ന്യൂഡൽഹി: ഒടിടി (ഓവർ-ദി-ടോപ്പ്) പ്ലാറ്റ്‌ഫോമുകളിലും സോഷ്യൽ മീഡിയയിലെയും അശ്ലീല ഉള്ളടക്കം ഗുരുതരമായ ആശങ്ക ഉയർത്തുന്നുവെന്ന് സുപ്രീം കോടതി. ഇത്തരം ഉള്ളടക്കങ്ങൾ നിയന്ത്രിക്കണമെന്ന് ആവശ്യപ്പെട്ടുള്ള ഹരജി പരിഗണിക്കാൻ കോടതി സമ്മതിച്ചു. നെറ്റ്ഫ്ലിക്സ്, ആമസോൺ പ്രൈം, ആൾട്ട് ബാലാജി, ഉള്ളു ഡിജിറ്റൽ, മുബി തുടങ്ങിയ ഒടിടി പ്ലാറ്റ്‌ഫോമുകൾക്കും എക്സ് കോർപ്പ്, ഗൂഗിൾ, മെറ്റാ ഇങ്ക്, ആപ്പിൾ തുടങ്ങിയ സോഷ്യൽ മീഡിയ പ്ലാറ്റ്‌ഫോമുകൾക്കും സാമൂഹിക ഉത്തരവാദിത്തമുണ്ടെന്ന് കോടതി നിരീക്ഷിച്ചു.

ജസ്റ്റിസ് ബി.ആർ. ഗവായ്, ജസ്റ്റിസ് അഗസ്റ്റിൻ ജോർജ്ജ് മാസിഹ് എന്നിവരടങ്ങിയ ബെഞ്ചാണ് ഹരജി പരിഗണിച്ചത്. അശ്ലീല ഉള്ളടക്കം നിരോധിക്കാൻ ദേശീയ ഉള്ളടക്ക നിയന്ത്രണ അതോറിറ്റി രൂപീകരിക്കണമെന്ന് ആവശ്യപ്പെട്ട് പത്രപ്രവർത്തകനും മുൻ വിവരാവകാശ കമ്മീഷണറുമായ ഉദയ് മഹൂർക്കർ, സഞ്ജീവ് നെവാർ, സുദേഷ്‌ന ഭട്ടാചാര്യ മുഖർജി, ശതാബ്ദി പാണ്ഡെ, സ്വാതി ഗോയൽ എന്നിവർ സമർപ്പിച്ച ഹരജിയാണ് കോടതിയുടെ മുന്നിലെത്തിയത്.

"ഇത് ഗുരുതരമായ വിഷയമാണ്. ഒടിടി, സോഷ്യൽ മീഡിയ പ്ലാറ്റ്‌ഫോമുകളിൽ ലൈംഗികത പ്രകടമാക്കുന്ന ഉള്ളടക്കം നിയന്ത്രിക്കേണ്ടത് എക്സിക്യൂട്ടീവിന്റെയോ നിയമനിർമ്മാണ മേഖലയുടെയോ പരിധിയിൽ വരുന്നു," ജസ്റ്റിസ് ഗവായ് അഭിപ്രായപ്പെട്ടു. "നെറ്റ്ഫ്ലിക്സ് പോലുള്ള പ്ലാറ്റ്‌ഫോമുകൾക്കും സാമൂഹിക ഉത്തരവാദിത്തമുണ്ട്," അദ്ദേഹം വ്യക്തമാക്കി.

കേന്ദ്ര സർക്കാരിനെ പ്രതിനിധീകരിച്ച് ഹാജരായ സോളിസിറ്റർ ജനറൽ തുഷാർ മേത്ത, ചില നിയന്ത്രണങ്ങൾ ഇതിനകം നിലവിലുണ്ടെന്നും കൂടുതൽ നിയന്ത്രണങ്ങൾ പരിഗണനയിലാണെന്നും കോടതിയെ അറിയിച്ചു. "ചില ഒടിടി പരിപാടികളിൽ അശ്ലീല ഉള്ളടക്കം അതിരുവിട്ടിരിക്കുന്നു. രണ്ട് മാന്യന്മാർക്ക് പോലും ഒരുമിച്ചിരുന്ന് കാണാൻ കഴിയാത്ത വിധം വികൃതമായ ഉള്ളടക്കങ്ങൾ ഉണ്ട്," മേത്ത വാദിച്ചു.

ഹരജിക്കാർക്ക് വേണ്ടി ഹാജരായ അഭിഭാഷകൻ വിഷ്ണു ശങ്കർ ജെയിൻ, "ഇത് ഒരു കേസല്ല, യഥാർത്ഥ ആശങ്ക ഉയർത്തുന്ന വിഷയമാണ്. സോഷ്യൽ മീഡിയയിൽ യാതൊരു നിയന്ത്രണമോ പരിശോധനയോ ഇല്ലാതെ ഉള്ളടക്കം പ്രചരിക്കുന്നു," എന്ന് ചൂണ്ടിക്കാട്ടി. നിയമനിർമ്മാണപരമായി എന്തെങ്കിലും ചെയ്യൂ," ജസ്റ്റിസ് ഗവായ് സോളിസിറ്റർ ജനറലിനോട് നിർദ്ദേശിച്ചു. ഈ ഹരജിയെ സമാന വിഷയങ്ങൾ ഉന്നയിക്കുന്ന മറ്റ് ഹരജികളോടൊപ്പം ചേർത്ത് പരിഗണിക്കാൻ കോടതി തീരുമാനിച്ചു.

നേരത്തെ, രൺവീർ അലഹബാദിയ കേസിന്റെ വാദത്തിനിടെ, ഒടിടി, സോഷ്യൽ മീഡിയ പ്ലാറ്റ്‌ഫോമുകളിലെ അശ്ലീലവും അസഭ്യവുമായ ഉള്ളടക്കങ്ങൾ നിയന്ത്രിക്കാൻ നടപടികൾ സ്വീകരിക്കണമെന്ന് സുപ്രീം കോടതി കേന്ദ്രത്തോട് ആവശ്യപ്പെട്ടിരുന്നു. കേന്ദ്ര സർക്കാർ, ഒടിടി, സോഷ്യൽ മീഡിയ പ്ലാറ്റ്‌ഫോമുകൾ എന്നിവയ്ക്ക് അയച്ച നോട്ടീസിന് മറുപടി ലഭിച്ച ശേഷം കോടതി വിഷയത്തിൽ അന്തിമ തീരുമാനമെടുക്കും.