ദോഹ: ഈ പ്രാവശ്യത്തെ  വിശുദ്ധ ഹജ്ജ് കർമത്തിനായി ഖത്തറിൽ നിന്നും പോകുന്ന തീർത്ഥാടകർ എടുക്കേണ്ട വാക്‌സിനുകളുടെ ലിസ്റ്റും പാലിക്കേണ്ട ആരോഗ്യ മുൻകരുതലുകളും അറിയിച്ചു ഖത്തർ ആരോഗ്യ മന്ത്രാലയം വിശദമായ കുറിപ്പ് പുറത്തിറക്കി. വാക്സിനേഷനുകളുടെ  ആവശ്യകതകളെക്കുറിച്ചും വിശുദ്ധ ഹജ്ജ് കർമത്തിനു പോകുന്ന തീർത്ഥാടകരുടെ ആരോഗ്യവും സുരക്ഷയും സംരക്ഷിക്കുന്നതിനുള്ള ഖത്തർ ആരോഗ്യ മന്ത്രാലയത്തിന്റെ പ്രതിജ്ഞാബദ്ധതയും കൂടിയാണ് ഇതിലൂടെ മന്ത്രാലയം ഉറപ്പ് വരുത്തുന്നത്.

സാംക്രമിക രോഗങ്ങളുടെ സാധ്യതകളും സങ്കീർണതകളും കുറയ്ക്കുന്നതിനൊപ്പം തീർഥാടകരെ സുരക്ഷിതമായി അവരുടെ കർമ്മങ്ങൾ നിർവഹിക്കാൻ പ്രാപ്തരാക്കുന്നതിനാണ് ഈ നടപടികൾ.
ഈ വർഷത്തെ ഹജ്ജിനു പോകുന്നവർ നിർബന്ധമായും മെനിംഗോകോക്കൽ (ക്വാഡ്രിവാലൻ്റ് എസിവൈഡബ്ല്യു-135) വാക്‌സിൻ എടുത്തിരിക്കണമെന്ന് ആരോഗ്യ മന്ത്രാലയം വ്യക്തമാക്കി. 65 വയസ്സിനു മുകളിലുള്ള തീർഥാടകർ, ഗർഭിണികൾ, വിട്ടുമാറാത്ത ഹൃദ്രോഗം, ശ്വാസകോശ സംബന്ധമായ അസുഖങ്ങൾ, വിട്ടുമാറാത്ത വൃക്ക തകരാർ, പാരമ്പര്യ രക്ത വൈകല്യങ്ങൾ (സിക്കിൾ സെൽ അനീമിയ, തലസീമിയ പോലുള്ളവ), ജന്മനാ അല്ലെങ്കിൽ രോഗപ്രതിരോധശേഷിക്കുറവ് ഉള്ളവർ, വിട്ടുമാറാത്ത ന്യൂറോളജിക്കൽ രോഗങ്ങൾ എഎന്നിവയിൽ ഉൾപ്പെടുന്നവർക്ക് COVID-19 വാക്സിൻ നിർബന്ധമാണ്.
18 വയസും അതിനുമുകളിലും പ്രായമുള്ള എല്ലാ തീർത്ഥടകർക്കും COVID19 വാക്‌സിൻ സ്വീകരിക്കുന്നതിന് ശുപാർശ ചെയ്യുകയും, സീസണൽ ഇൻഫ്ലുവൻസ വാക്സിൻ സ്വീകരിക്കാൻ മന്ത്രാലയത്തിന്റെ നിർദ്ദേശവുമുണ്ട്.

വാക്സിനുകൾ രാജ്യത്തുടനീളമുള്ള പ്രാഥമിക ആരോഗ്യ കേന്ദ്രങ്ങളിൽ (പി എച് സി സി) ലഭ്യമാണെന്ന് മന്ത്രാലയം സ്ഥിരീകരിച്ചു, സൗദി അറേബ്യയിലേക്ക് പോകുന്നതിന് കുറഞ്ഞത് 10 ദിവസം മുമ്പെങ്കിലും ആവശ്യമായ പ്രതിരോധ കുത്തിവയ്പ്പുകൾ സ്വീകരിക്കേണ്ടതുണ്ടെന്നു മന്ത്രാലയം അറിയിച്ചിട്ടുണ്ട്. നേരിട്ടുള്ള സമ്പർക്കത്തിലൂടെയോ മലിനമായ പ്രതലങ്ങളിലൂടെയോ പകരുന്ന സാംക്രമിക രോഗങ്ങളുടെ അപകടസാധ്യത കുറയ്ക്കുന്നതിന് പ്രതിരോധ നടപടികൾ പാലിക്കാനും ആരോഗ്യത്തിനും സുരക്ഷയ്ക്കും ആവശ്യമായ വാക്‌സിനുകൾ സ്വീകരിക്കാനും ഖത്തറിൽ നിന്നുള്ള മുഴുവൻ ഹജ്ജ് തീർഥാടകരോടും ഞങ്ങൾ അഭ്യർത്ഥിക്കുന്നതായി ആരോഗ്യ സംരക്ഷണ, സാംക്രമിക രോഗ നിയന്ത്രണ വകുപ്പ് ഡയറക്ടർ ഡോ. ഹമദ് ഈദ് അൽ റുമൈഹി പറഞ്ഞു. വിട്ടുമാറാത്ത രോഗങ്ങളുള്ളവർ യാത്രയ്‌ക്ക് മുമ്പായി ഡോക്ടറെ കാണാനും മുഴുവൻ യാത്രയ്ക്കും മതിയായ മരുന്നുകൾ കൈവശം ഉണ്ടെന്ന് ഉറപ്പാക്കാനും അദ്ദേഹം ഓർമിപ്പിച്ചു..
‘ഖത്തറി തീർഥാടകരുടെ ആരോഗ്യവും സുരക്ഷയും സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കാൻ പൊതുജനാരോഗ്യ മന്ത്രാലയം പ്രതിജ്ഞാബദ്ധമാണ് എന്നും ഇത് ദേശീയ ആരോഗ്യ തന്ത്രം 2024–2030 ന് അനുസൃതമായുള്ളതാണെന്നും അദ്ദേഹം കൂട്ടിച്ചേർത്തു.
ഔഖാഫ്, ഇസ്ലാമിക് അഫയേഴ്‌സ്, ഖത്തർ റെഡ് ക്രസൻ്റ് സൊസൈറ്റി (ക്യുആർസിഎസ്) എന്നിവയുടെ സഹകരണത്തോടെ, ഹജ്ജ് കർമ്മങ്ങൾക്ക് മുമ്പും ശേഷവും ശേഷവും പാലിക്കേണ്ട അത്യാവശ്യ ആരോഗ്യ,പ്രതിരോധ നിർദ്ദേശങ്ങൾ ഉൾപ്പെടുന്ന പിൽഗ്രിംസ് ഹെൽത്ത് ഗൈഡും ഖത്തർ ആരോഗ്യ മന്ത്രാലയം  പുറത്തിറക്കിയിട്ടുണ്ട്.

കൂടുതൽ വിവരങ്ങൾ അറിയേണ്ടവർക്കായി ആരോഗ്യ മേഖലയിലെ കോൾ സെന്റർ നമ്പറായ 16000 ൽ ബന്ധപ്പെടാമെന്നും അല്ലെങ്കിൽ മിനിസ്ട്രി ഓഫ് പബ്ലിക് ഹെൽത്ത്‌ വെബ്സൈറ്റ് സന്ദർശിച്ച് “ഹജ്ജ് ഹെൽത്ത് ഗൈഡ്” ഉപയോഗിക്കാമെന്നും മന്ത്രാലയം അറിയിച്ചിട്ടുണ്ട്.