കുതിപ്പിനു മേല്‍ കുതിപ്പായിരുന്നു ഈ വര്‍ഷം തുടക്കം മുതല്‍ തന്നെ സ്വര്‍ണം. ഇങ്ങനെ പോയാല്‍ പവന്‍ വില താമസിയാതെ ലക്ഷം കടക്കുമോ എന്ന് പോലും ഉപഭോക്താക്കള്‍ സംശയിച്ചു. കഴിഞ്ഞയാഴ്ച നേരിയ ഇടിവ് കാണിച്ചെങ്കിലും കൊക്കിലൊതുങ്ങാത്ത തരത്തില്‍ തന്നെയാണ് ഇപ്പോഴും സ്വര്‍ണ വില.  കേരളത്തില്‍ ഇപ്പോള്‍ വിവാഹ സീസണ്‍ ആണെന്നതും കൂടിയാണ് വലക്കയറ്റം സാധാരണക്കാര്‍ക്ക് വയറ്റത്തടിയാവുന്നത്.

സ്വര്‍ണത്തിന്റെ വില തന്നെ കയ്യിലൊതുങ്ങാത്തതാണ്. അത് ആഭരണമായി വാങ്ങുമ്പോഴോ. പിടുത്തം വിടും തീര്‍ച്ച. 22 കാരറ്റില്‍ ഒരു പവന്റെ ആഭരണം വാങ്ങാന്‍ തന്നെ നല്‍കണം ഒരു ലക്ഷത്തിനടുത്ത്. വിവാഹത്തിന് ആഭരണമായിട്ടാണല്ലോ സ്വര്‍ണം വാങ്ങിക്കുന്നത്. ജ്വല്ലറികള്‍ എങ്ങിനെയാണ് ആഭരണങ്ങളുടെ വില കണക്കാക്കുന്നത് എന്ന് അറിയല്‍ ഉപഭോക്താക്കള്‍ അറിയേണ്ടതാണ്. 

സ്വര്‍ണത്തിന്റെ പരിശുദ്ധി, പണിക്കൂലി, നികുതികള്‍, ഹാള്‍മാര്‍ക്കിംഗ് ചാര്‍ജുകള്‍ തുടങ്ങിയ ഘടകങ്ങളെല്ലാം സ്വര്‍ണാഭരണങ്ങളുടെ അന്തിമ വിലയെ സ്വാധീനിക്കുന്നുണ്ട്. ആഭരണത്തില്‍ ഏതെങ്കിലും തരത്തിലുള്ള കല്ലോ മറ്റോ ഉണ്ടെങ്കില്‍ അതിന്റെ വിലയും സ്വര്‍ണാഭരണത്തിന്റെ വിലയില്‍ ഉള്‍പ്പെടും.

സ്വര്‍ണാഭരണങ്ങളുടെ വില കണക്കാക്കുന്നതിലെ ഘടകങ്ങള്‍ എന്തൊക്കെയാണ് എന്ന് നോക്കാം.

പണിക്കൂലി
പണിക്കൂലിയാണ് ഏറ്റവും പ്രധാനം. ആഭരണങ്ങള്‍ രൂപകല്‍പ്പന ചെയ്യുന്നതിനും നിര്‍മ്മിക്കുന്നതിനുമുള്ള ചെലവ് ആണ് ഇത്. ആഭരണങ്ങളുടെ ഡിസൈനുകളുടെ സങ്കീര്‍ണ്ണത അനുസരിച്ച് പണിക്കൂലി വ്യത്യാസപ്പെടും.  സ്വര്‍ണ വിലയുടെ ഒരു നിശ്ചിത ശതമാനമായോ അല്ലെങ്കില്‍ ഒരു ഏകീകൃത നിരക്കായോ ആണ് ഈ നിരക്കുകള്‍ ഈടാക്കുന്നത്.

ജി.എസ്.ടിയും മറ്റ് നികുതികളും
മൂന്ന് ശതമാനം ആണ് ജി എസ് ടിയായി സാധാരണ നിലക്ക് കണക്കാക്കുന്നത്. അത് ബില്ലിന്റെ അവസാനമാണ് ചേര്‍ക്കുക. 22 കാരറ്റ് സ്വര്‍ണ്ണത്തിന്റെ വില 96,500 രൂപയില്‍ 91.6% ആയിരിക്കും, അതായത്, 10 ഗ്രാമിന് 88,394 രൂപ. 8.9 ഗ്രാം ഭാരമുള്ള ഒരു സ്വര്‍ണമാല വാങ്ങാന്‍ നിങ്ങള്‍ ആഗ്രഹിക്കുന്നുവെന്ന് കരുതുക.

ഇതിന്റെ വില 78,670.66 രൂപയായിരിക്കും (8839.40 രൂപയെ 8.9 ഗ്രാം കൊണ്ട് ഗുണിക്കുക). ജ്വല്ലറി ഒരു ഗ്രാമിന് 499 രൂപ പണിക്കൂലിയായി ഈടാക്കുന്നു. ഈ സാഹചര്യത്തില്‍, പണിക്കൂലി 4,441.10 രൂപയായിരിക്കും. മാലയുടെ ആകെ വില 78,670.66 രൂപ + 4,441.10 രൂപ = 83,111.76 രൂപയായിരിക്കും. ഇതിന് 3% ജിഎസ്ടി ഈടാക്കും. ഇത് 2,493.35 രൂപയായിരിക്കും. അന്തിമ ബില്ലിംഗ് തുക 83,111.76 രൂപ + 2,493.35 രൂപ + 45 രൂപ (ഹാള്‍മാര്‍ക്കിംഗ് ചാര്‍ജുകള്‍ക്ക്) = 85,650 രൂപയായിരിക്കും.

ആഭരണങ്ങളില്‍ ഘടിപ്പിച്ചിരിക്കുന്ന കല്ല്

വജ്രമോ മറ്റ് രത്‌നക്കല്ലുകളോ ഘടിപ്പിച്ച സ്വര്‍ണ്ണാഭരണങ്ങള്‍ വാങ്ങുമ്പോള്‍ ഇതിന്റെ വില കൂടി ഉള്‍പെടും. അതേസമയം, ഇത്തരം ആഭരണങ്ങള്‍ വാങ്ങുമ്പോള്‍ സ്വര്‍ണ്ണത്തിന്റെയും വജ്രത്തിന്റെയും/കല്ലിന്റെയും വില വെവ്വേറെ തൂക്കിയിട്ടുണ്ടെന്ന് ഉറപ്പാക്കണം. ഇത്തരം ആഭരണം വില്‍ക്കാനോ കൈമാറ്റം ചെയ്യാനോ ആഗ്രഹിക്കുമ്പോള്‍ സ്വര്‍ണ്ണത്തിന്റെ മൂല്യം മാത്രമേ പരിഗണിക്കുകയുള്ളു. 

സ്വര്‍ണ്ണാഭരണങ്ങളുടെ പരിശുദ്ധി ഉറപ്പു വരുത്തുക
ഏറെ പ്രധാനമാണ് സ്വര്‍ണ്ണത്തിന്റെ പരിശുദ്ധി. സ്വര്‍ണ്ണത്തിന്റെ വില വാങ്ങുന്ന സ്വര്‍ണ്ണത്തിന്റെ പരിശുദ്ധിയുമായി പൊരുത്തപ്പെടുന്നുണ്ടെന്ന് ഉപഭോക്താവ് ഉറപ്പാക്കേണ്ടതാണ്. അതായത് 18 കാരറ്റ് സ്വര്‍ണ്ണമാണ് വാങ്ങുന്നതെങ്കില്‍ അതിന്റെ വില 22 കാരറ്റ് സ്വര്‍ണ്ണത്തിന്റെ വിലയേക്കാള്‍ കുറവായിരിക്കണം. സാധാരണയായി 22 കാരറ്റ്, 18 കാരറ്റ്, 14 കാരറ്റ് എന്നീ പരിശുദ്ധിയില്‍ ആണ് സ്വര്‍ണ്ണാഭരണങ്ങള്‍ നിര്‍മിക്കാറുള്ളത്. ചില ആഭരണ വ്യാപാരികള്‍ 20 കാറ്റ് സ്വര്‍ണ്ണാഭരണങ്ങളും വില്‍ക്കുന്നുണ്ട്. 

ഹാള്‍മാര്‍ക്കിംഗ്
2023 ഏപ്രില്‍ 1 മുതല്‍, ജ്വല്ലറികള്‍ ആറക്ക എച്ച് യു.ഐ.ഡി കോഡ് ഉള്ള സ്വര്‍ണ്ണാഭരണങ്ങളെ വില്‍ക്കാന്‍ പാടുള്ളൂ എന്ന് കേന്ദ്രം നിര്‍ദേശിച്ചിട്ടുണ്ട്. നിലവില്‍, ഹാള്‍മാര്‍ക്ക് ചെയ്ത സ്വര്‍ണ്ണത്തിന് മൂന്ന് അടയാളങ്ങള്‍ ഉണ്ടായിരിക്കണം. ബി.ഐ.എസ് ലോഗോ, പരിശുദ്ധിയും സൂക്ഷ്മതാ ഗ്രേഡും, ആറക്ക അദ്വിതീയ ആല്‍ഫാന്യൂമെറിക് കോഡും. ഉപഭോക്താക്കള്‍ക്ക് ബി.ഐ.എസ് കെയര്‍ ആപ്പില്‍ എച്ച്.യു.ഐ.ഡി കോഡ് പരിശോധിക്കാന്‍ കഴിയും.

ആഭരണത്തിന്റെ ബില്‍
ബ്യൂറോ ഓഫ് ഇന്ത്യന്‍ സ്റ്റാന്‍ഡേര്‍ഡ്സ് ഉപഭോക്താക്കളോട് ആഭരണ വ്യാപാരിയില്‍ നിന്ന് ഹാള്‍മാര്‍ക്ക് ചെയ്ത സ്വര്‍ണാഭരണങ്ങളുടെ ആധികാരിക ബില്ലുകളും ഇന്‍വോയ്സുകളും ചോദിച്ച് വാങ്ങണം എന്ന് ആവശ്യപ്പെടുന്നു. ഹാള്‍മാര്‍ക്ക് ചെയ്ത വസ്തുവിന്റെ യഥാര്‍ത്ഥ ബില്ലുകള്‍/ഇന്‍വോയ്സുകള്‍ ചില്ലറ വ്യാപാരിയില്‍ നിന്ന്/ആഭരണ വ്യാപാരിയില്‍ നിന്ന് എടുക്കേണ്ടത് ആവശ്യമാണ്.

ഏതെങ്കിലും തര്‍ക്കം/ദുരുപയോഗം/പരാതി പരിഹാരത്തിനായി ജ്വല്ലറി/റീട്ടെയിലര്‍ നല്‍കുന്ന ബില്ലിലോ ഇന്‍വോയ്സിലോ ഹാള്‍മാര്‍ക്ക് ചെയ്ത വസ്തുക്കളുടെ വിശദാംശങ്ങള്‍ ഉണ്ടായിരിക്കേണ്ടത് ആവശ്യമാണ് എന്ന് ബിഐഎസ് പറയുന്നു. സ്വര്‍ണ്ണാഭരണങ്ങളില്‍ വജ്രങ്ങളോ മറ്റ് രത്നക്കല്ലുകളോ ഉണ്ടെങ്കില്‍, കല്ലിന്റെ വില ബില്ലില്‍ പ്രത്യേകം പ്രതിഫലിപ്പിക്കണം.

ജ്വല്ലറിയുടെ എക്സ്ചേഞ്ച് നയങ്ങള്‍
പഴയ സ്വര്‍ണ്ണാഭരണങ്ങള്‍ പുതിയവക്ക് പകരം കൈമാറ്റം ചെയ്യുന്നത് സാധാരണമാണ്. പുതിയ സ്വര്‍ണ്ണാഭരണങ്ങള്‍ വാങ്ങുമ്പോള്‍, ജ്വല്ലറിയുടെ എക്സ്ചേഞ്ച് നയങ്ങള്‍ മനസ്സിലാക്കണം. ആഭരണത്തിലെ വജ്രത്തിനോ രത്നത്തിനോ പുനര്‍വില്‍പനാ മൂല്യമുണ്ടോ എന്നും അറിയേണ്ടതാണ്. 

Gold prices in Kerala are nearing record highs as the wedding season boosts demand.