കൊച്ചി: ലഹരിവിരുദ്ധ പ്രചാരണം നടത്തിയ റാപ്പർ വേടൻ കഞ്ചാവ് ഉപയോഗിച്ച കേസിൽ അറസ്റ്റിൽ. വൈറ്റില കണിയാമ്പുഴയിലെ ഫ്ലാറ്റിൽ സംഗീത ട്രൂപ്പിലെ എട്ട് അംഗങ്ങൾക്കൊപ്പം കഞ്ചാവ് ഉപയോഗിച്ചതായി വേടൻ സമ്മതിച്ചതായി പൊലീസ്. ഫ്ലാറ്റിൽ നടത്തിയ പരിശോധനയിൽ ആറ് ഗ്രാം കഞ്ചാവ് പിടിച്ചെടുത്തു. വേടനെ കൂടാതെ മറ്റ് ട്രൂപ്പ് അംഗങ്ങളെയും അറസ്റ്റ് രേഖപ്പെടുത്തി .

രഹസ്യവിവരത്തിന്റെ അടിസ്ഥാനത്തിൽ പുലർച്ചെ 1.20-നാണ് കൊച്ചി, തൃപ്പുണിത്തുറയിലെ ഫ്ലാറ്റിൽ പൊലീസ് പരിശോധന നടത്തിയത്. ഷോയ്ക്ക് വേണ്ടി പ്രാക്ടീസിനായി ഒത്തുകൂടിയതാണെന്ന് വേടൻ പറഞ്ഞു. കഞ്ചാവ് എവിടെനിന്ന് ലഭിച്ചെന്ന് വേടൻ വെളിപ്പെടുത്തിയെങ്കിലും, അന്വേഷണം തുടരുന്നതിനാൽ വിവരങ്ങൾ പുറത്തുവിട്ടിട്ടില്ല. ഫ്ലാറ്റിൽ നിന്ന് മൊബൈൽ ഫോണുകൾ, 9.5 ലക്ഷം രൂപ, കഞ്ചാവ് വലിക്കാനുള്ള പേപ്പർ എന്നിവ പിടിച്ചെടുത്തു. പണം പ്രോഗ്രാമുകളിൽ നിന്നുള്ള വരുമാനമാണെന്ന് വേടനും സംഘവും അവകാശപ്പെട്ടു. ഇത് പരിശോധനയ്ക്ക് വിധേയമാക്കും.

മെഡിക്കൽ പരിശോധനയ്ക്ക് ശേഷം തുടർനടപടികൾ സ്വീകരിക്കുമെന്ന് ഹിൽപാലസ് സിഐ അറിയിച്ചു. പരിശോധനയ്ക്കിടെ വനംവകുപ്പ് ഉദ്യോഗസ്ഥർ എത്തിയത് ദുരൂഹതയ്ക്ക് ഇടയാക്കി. സംസ്ഥാന സർക്കാരിന്റെ നാലാം വാർഷിക ആഘോഷത്തിന്റെ ഭാഗമായി ഇടുക്കിയിൽ നടക്കേണ്ട വേടന്റെ റാപ്പ് ഷോ റദ്ദാക്കി.

യുവതലമുറയിൽ ലഹരിവിരുദ്ധ സന്ദേശവുമായി ശ്രദ്ധേയനായ വേടൻ എന്നറിയപ്പെടുന്ന ഹിരൺ ദാസ് മുരളി, കഞ്ചാവ് കേസിൽ പിടിയിലായത് ഞെട്ടലുണ്ടാക്കി. സിനിമ-സംഗീത മേഖലയിൽ മയക്കുമരുന്ന് ഉപയോഗം വ്യാപകമാണെന്ന വിലയിരുത്തലിന്റെ അടിസ്ഥാനത്തിൽ കൊച്ചിയിൽ പൊലീസ് പരിശോധന ശക്തമാക്കി. വേടനെ കുറച്ചുകാലമായി നിരീക്ഷിച്ചിരുന്നതായി പൊലീസ് വെളിപ്പെടുത്തി.