തിരുവനന്തപുരം: സംസ്ഥാനത്തെ വിവിധ ജില്ലകളില്‍ വരും ദിവസങ്ങളില്‍ ചൂട് കൂടുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. പത്ത് ജില്ലകളില്‍ താപനില ഉയരുമെന്നാണ് മുന്നറിയിപ്പ്. 

യെല്ലോ അലര്‍ട്ട്

തിരുവനന്തപുരം, കൊല്ലം, കോട്ടയം, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, കണ്ണൂര്‍, കാസറഗോഡ് ജില്ലകളിലാണ് താപനില മുന്നറിയിപ്പുള്ളത്. 

ഇന്നും, നാളെയും പാലക്കാട്, കോഴിക്കോട് ജില്ലകളില്‍ താപനില 39°C വരെയും, തൃശൂര്‍, കണ്ണൂര്‍ ജില്ലകളില്‍ 38°C വരെയും, മലപ്പുറം, കാസറഗോഡ് ജില്ലകളില്‍ താപനില 37°C വരെയും, തിരുവനന്തപുരം, കൊല്ലം, കോട്ടയം, എറണാകുളം ജില്ലകളില്‍ താപനില 36°C വരെയും ഉയരാന്‍ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്..ഉയര്‍ന്ന താപനിലയും ഈര്‍പ്പമുള്ള വായുവും കാരണം ഈ ജില്ലകളില്‍, മലയോര മേഖലകളിലൊഴികെ, ഇന്നും (04/05/2025) & നാളെയും (05/05/2025) ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യതയുണ്ട്.

അതിനാല്‍ രാവിലെ 11 മുതല്‍ മൂന്ന് മണിവരെയുള്ള സമയത്ത് വെയിലേല്‍ക്കാതിരിക്കാന്‍ പൊതുജനങ്ങള്‍ ശ്രദ്ധിക്കണമെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്‍കിയിട്ടുണ്ട്. 

അതേസമയം കേരളത്തില്‍ ഇന്നുമുതല്‍ മൂന്ന് ദിവസത്തേക്ക് മഴ ജാഗ്രത മുന്നറിയിപ്പുകളില്ല. മെയ് 07ന് പാലക്കാട്, ഇടുക്കി, പത്തനംതിട്ട ജില്ലകളിലും, മെയ് 08ന് വയനാട്, പാലക്കാട്, പത്തനംതിട്ട ജില്ലകളിലും മഴ മുന്നറിയിപ്പ് പ്രഖ്യാപിച്ചിട്ടുണ്ട്. ഇവിടങ്ങളില്‍ ഒറ്റപ്പെട്ട മഴയ്ക്കും, കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

government issue warning about rising temperatures in various districts of Kerala in the coming days