കണ്ണൂർ: കണ്ണൂർ സർവകലാശാലയിൽ നടന്ന ചോദ്യപേപ്പർ ചോർച്ചയിൽ കോളേജിനെതിരെയും അധ്യാപകനെതിരെയും നടപടി. ഇതുപ്രകാരം കാസർഗോഡിലെ പാലക്കുന്ന് ഗ്രീൻവുഡ് കോളേജിന് അടുത്ത വർഷം മുതൽ അംഗീകാരം നൽകുകയില്ല. പരീക്ഷകളുടെ ചോദ്യം ചോർത്തി നൽകിയ അധ്യാപകനെ പരീക്ഷകളുടെ ചുമതലകളിൽ നിന്ന് അഞ്ച് വർഷത്തേക്ക് വിലക്കുകയും ചെയ്തു. സംഭവത്തിൽ കോളേജ് മാനേജ്മെന്റ് ഒന്നര ലക്ഷം രൂപ പിഴയും അടക്കണം. കണ്ണൂർ സർവ്വകലാശാല സിൻഡിക്കേറ്റ് യോഗത്തിൽ ഉപസമിതിയുടെ ശിപാർശ പ്രകാരം ചോദ്യപേപ്പർ ചോർന്ന പരീക്ഷകൾ വീണ്ടും നടത്തുമെന്നും തീരുമാനമായി. 

കണ്ണൂർ സർവ്വകലാശാല നടത്തിയ ബി സി ആറാം സെമസ്റ്റർ പരീക്ഷയുടെ ചോദ്യപേപ്പർ ആയിരുന്നു ചോർന്നത്. ചോദ്യം പേപ്പർ ചോർന്ന സംഭവത്തിൽ പാലക്കുന്നിലെ ഗ്രീൻവുഡ് ആർട്സ് ആൻഡ് സയൻസ് കോളേജ് പ്രിൻസിപ്പൽ പി അജീഷിനെ സസ്‌പെൻഡ് ചെയ്തിരുന്നു. സംഭവത്തിന് പിന്നാലെ കണ്ണൂർ യൂണിവേഴ്സിറ്റി നൽകിയ പരാതിയിൽ   
 കോളേജ് പ്രിൻസിപ്പലിനെതിരെ പൊലിസ് കേസ് എടുത്തിരുന്നു. 

പരീക്ഷയുടെ ചോദ്യപേപ്പർ വാട്സ്ആപ്പ് വഴിയാണ് ചോർന്നിരുന്നത്. മാർച്ച് 18 മുതൽ ഏപ്രിൽ രണ്ട് വരെയായിരുന്നു പരീക്ഷ ഉണ്ടായിരുന്നത് ഏപ്രിൽ രണ്ടിന് നടന്ന അവസാന പരീക്ഷയിൽ സർവ്വകലാശാലയിലെ സ്‌ക്വാഡ് നടത്തിയ പരിശോധനയിലാണ് പരീക്ഷയുടെ ചോദ്യപേപ്പർ ചോർച്ച കണ്ടെത്തിയത്. തുടർന്നുള്ള അന്വേഷണത്തിലാണ് അധ്യാപകരാണ് ചോദ്യപേപ്പർ ചോർത്തിയത് എന്ന വിവരം കണ്ടെത്തിയത്. 

Kannur University question paper leak action against college and teacher