ലണ്ടന്‍: പഹല്‍ഗാം ഭീകരാക്രമണത്തിനെതിരെയുള്ള പ്രതിഷേധത്തില്‍ ലണ്ടനിലെ പാകിസ്ഥാന്‍ ഹൈകമ്മിഷനു നേരെ ആക്രമണം. ജനല്‍ ചില്ലുകള്‍ തകര്‍ക്കപ്പെട്ട ഈ സംഭവത്തില്‍ 41 കാരനായ അങ്കിത് ലവിയെ അറസ്റ്റ് ചെയ്തു.

വെള്ളിയാഴ്ച നടന്ന ഇന്ത്യന്‍ പ്രവാസി സമൂഹത്തിന്റെ പ്രതിഷേധ റാലിയില്‍ 500ലധികം പേര്‍ പങ്കെടുത്തിരുന്നു. ഭീകരാക്രമണത്തില്‍ മരിച്ചവര്‍ക്ക് നീതി ലഭിക്കണമെന്ന് ആവശ്യപ്പെട്ട് ജനക്കൂട്ടം ദേശീയ പതാകകളും പ്രതിഷേധ ബാനറുകളും ഉയര്‍ത്തി.

പ്രതിഷേധക്കാരെ പ്രകോപിപ്പിക്കുന്ന രീതിയിലാണ് പാക് ഹൈകമ്മിഷന്‍ ഉദ്യോഗസ്ഥര്‍ പെരുമാറിയതെന്ന് ആരോപണങ്ങള്‍ ഉയര്‍ന്നിട്ടുണ്ട്. പാക് ആര്‍മി അറ്റാഷെ കേണല്‍ തൈമൂര്‍ റാഹത്ത് ഇന്ത്യക്കാര്‍ക്കെതിരെ അക്രമണാത്മകമായ ആംഗ്യം കാണിച്ച വീഡിയോ സോഷ്യല്‍ മീഡിയയില്‍ വൈറലായി. പ്രതിഷേധക്കാരുടെ മുദ്രാവാക്യങ്ങള്‍ക്ക് മറുപടിയായി ഹൈകമമ്മിഷന്‍ ഉദ്യോഗസ്ഥര്‍ ഉച്ചത്തില്‍ പാട്ടു വെക്കുകയും ബഹളം കൂട്ടുകയും ചെയ്തതായി റിപ്പോര്‍ട്ടുകള്‍ വന്നിട്ടുണ്ട്.

കെട്ടിടത്തില്‍ 'പാകിസ്താന്‍ കശ്മീരികളോടൊപ്പം' എന്ന ബാനര്‍ തൂക്കിയിരുന്നു. ഇന്ത്യക്ക് കൈമാറിയ വ്യോമസേനാ പൈലറ്റ് അഭിനന്ദന്‍ വര്‍ദ്ധമാന്റെ ചിത്രം പതിച്ച ബോര്‍ഡ് ഒരു പാക് സൈനിക ഉദ്യോഗസ്ഥന്‍ ഉയര്‍ത്തിക്കാണിക്കുന്നതും സംഭവസ്ഥലത്തെ ദൃശ്യങ്ങളില്‍ കാണാം.