ഹൈദരാബാദ്: ഐപിഎല്ലിൽ ഡൽഹി ക്യാപ്പിറ്റൽസിനെതിരെ മിന്നും ബൗളിംഗ് പ്രകടനവുമായി സൺറൈസേഴ്‌സ് ഹൈദരാബാദ് നായകൻ പാറ്റ് കമ്മിൻസ്. മത്സരത്തിൽ മൂന്ന് വിക്കറ്റുകൾ നേടിയാണ് ഹൈദരാബാദ് ക്യാപ്റ്റൻ തിളങ്ങിയത്. നാല് ഓവറിൽ വെറും 19 റൺസ് വിട്ടുനൽകിയാണ് കമ്മിൻസ് മൂന്ന് വിക്കറ്റുകൾ നേടിയത്. പവർപ്ലേയിലാണ് കമ്മിൻസ് ഈ മൂന്ന് വിക്കറ്റുകളും വീഴ്ത്തിയത്.

കരുൺ നായർ, ഫാഫ് ഡുപ്ലെസിസ്, അഭിഷേക് പോരൽ എന്നിവരെയാണ് കമ്മിൻസ് പുറത്താക്കിയത്. ഇതോടെ ഐപിഎൽ ചരിത്രത്തിൽ പവർപ്ലേയിൽ മൂന്ന് വിക്കറ്റുകൾ സ്വന്തമാക്കുന്ന ആദ്യത്തെ ക്യാപ്റ്റനായി മാറാനും കമ്മിൻസിന് സാധിച്ചു. ഐപിഎല്ലിൽ മറ്റൊരു ക്യാപ്റ്റനും രണ്ടിൽ കൂടുതൽ വിക്കറ്റുകൾ പവർ പ്ലേയിൽ നേടാൻ സാധിച്ചിട്ടില്ല. 

ഹൈദരാബാദ് ബൗളിങ്ങിൽ കമ്മിൻസിന് പുറമെ എഷാൻ മലിംഗ, ജയ്‌ദേവ് ഉനദ്കട്ട്, ഹർഷൻ പട്ടേൽ എന്നിവർ ഓരോ വിക്കറ്റും നേടി. ആദ്യം ബാറ്റ് ചെയ്ത ഡൽഹി ഏഴു വിക്കറ്റ് നഷ്ടത്തിൽ 133 റൺസാണ് നേടിയത്. അശുതോഷ് ശർമ്മ, ട്രിസ്റ്റൺ സ്റ്റബ്സ് എന്നിവർ മാത്രമാണ് ഡൽഹി നിരയിൽ പിടിച്ചു നിന്നത്. ഇരുവരും 41 റൺസാണ് നേടിയത്. രണ്ട് ഫോറുകളും മൂന്ന് സിക്സുകളും ഉൾപ്പെടെയാണ് അശുതോഷ് 41 റൺസ് നേടിയത്. നാല് ഫോറുകൾ അടങ്ങുന്നതായിരുന്നു സ്റ്റബ്സിന്റെ ഇന്നിംഗ്സ്. 

ഡൽഹി ക്യാപ്പിറ്റൽസ് പ്ലെയിങ് ഇലവൻ

ഫാഫ് ഡു പ്ലെസിസ്, അഭിഷേക് പോറെൽ, കരുണ് നായർ, കെ എൽ രാഹുൽ(വിക്കറ്റ് കീപ്പർ), അക്സർ പട്ടേൽ(ക്യാപ്റ്റൻ), ട്രിസ്റ്റൻ സ്റ്റബ്സ്, വിപ്രജ് നിഗം, മിച്ചൽ സ്റ്റാർക്ക്, ദുഷ്മന്ത ചമീര, കുൽദീപ് യാദവ്, ടി നടരാജൻ.

സൺറൈസേഴ്‌സ് ഹൈദരാബാദ് പ്ലെയിങ് ഇലവൻ

അഭിഷേക് ശർമ്മ, ഇഷാൻ കിഷൻ(വിക്കറ്റ് കീപ്പർ), സച്ചിൻ ബേബി, ഹെൻറിച്ച് ക്ലാസൻ, അനികേത് വർമ്മ, അഭിനവ് മനോഹർ, പാറ്റ് കമ്മിൻസ്(ക്യാപ്റ്റൻ), ഹർഷൽ പട്ടേൽ, ജയ്ദേവ് ഉനദ്കട്ട്, സീഷൻ അൻസാരി, ഇഷാൻ മലിംഗ.

pat cummins create a rare record in IPL History