കൊച്ചി: കൊച്ചിയില്‍ പിടിയിലായ പ്രമുഖ സംവിധായകര്‍ക്ക് കഞ്ചാവ് എത്തിച്ചു നല്‍കിയവര്‍ക്കായുള്ള അന്വേഷണം ഊര്‍ജിതമാക്കി എക്‌സൈസ്. ഫ്‌ളാറ്റില്‍ നിന്ന് പിടികൂടിയ കഞ്ചാവ് ഇന്ന് കോടതിയില്‍ ഹാജരാക്കും. ഫ്‌ളാറ്റ് ഉടമയായ സംവിധായകനും തിരക്കഥാകൃത്തും ഛായാഗ്രഹകനുമായ സമീര്‍ താഹിറിനോട് ചോദ്യം ചെയ്യലിന് ഹാജരാകാന്‍ ആവശ്യപ്പെട്ട് ഉടന്‍ നോട്ടിസ് നല്‍കുമെന്നും റിപ്പോര്‍ട്ടുണ്ട്. 

കഴിഞ്ഞ ദിവസമാണ് സംവിധായകരായ ഖാലിദ് റഹ്‌മാന്‍, അഷ്‌റഫ് ഹംസ, ഇവരുടെ സുഹൃത്തായ ഷാലിഫ് മുഹമ്മദ് എന്നിവര്‍ മറൈന്‍ ഡ്രൈവിന് സമീപം ഗോശ്രീ പാലത്തിന് അടുത്തുള്ള ഫ്‌ളാറ്റില്‍ നിന്ന് പിടിയിലായത്. രഹസ്യവിവരത്തിന്റെ അടിസ്ഥാനത്തില്‍ കഴിഞ്ഞദിവസം പുലര്‍ച്ചെ നടത്തിയ തെരച്ചിലില്‍ ഛായാഗ്രാഹകന്‍ സമീര്‍ താഹിറിന്റെ  ഫ്‌ളാറ്റില്‍ നിന്നാണ് മൂവരെയും പിടികൂടിയത്. 

ഇവരില്‍ നിന്ന് 1.6 ഗ്രാം ഹൈബ്രിഡ് കഞ്ചാവാണ് കണ്ടെടുത്തത്. ആലപ്പുഴ ജിംഖാന, തല്ലുമാല തുടങ്ങിയ സിനിമകളുടെ സംവിധായകനാണ് പിടിയിലായ ഖാലിദ് റഹ്‌മാന്‍. മഞ്ഞുമ്മല്‍ ബോയ്‌സ് എന്ന സിനിമയില്‍ അഭിനയിച്ചിട്ടുമുണ്ട്.തമാശ, ഭീമന്റെ വഴി, സുലൈഖ മന്‍സില്‍ എന്നീ സിനിമകളുടെ സംവിധായകനാണ് അഷ്‌റഫ് ഹംസ. പിടിയിലായ സംവിധായകര്‍ സ്ഥിരമായി ലഹരി ഉപയോഗിക്കുന്നവരെന്ന് എക്‌സൈസ് സംഘം പറഞ്ഞു. ലഹരി ഉപയോഗിക്കാന്‍ തയാറെടുക്കുന്നതിനിടയിലാണ് ഇവരെ പിടികൂടിയത്. വൈദ്യപരിശോധനയ്ക്കുശേഷം അറസ്റ്റ് രേഖപ്പെടുത്തി വിട്ടയച്ചു. നേരത്തെയും എക്സൈസ് സംഘം ഈ പ്രദേശങ്ങളില്‍ തെരച്ചില്‍ നടത്തിയിരുന്നു. ഓസ്ട്രേലിയന്‍ പ്രവാസിയായ ഒരാള്‍ ലഹരി എത്തിക്കുന്നുവെന്ന വിവരമാണ് എക്സൈസിന് ലഭിച്ചത്. സംവിധായകര്‍ക്കൊപ്പം അറസ്റ്റിലായ ഷാലിഫ് മുഹമ്മദിനെ തേടിയാണ് എക്സൈസ് സംഘം എത്തിയത്.

സംഭവത്തില്‍ വിശദമായ അന്വേഷണം നടത്തുമെന്ന് എറണാകുളം എക്‌സൈസ് സ്‌പെഷല്‍ സ്‌ക്വാഡ് ഇന്‍സ്‌പെക്ടര്‍ കെ.പി പ്രമോദ് പറഞ്ഞു. സംവിധായകര്‍ക്ക് കഞ്ചാവ് എത്തിച്ചയാളെക്കുറിച്ച് കൂടുതല്‍ വിവരം ലഭിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു. അതിനിടെ, ഖാലിദ് റഹ്‌മാനെയും അഷ്‌റഫ് ഹംസയെയും ഫെഫ്ക സസ്പെന്‍ഡ് ചെയ്തു.