പത്തനംതിട്ട: നീറ്റ് പരീക്ഷയില്‍ ആള്‍മാറാട്ടത്തിനു ശ്രമം. പത്തനംതിട്ടയിലാണ് സംഭവം. വിദ്യാര്‍ത്ഥിയെ പൊലിസ് കസ്റ്റഡിയില്‍ എടുത്തിട്ടുണ്ട്.

തിരുവനന്തപുരം സ്വദേശിയായ വിദ്യാര്‍ത്ഥി മറ്റൊരാളുടെ ഹാള്‍ ടിക്കറ്റുമായാണ് പരീക്ഷക്ക് എത്തിയത്. തൈക്കാവ് വിഎച്ച്എസ്എസ് എക്‌സാം സെന്ററില്‍ ആണ് വിദ്യാര്‍ത്ഥി പരീക്ഷ എഴുതാന്‍ എത്തിയത്.

ഹാള്‍ടിക്കറ്റിന്റെ ആദ്യ പാര്‍ട്ടില്‍ കസ്റ്റഡിയില്‍ എടുത്ത വിദ്യാര്‍ത്ഥിയുടെ പേരും ഡിക്ലറേഷന്‍ ഭാഗത്ത് തിരുവനന്തപുരത്തു നിന്നുള്ള മറ്റൊരു വിദ്യാര്‍ത്ഥിയുടെ പേരുമാണുള്ളത്.

കസ്റ്റഡിയില്‍ എടുത്ത വിദ്യാര്‍ത്ഥിയെ പൊലിസ് ചോദ്യം ചെയ്യുകയാണ്. അക്ഷയ സെന്റര്‍ ജീവനക്കാരിയാണ് ഹാള്‍ടിക്കറ്റ് പ്രിന്റ് ചെയ്തു നല്‍കിയതെന്ന് വിദ്യാര്‍ത്ഥി പൊലിസിനു മൊഴി നല്‍കി.