വയനാട്: ഗസറ്റഡ് തസ്തികകളുടെ എണ്ണം പകുതിയാക്കി സംസ്ഥാനത്തെ ലാന്‍ഡ് റവന്യൂ വകുപ്പില്‍ വന്‍ സംവരണ അട്ടിമറി. വകുപ്പിലെ തസ്തികകളുടെ എണ്ണം പകുതിയായി കാണിച്ച് പത്തുവര്‍ഷമായി പട്ടികജാതി -വര്‍ഗ സംവരണം അട്ടിമറിക്കുന്നത്. 2014ല്‍ 522 ഗസറ്റഡ് തസ്തികകള്‍ ഉണ്ടായിരുന്ന വകുപ്പില്‍ അടുത്തവര്‍ഷം അതിന്റെ നേര്‍പകുതിയായി കാണിച്ചാണ് സംവരണം അട്ടിമറിക്കുന്നത്. വര്‍ഷംതോറും നിര്‍ബന്ധമായി പ്രസിദ്ധീകരിക്കേണ്ട പ്രാതിനിധ്യ റിപോര്‍ട്ടിലാണ് തിരിമറി നടത്തി വര്‍ഷങ്ങളായി തന്നെ സംവരണം അട്ടിമറിക്കുന്നത്.

2015 മുതലാണ് അട്ടിമറിയുടെ തുടക്കം. പിന്നീട് അഞ്ചുകൊല്ലം പ്രസിദ്ധീകരിച്ച പ്രാതിനിധ്യ റിപോര്‍ട്ടിലും തസ്തികകള്‍ യഥാര്‍ഥ കണക്കിന്റെ പകുതിയാണ്. തുടര്‍ന്നു 2014ല്‍ റിപോര്‍ട്ടില്‍ കാണിച്ചിട്ടുളള 522 ഗസറ്റഡ് തസ്തികകള്‍ തൊട്ടടുത്ത വര്‍ഷം ഒറ്റയടിക്ക് 269 ആയി കുറഞ്ഞു. 2016ല്‍ അത് 258ഉം 2017ല്‍ 254ഉം 2019ല്‍ 263ഉം 2020ല്‍ 260 മാണ് റിപോര്‍ട്ടില്‍ കാണിച്ചത്. 2014 വരെ കൃത്യമായി പ്രസിദ്ധീകരിച്ചു വന്ന പ്രാതിനിധ്യ റിപോര്‍ട്ട് 2015 മുതല്‍ അട്ടിമറിയാനുള്ള കാരണം 2013-14 കാലഘട്ടത്തിലെ വാര്‍ഷിക പ്രാതിനിധ്യറിപോര്‍ട്ടിന്റെ അടിസ്ഥാനത്തില്‍ ലാന്‍ഡ് റവന്യൂ വകുപ്പിലെ ഗസറ്റഡ് തസ്തികകളില്‍ സംവരണ വിഭാഗങ്ങളില്‍ പെട്ട ഉദ്യോഗസ്ഥര്‍ നിര്‍ദിഷ്ട എണ്ണത്തിലും കുറവാണെന്നു കണ്ടെത്തിയിരുന്നു.

പിന്നാലെ സ്‌പെഷല്‍ റിക്രൂട്ട്‌മെന്റ് നടത്തിയ പിഎസ്‌സി, എസ് സി, എസ്ടി വിഭാഗത്തില്‍ നിന്നുളള ആറുപേരെയും ലാന്‍ഡ് റവന്യൂ വകുപ്പില്‍ നിയമിച്ചു. ഇതോടെയാണ് തൊട്ടടുത്ത വര്‍ഷം മുതല്‍ ഗസറ്റ് എടുത്ത് തസ്തികകളുടെ എണ്ണം പാതിയായി വെട്ടിക്കുറച്ച് കാണിക്കാന്‍ തുടങ്ങിയത്. തസ്തികകളുടെ എണ്ണം എങ്ങനെ കുറഞ്ഞുവെന്ന് വിവരാവകാശ നിയമപ്രകാരം വകുപ്പിനോട് ചോദിച്ചു. താല്‍ക്കാലിക നിയമനങ്ങള്‍ ഒഴിവാക്കിയപ്പോള്‍ തസ്തികകളുടെ എണ്ണം കുറഞ്ഞെന്നാണ് മറുപടി. താല്‍ക്കാലിക തസ്തികകളില്‍ സംവരണം അനിവാര്യമാണെന്ന സുപ്രിംകോടതിയുടെ വിധികള്‍ നിലനില്‍ക്കേയാണ് ഈ അട്ടിമറി നടക്കുന്നത്. 

 നക്ഷത്ര ചിഹ്നം ഇടാത്ത ചോദ്യത്തിന് സര്‍ക്കാര്‍ നിയമസഭയില്‍ കഴിഞ്ഞ മാര്‍ച്ച് മാസം 11ന് നല്‍കിയ മറുപടിയും അട്ടിറി വെളിവാക്കുന്നതാണ്. ലാന്‍ഡ് റവന്യൂ വകുപ്പിലെ മൊത്തം തസ്തികകളുടെയും അവയില്‍ സംവരണ തസ്തികകളുടെയും എണ്ണം സംബന്ധിച്ച് പ്രാതിനിധ്യ റിപോര്‍ട്ടില്‍ പ്രസിദ്ധീകരിച്ചതില്‍ നിന്ന് തികച്ചും വ്യത്യസ്തമായൊരു റിപോര്‍ട്ടാണ് റവന്യൂ വകുപ്പ് മന്ത്രി കെ രാജന്‍ നിയമസഭയില്‍ അവതരിപ്പിച്ചതും.