കുവൈത്ത് സിറ്റി: കുവൈത്തില്‍ ഉണ്ടായ ശക്തമായ പൊടിക്കാറ്റ് വിമാന സര്‍വിസുകളെ ബാധിച്ചു. ഇന്നലെ വൈകുന്നേരത്തോടെ ഉണ്ടായ കനത്ത കാറ്റിനെ തുടര്‍ന്ന് കുവൈത്ത് അന്താരാഷ്ട്ര വിമാനത്താവളത്തില്‍ നിന്ന് മൂന്ന് വിമാനങ്ങള്‍ സഊദി അറേബ്യയിലെ ദമ്മാം വിമാനത്താവളത്തിലേക്ക് വഴിതിരിച്ചുവിട്ടു. കാറ്റിനെത്തുടര്‍ന്ന് വിമാനത്താവളത്തിലെ ദൃശ്യപരത കുറഞ്ഞതാണ് വിമാനങ്ങള്‍ വഴി തിരിച്ചു വിടാന്‍ കാരണം.

എയര്‍ നാവിഗേഷന്‍ വകുപ്പ് ഡയറക്ടര്‍ ദാവൂദ് അല്‍ ജറാ വ്യക്തമാക്കിയത് പ്രകാരം, മോശം കാലാവസ്ഥയുടെ പശ്ചാത്തലത്തില്‍ യാത്രക്കാരുടെയും വിമാനങ്ങളുടെയും സുരക്ഷ ഉറപ്പാക്കാന്‍ അന്താരാഷ്ട്ര സുരക്ഷാ മാനദണ്ഡങ്ങള്‍ പാലിച്ചുകൊണ്ട് എല്ലാ മുന്‍കരുതല്‍ നടപടികളും സ്വീകരിച്ചിട്ടുണ്ട്. ദൃശ്യപരത 300 മീറ്ററില്‍ താഴെയായതിനാല്‍ അസ്യൂട്ട്, കെയ്‌റോ എന്നിവിടങ്ങളില്‍ നിന്നുള്ള രണ്ട് എയര്‍ കെയ്‌റോ വിമാനങ്ങളും ഡല്‍ഹിയില്‍ നിന്നുള്ള ഒരു ഇന്‍ഡിഗോ വിമാനവും ദമ്മാമിലേക്ക് വഴി തിരിച്ചുവിട്ടു അതേസമയം, പൊടിക്കാറ്റ് ഉണ്ടായിരുന്നിട്ടും മറ്റ് ഷെഡ്യൂള്‍ ചെയ്ത വിമാനങ്ങള്‍ക്ക് കുവൈത്ത് വിമാനത്താവളത്തില്‍ സുരക്ഷിതമായി ലാന്‍ഡ് ചെയ്യാന്‍ കഴിഞ്ഞു.

തുറമുഖങ്ങളുടെ പ്രവർത്തനം നിർത്തിവച്ചു

കാലാവസ്ഥ മോശമായതിനെത്തുടർന്ന് ഷുവൈഖ്, ഷുഐബ തുറമുഖങ്ങളിലെ പ്രവർത്തനങ്ങൾ താൽക്കാലികമായി നിർത്തിവച്ചതായി കുവൈത്ത് തുറമുഖ അതോറിറ്റി (കെപിഎ) പ്രഖ്യാപിച്ചു. മണിക്കൂറിൽ 82 കിലോമീറ്റർ വേഗതയിൽ കാറ്റ് വീശുകയും ദൃശ്യപരത കുത്തനെ കുറയുകയും ചെയ്തതിനാൽ തുറമുഖ തൊഴിലാളികളുടെയും അടിസ്ഥാന സൗകര്യങ്ങളുടെയും സംരക്ഷണത്തിന്റെ ഭാ​ഗമായാണ് നടപടികൾ.

A severe sandstorm in Kuwait has forced authorities to divert flights and temporarily shut down ports. The adverse weather conditions have disrupted travel and operations, with reduced visibility posing risks across the region. Stay updated on the latest developments.