പത്തനംതിട്ട: കോണ്‍ഗ്രസ് നേതൃത്വത്തിനെതിരെ രൂക്ഷ വിമര്‍ശനവുമായി യൂത്ത് കോണ്‍ഗ്രസ് പ്രസിഡന്റും, എംഎല്‍എയുമായ രാഹുല്‍ മാങ്കൂട്ടത്തില്‍. കോണ്‍ഗ്രസ് പുനസംഘടനയുമായി ബന്ധപ്പെട്ട വിവാദങ്ങള്‍ക്കിടെയാണ് മുതിര്‍ന്ന നേതാക്കള്‍ക്കെതിരെ ആഞ്ഞടിച്ച് യൂത്ത് കോണ്‍ഗ്രസ് രംഗത്തെത്തിയത്. യുവനേതാക്കള്‍ കാണിക്കുന്ന പക്വത മുതിര്‍ന്ന നേതാക്കള്‍ കാണിക്കണമെന്ന് പത്തനംതിട്ടയില്‍ നടത്തിയ വാര്‍ത്താ സമ്മേളനത്തില്‍ രാഹുല്‍ മാങ്കൂട്ടത്തില്‍ പറഞ്ഞു. 

'ഞങ്ങള്‍ മിണ്ടാതിരിക്കുന്നത് അത് താങ്ങാനുള്ള കെല്‍പ് പാര്‍ട്ടിക്കില്ലാത്തത് കൊണ്ടാണ്. കഴിഞ്ഞ 10 വര്‍ഷമായി പാര്‍ട്ടിയിലെ യുവാക്കള്‍ കാണിക്കുന്ന പക്വതയും പാകതയും തലയെടുപ്പുള്ള മുതിര്‍ന്ന നേതാക്കള്‍ കാണിക്കണം. സാധാരണ പ്രവര്‍ത്തകന്റെ ആത്മവിശ്വാസം തകര്‍ക്കരുത്. ദിവസവും രാവിലെ മാധ്യമങ്ങളിലും സമൂഹമാധ്യമങ്ങളിലും പാര്‍ട്ടിയെ കുറിച്ച് വരുന്ന വാര്‍ത്തകള്‍ നാണക്കേടാണ്. നേതൃത്വം ഇടപെട്ട് അനിശ്ചിതത്വം മാറ്റണം. നേതൃത്വം തുടരുമോ ഇല്ലേ എന്നതില്‍ വ്യക്തത വരുത്തണം. എങ്കില്‍ മാത്രമേ തുടരുന്നവര്‍ക്ക് ആത്മവിശ്വാസത്തോടെ പ്രവര്‍ത്തിക്കാന്‍ കഴിയൂ,' എംഎല്‍എ പറഞ്ഞു. 

വരാനിരിക്കുന്ന പഞ്ചായത്ത് തെരഞ്ഞെടുപ്പ് പാര്‍ട്ടി ഗൗരവത്തോടെ കാണണമെന്നും, കോണ്‍ഗ്രസ് അധികാരത്തില്‍ വരാനാണ് ജനങ്ങള്‍ ആഗ്രഹിക്കുന്നതെന്നും രാഹുല്‍ മാങ്കൂട്ടത്തില്‍ കൂട്ടിച്ചേര്‍ത്തു. 

'വരാന്‍ പോകുന്നത് അങ്കണവാടി ക്ലാസ് ലീഡറുടെ തെരഞ്ഞെടുപ്പല്ലെന്നും പഞ്ചായത്ത് തെരഞ്ഞെടുപ്പാണെന്നും ഓര്‍ക്കണം. മുതിര്‍ന്ന നേതാക്കള്‍ ഉത്തരവാദിത്വം കാട്ടണം. കോണ്‍ഗ്രസ് അധികാരത്തില്‍ വരാന്‍ ജനങ്ങള്‍ ആഗ്രഹിക്കുന്നുണ്ട്. അത് നടക്കാതെ പോകുന്നത് ജനങ്ങളോടുള്ള വെല്ലുവിളിയാണ്. കേന്ദ്രസംസ്ഥാന സര്‍ക്കാറുകള്‍ക്കെതിരായ കാര്യങ്ങള്‍ ചര്‍ച്ചയാകണം. പുനസംഘടനയില്‍ എന്തിനാണിത്ര അനിശ്ചിതത്വം? പാര്‍ട്ടി ഹൈകമാന്‍ഡിനറിയാം ആരെ മാറ്റണം ആരെ നിലനിര്‍ത്തണം എന്ന്. ഒരു നേതാക്കളുടെയും പേര് പറയാനില്ല. പുതു തലമുറ കാണിക്കുന്ന അച്ചടക്കം മുതിര്‍ന്ന നേതാക്കള്‍ക്കില്ല. പാര്‍ട്ടി പ്രവര്‍ത്തകരുടെ വേദനയാണ് പങ്കുവെക്കുന്നത്,' രാഹുല്‍ മാങ്കൂട്ടം പറഞ്ഞു. 

rahul mamkoottathil slams congress leaders amid kpcc