തിരുവനന്തപുരം: പട്ടം സെന്റ് മേരീസ് സ്കൂളിന് സമീപം കാർ, ഓട്ടോ, സ്കൂട്ടർ എന്നിവ കൂട്ടിയിടിച്ചുണ്ടായ അപകടത്തിൽ ഓട്ടോയ്ക്ക് തീപ്പിടിച്ച് ഒരാൾ മരിച്ചു. ഓട്ടോയിലുണ്ടായിരുന്ന സുനി (40) ആണ് മരണപ്പെട്ടത്. മൂന്ന് പേർക്ക് അപകടത്തിൽ പരിക്കേറ്റു. പുലർച്ചെ 3:30ന് ഉണ്ടായ അപകടത്തിൽ ശ്രീകാര്യം സ്വദേശി അയാൻ (19) ഓടിച്ച കാർ ഓട്ടോയിലും സ്കൂട്ടറിലും ഇടിക്കുകയായിരുന്നു. പരിക്കേറ്റവരെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിട്ടുണ്ട്.

ഒരേ ദിശയിൽ സഞ്ചരിച്ച വാഹനങ്ങൾ തമ്മിലുള്ള കൂട്ടിയിടിയാണ് അപകടത്തിന് കാരണമായത്. കാർ നിയന്ത്രണം വിട്ട് ഓട്ടോയിൽ ഇടിച്ചതിനെ തുടർന്ന് ഓട്ടോ സ്കൂട്ടറിൽ ഇടിക്കുകയും തുടർന്ന് കാർ ബൈക്കിൽ ഇടിക്കുകയും ചെയ്തു. ഇടിയുടെ ആഘാതത്തിൽ ഓട്ടോയിൽ കുടുങ്ങിയ സുനി തീപ്പിടിത്തത്തിൽ വെന്തുമരിച്ചു. ഓട്ടോയിൽ നിന്ന് ഒരാളെ രക്ഷപ്പെടുത്തിയെങ്കിലും ഡ്രൈവറെ പുറത്തെടുക്കാൻ കഴിഞ്ഞില്ല. സ്കൂട്ടറിലുണ്ടായിരുന്ന സ്ത്രീക്ക് ഗുരുതര പരിക്കേറ്റു. കാറിലെ യുവാവിന്റെ നിലവിളി കേട്ടാണ് ആളുകൾ ഓടിക്കൂടിയത്.