ഫുട്ബോളിൽ തനിക്ക് പ്രചോദനമായ താരങ്ങൾ ആരൊക്കെയാണെന്ന് തുറന്നു പറഞ്ഞിരിക്കുകയാണ് ബാഴ്സലോണയുടെ സ്പാനിഷ് യുവതാരം ലാമിൻ യമാൽ. ലയണൽ മെസി, നെയ്മർ എന്നീ താരങ്ങളാണ് തനിക്ക് പ്രചോദനമായതെന്നാണ് യമാൽ പറഞ്ഞത്. ഇഎസ്പിഎന്നിന് നൽകിയ അഭിമുഖത്തിൽ സംസാരിക്കുകയായിരുന്നു സ്പാനിഷ് യുവതാരം. 

''ഞാൻ ചെറുപ്പമായിരുന്നപ്പോൾ നെയ്മറിന്റെയും മെസിയുടെയും ജേഴ്സികൾ ധരിച്ചിരുന്നു. ഇപ്പോൾ കുട്ടികൾ എന്റെ ജേഴ്സി ധരിക്കുന്നത് കാണുമ്പോൾ ഫുട്ബോളിൽ ഞാൻ അവരുടെ പ്രചോദനമാണെന്ന് എനിക്ക് തോന്നുന്നു. ഇത് ഇത്ര പെട്ടെന്ന് തന്നെ സംഭവിക്കുമെന്ന് ഞാൻ ഒരിക്കലും കരുതിയിരുന്നില്ല. 13 വയസുള്ള കുട്ടികൾ അവരെക്കാൾ നാല് വയസ് മാത്രം പ്രായമുള്ള ഒരു ആളുടെ ജേഴ്സി ധരിക്കുന്നത് അതിശയകരമാണ്'' ലാമിൻ യമാൽ പറഞ്ഞു. 

ബാഴ്സക്കായി ഇതിനോടകം തന്നെ മിന്നും ഫോമിലാണ് യമാൽ കളിച്ചുകൊണ്ടിരിക്കുന്നത്. 21 ഗോളുകളും 30 ആസിസ്റ്റുകളും ആണ് താരം നേടിയത്. ബാഴ്സലോണക്കൊപ്പം രണ്ട് കിരീടങ്ങളും താരം സ്വന്തമാക്കിയിട്ടുണ്ട്. ഇതിനുപുറമേ രാജ്യാന്തര തലത്തിൽ സ്പാനിഷ് ടീമിന് വേണ്ടിയും ശ്രദ്ധേയമായ പ്രകടനങ്ങൾ പുറത്തെടുക്കാൻ യമാലിന് സാധിച്ചിട്ടുണ്ട്.

സ്പാനിഷ് ടീമിനൊപ്പം 2024 യൂറോ കപ്പ് സ്വന്തമാക്കാനും ലാമിന് സാധിച്ചിട്ടുണ്ട്. ഈ സീസണിൽ ഹാൻസി ഫ്ലിക്കിന്റെ കീഴിൽ മിന്നും പ്രകടനമാണ് സ്പാനിഷ് യുവതാരം നടത്തിക്കൊണ്ടിരിക്കുന്നത്. ഇതിനോടകം തന്നെ 43 മത്സരങ്ങളിൽ നിന്നും 14 ഗോളുകളും 21 അസിസ്റ്റുകളും ആണ് യമാൽ നേടിയിട്ടുള്ളത്.

ഈ സീസണിൽ സ്പാനിഷ് ലീഗിൽ ഹാൻസി ഫ്ലിക്കിന്റെ കീഴിൽ സ്വപ്ന തുല്യമായ മുന്നേറ്റമാണ് ബാഴ്സലോണ നടത്തിക്കൊണ്ടിരിക്കുന്നത്. നിലവിൽ ലാ ലീഗയിൽ ഒന്നാം സ്ഥാനത്താണ് ബാഴ്സലോണ. 33 മത്സരങ്ങളിൽ നിന്നും 24 വിജയവും നാല് സമനിലയും അഞ്ചു തോൽവിയും അടക്കം 73 പോയിന്റ് ആണ് ഹാൻസി ഫ്ലിക്കിന്റെയും സംഘത്തിന്റെയും കൈവശമുള്ളത്.  

Lamine Yamal Talks about Lionel Messi and Neymar