കൊൽക്കത്ത: മധ്യ കൊൽക്കത്തയിലെ മെച്ചുവ ബസാറിലുള്ള ഹോട്ടൽ റിതുരാജിൽ ചൊവ്വാഴ്ച രാത്രി ഉണ്ടായ വൻ തീപിടിത്തത്തിൽ രണ്ട് കുട്ടികൾ ഉൾപ്പെടെ 14 പേർ മരിച്ചു. മരിച്ചവരിൽ 11 പുരുഷന്മാരും ഒരു സ്ത്രീയും രണ്ട് കുട്ടികളും ഉൾപ്പെടുന്നു. കനത്ത പുക പടർന്നതിനെ തുടർന്ന് ശ്വാസംമുട്ടലാണ് മിക്കവരുടെയും മരണകാരണമെന്ന് അഗ്നിശമന സേനാ ഉദ്യോഗസ്ഥർ അറിയിച്ചു.

മദൻ മോഹൻ ബർമൻ സ്ട്രീറ്റിലെ ആറ് നിലകളുള്ള ഹോട്ടലിന്റെ ഒന്നാം നിലയിൽ രാത്രി 8:20 ഓടെയാണ് തീപിടിത്തമുണ്ടായത്. പ്രധാനമായും മറ്റ് സംസ്ഥാനങ്ങളിൽ നിന്നുള്ള വ്യാപാരികൾ താമസിക്കുന്ന ഈ ഹോട്ടലിൽ 42 മുറികളിലായി 88 താമസക്കാരും ഏകദേശം 60 ജീവനക്കാരും ഉണ്ടായിരുന്നതായി പൊലീസ് വ്യക്തമാക്കി.

തീപിടിത്തത്തെ തുടർന്ന് മുറികളിലും ഇഡനാഴികളിലും പുക നിറഞ്ഞതോടെ നിരവധി പേർ മേൽക്കൂരയിലേക്കും ബാൽക്കണിയിലേക്കും ഓടിക്കയറി. ഹോട്ടൽ ജീവനക്കാരനായ മനോജ് പാസ്വാസ് പരിഭ്രാന്തനായി ഒരു നിലയിൽ നിന്ന് ചാടി മരിച്ചു. 13 പേർക്ക് പരിക്കേറ്റതായും ഇവരെ സമീപത്തെ ആശുപത്രികളിൽ പ്രവേശിപ്പിച്ചതായും പൊലീസ് അറിയിച്ചു. ഇതിൽ 12 പേരെ ഡിസ്ചാർജ്  ചെയ്തു, ഒരാൾ ആശുപത്രിയിൽ ചികിത്സയിലാണ്. സംഭവത്തിന് പിന്നാലെ 10 ഫയർ ടെൻഡറുകൾ ഉപയോഗിച്ച് അഗ്നിശമന സേന രക്ഷാപ്രവർത്തനം നടത്തി. പുലർച്ചെ 3:30 ഓടെയാണ് തീ നിയന്ത്രണവിധേയമാക്കിയത്. കൊൽക്കത്ത മേയർ ഫിർഹാദ് ഹക്കീമും പൊലീസ് കമ്മീഷണർ മനോജ് വർമ്മയും മുതിർന്ന ഉദ്യോഗസ്ഥർക്കൊപ്പം സ്ഥലത്തെത്തി.

“തീപിടിത്തത്തിന്റെ കാരണം കണ്ടെത്താൻ പൊലീസും അഗ്നിശമന സേനയും അന്വേഷണം നടത്തും. എഫ്‌ഐആർ രജിസ്റ്റർ ചെയ്യും. മുഖ്യമന്ത്രി മമത ബാനർജിക്ക് വിവരം കൈമാറിയിട്ടുണ്ട്,” മേയർ ഫിർഹാദ് ഹക്കീം മാധ്യമങ്ങളോട് പറഞ്ഞു. സംഭവത്തെക്കുറിച്ച് വിശദമായി അന്വേഷിക്കാൻ പ്രത്യേക അന്വേഷണ സംഘത്തെ നിയോഗിച്ചതായി കൊൽക്കത്ത പൊലീസിലെ മുതിർന്ന ഐപിഎസ് ഉദ്യോഗസ്ഥൻ അറിയിച്ചു.