ന്യൂഡൽഹി: ഇന്ത്യ-പാകിസ്ഥാൻ സംഘർഷ സാധ്യത ഉയർന്ന സാഹചര്യത്തിൽ സംസ്ഥാനങ്ങൾക്ക് മുന്നറിയിപ്പുമായി കേന്ദ്ര സർക്കാർ. പഹൽഗാമിൽ ഏപ്രിൽ 22-ന് നടന്ന ഭീകരാക്രമണത്തിൽ 26 പേർ കൊല്ലപ്പെട്ടതിന് പിന്നാലെ ഇന്ത്യ-പാകിസ്ഥാന്റ്റെ ബന്ധം കൂടുതൽ വഷളായിരിക്കുകയാണ്. സംഭവത്തിനുശേഷം ഇന്ത്യ നയതന്ത്ര നിലപാട് കടുപ്പിച്ചതിനിടെയാണ് കേന്ദ്ര ആഭ്യന്തര മന്ത്രാലയത്തിന്റെ പുതിയ നിർദ്ദേശങ്ങൾ.

1971-ലെ ഇന്ത്യ-പാക് യുദ്ധം നടക്കുമ്പോഴുണ്ടായ അതേ രീതിയിൽ മുന്നറിയിപ്പുകളും സുരക്ഷാ നടപടികളും ഈ ഘട്ടത്തിൽ കേന്ദ്രം ആവിഷ്‌ക്കരിക്കുന്നതായി അധികൃതർ വ്യക്തമാക്കി. വ്യോമാക്രമണ സാധ്യത കണക്കിലെടുത്ത് ചില സംസ്ഥാനങ്ങളിൽ മുന്നറിയിപ്പ് സൈറൺ സംവിധാനങ്ങൾ സ്ഥാപിക്കാനുള്ള നിർദ്ദേശം കേന്ദ്ര ആഭ്യന്തര മന്ത്രാലയം നൽകിയിട്ടുണ്ട്.

പൊതുജനങ്ങൾക്കും വിദ്യാർത്ഥികൾക്കുമിടയിൽ അവബോധം വളർത്താനും ആക്രമണങ്ങൾക്കു നേരെ പ്രതികരിക്കാൻ പരിശീലനം നൽകാനും സംസ്ഥാന സർക്കാരുകൾക്ക് നിർദ്ദേശം നൽകിയിട്ടുണ്ട്. അതിനോടൊപ്പം ഒഴിപ്പിക്കൽ നടപടികൾക്കായുള്ള റിഹേഴ്സലുകളും നിർബന്ധമാക്കുന്നു. മേയ് 7 ബുധനാഴ്ച മോക്ക്ഡ്രില്ലുകൾ സംസ്ഥാനത്ത് നടത്തണമെന്നാണു നിർദേശം.

അതിനിടെ, നിയന്ത്രണ രേഖയിൽ പാകിസ്ഥാന്റെ പ്രകോപന നടപടികൾ തുടരുകയാണ്. തുടർച്ചയായ 11-ാം ദിവസമാണ് പാക് സൈന്യം വെടിനിരുത്തൽ കരാർ ലംഘിക്കുന്നത്. കഴിഞ്ഞ രാത്രി പാക് സൈന്യം ഇന്ത്യൻ പോസ്റ്റുകൾക്ക് നേരെ വെടിയുതിർക്കുകയും ഇന്ത്യ ശക്തമായി തിരിച്ചടിക്കുകയും ചെയ്തു.

കുപ്‍വാര, ബാരാമുള്ള, പൂഞ്ച്, രജൗരി, മെന്ദാർ, നൗഷേര, സുന്ദർബാനി, അഖ്‌നൂർ എന്നിവയുൾപ്പെടെയുള്ള മേഖലയിലാണ് വെടിവെപ്പ് നടന്നത്. അതിർത്തിയിലെ സ്ഥിതിഗതികൾ അതീവ ജാഗ്രതാപൂർവമാണ്, സുരക്ഷാ ഏജൻസികൾ ശക്തമായ നിരീക്ഷണത്തിലാണ്.

India-Pakistan conflict likely Warning siren mock drill Centre instructs states