വേടൻ മൂന്നുവർഷത്തിലധികമായി കഞ്ചാവ് ഉപയോഗിക്കുന്നു എന്ന് ചോദ്യം ചെയ്യലിൽ സമ്മതിച്ചു. നിർത്തണമെന്ന് ആഗ്രഹമുണ്ടെങ്കിലും സാധിച്ചില്ല എന്നും ലഹരി ഉപയോഗിക്കുന്നതിനെ താൻ പ്രോത്സാഹിപ്പിക്കാറില്ല എന്നും വേടൻ പോലീസിനോട് പറഞ്ഞു. പിടിക്കപ്പെടും എന്ന് കരുതിയില്ല എന്നും വേടൻ കൂട്ടിച്ചേർത്തു.

പോലീസ് പിടികൂടിയ ശേഷം ഫ്ലാറ്റിൽ വെച്ചാണ് വേടൻ ഇക്കാര്യങ്ങൾ പറഞ്ഞത്. ലഹരി ഉപയോഗം, ഗൂഢാലോചന എന്നീ വകുപ്പുകളാണ് വേടനെതിരെ ചുമത്തിയിരിക്കുന്നത്. ഈ കേസിൽ രണ്ടാം പ്രതിയാണ് വേടൻ. കഞ്ചാവ് ഉപയോഗത്തിനിടെയാണ് വേടനും മറ്റ് 9 പേരും പിടിയിലായത്.

കൂടാതെ, വേടന്റെ മാലയിലെ പല്ല് പുലിപ്പല്ലെന്ന് സ്ഥിരീകരിച്ചതോടെ വനംവകുപ്പ് വേറെ കേസ് രജിസ്റ്റർ ചെയ്തിട്ടുണ്ട്. വനംവകുപ്പ് ജാമ്യം ലഭിക്കുന്നതും ലഭിക്കാത്തതുമായ വകുപ്പുകൾ ചുമത്തിയിട്ടുണ്ടെന്ന് പോലീസ് അറിയിച്ചു. ഇന്ന് പെരുമ്പാവൂർ കോടതിയിൽ വേടനെ ഹാജരാക്കും. വനംവകുപ്പ് കേസെടുത്തതിനെ തുടർന്ന് വേടനെ തൃപ്പൂണിത്തുറ സ്റ്റേഷനിൽ നിന്ന് കോടനാട്ടേക്ക് കൊണ്ടുപോയിരുന്നു.