ചെന്നൈ: ഇന്ത്യൻ യുവതാരം ഉർവിൽ പട്ടേലിനെ സ്വന്തമാക്കി ചെന്നൈ സൂപ്പർ കിങ്‌സ്. പരുക്കേറ്റ വൻഷ് ബേദിക്ക് പകരക്കാരനായാണ് യുവ വിക്കറ്റ് കീപ്പർ ബാറ്ററായ ഉർവിൻ ചെന്നൈ ടീമിലെത്തിയത്. കണങ്കാലിലെ ലിഗമെന്റ് പൊട്ടൽ ഉണ്ടായതിന് പിന്നാലെയാണ് ബേദി ഐപിഎല്ലിൽ നിന്നും പുറത്തായത്. മെഗാ ലേലത്തിൽ 55 ലക്ഷം തുകക്കായിരുന്നു ബേദിയെ ചെന്നൈ സ്വന്തമാക്കിയിരുന്നത്. താരം ഈ സീസണിൽ സിഎസ്കെക്ക് വേണ്ടി ഒരു മത്സരം പോലും കളിച്ചിരുന്നില്ല. ഉർവിൽ പട്ടേലിനെ അടിസ്ഥാന വിലയായ 30 ലക്ഷം രൂപയ്ക്കാണ് ചെന്നൈ സ്വന്തമാക്കിയത്. 

ആഭ്യന്തര ക്രിക്കറ്റിൽ മികച്ച ബാറ്റിംഗ് റെക്കോർഡുള്ള താരമാണ് ഉർവിൽ. 47 മത്സരങ്ങളിൽ നിന്നും  രണ്ട് സെഞ്ച്വറികളും നാല് അർദ്ധ സെഞ്ച്വറികളും ഉൾപ്പടെ 1162 റൺസാണ് താരം നേടിയത്. 26.40 ശരാശരിയും 170.38 സ്ട്രൈക്ക് റേറ്റുമാണ് താരത്തിനുള്ളത്. ടി-20 ചരിത്രത്തിലെ ഏറ്റവും വേഗതയേറിയ രണ്ടാമത്തെ സെഞ്ച്വറി നേടിയ ഇന്ത്യൻ താരം കൂടിയാണ് ഉർവിൽ പട്ടേൽ. സയ്യിദ് മുഷ്താഖ് അലി ട്രോഫിയിൽ ഗുജറാത്തിനു വേണ്ടി 28 പന്തിൽ നിന്നുമാണ് താരം സെഞ്ച്വറി നേടിയത്. ഇത്ര പന്തിൽ നിന്നും ടി20 സെഞ്ച്വറി നേടിയ അഭിഷേക് ശർമയുടെ റെക്കോർഡിനൊപ്പവും ഉർവിൽ പട്ടേൽ തന്റെ പേര് എഴുതി ചേർത്തിട്ടുണ്ട്.

ആയുഷ് മാത്രെ, ഡെവാൾഡ് ബ്രെവിസ് എന്നിവർക്ക് ശേഷം ചെന്നൈ ടീമിൽ എത്തിക്കുന്ന മൂന്നാമത്തെ താരം കൂടിയാണ് ഉർവിൽ. മാത്രെയും ബ്രെവിസും പ്ലെയിംഗ് ഇലവനിൽ ഇടം നേടുകയും മികച്ച പ്രകടനങ്ങൾ പുറത്തെടുക്കുകയും ചെയ്തിരുന്നു. 

ഈ സീസണിൽ ചെന്നൈ നിരാശാജനകമായ പ്രകടനങ്ങളാണ് പുറത്തെടുത്തത്. ടൂർണമെന്റിൽ നിന്നും ചെന്നൈ നേരത്തെ പുറത്തായിരുന്നു. പഞ്ചാബ് കിങ്സിനോടേറ്റ പരാജയത്തിന് പിന്നാലെയാണ്  ചെന്നൈ ഐപിഎല്ലിൽ നിന്നും പുറത്തായത്. 11 മത്സരങ്ങളിൽ നിന്നും രണ്ട് ജയവും ഒമ്പത് തോൽവിയും അടക്കം നാല് പോയിന്റുമായി അവസാന സ്ഥാനത്താണ് ചെന്നൈ. അതുകൊണ്ടുതന്നെ ഇനിയുള്ള മത്സരങ്ങൾ എല്ലാം വിജയിച്ചു കൊണ്ട് തലയുയർത്തി മടങ്ങാൻ തന്നെയായിരിക്കും ധോണിയും സംഘവും കളത്തിൽ ഇറങ്ങുക. 

Chennai Super Kings acquire young Indian player Urvil Patel