു എന്ന കയ്‌പേറിയ സത്യമെങ്കിലും മന്ത്രി പൊതുജനങ്ങള്‍ക്ക് മുന്നില്‍ വെളിപ്പെടുത്തുകയാണെന്ന് ബന്ദിക്കളുടെ ബന്ധുക്കളുടെ ഫോറം പ്രസ്താവനയില്‍ പറഞ്ഞു. 

എന്നാല്‍ ധനമന്ത്രിയുടെ പ്രസ്താവനയോട് നെതന്യാഹുവിന്റെ ഓഫിസ് ഇതുവരെ പ്രതികരിച്ചിട്ടില്ല. അതേസമയം, ഗസ്സയില്‍ ഇസ്‌റാഈല്‍ നരനായാട്ട് തുടരുകയാണ്. 24 മണിക്കൂറിനിടെ 39 ഫലസ്തീനികള്‍ കൊല്ലപ്പെട്ടതായും 62 പേര്‍ക്ക് പരിക്കേറ്റതായും ആരോഗ്യ മന്ത്രാലയം അറിയിച്ചു.