ഭോപ്പാൽ: അഹ്മദാബാദ്-കൊൽക്കത്ത എക്സ്പ്രസ് ട്രെയിനിലെ ശുചിമുറിയിൽ നിന്ന് യുവാവിന്റെ മൃതദേഹം കണ്ടെത്തി. മദ്ധ്യപ്രദേശിലെ സാഗർ റെയിൽവേ സ്റ്റേഷനിൽ എത്തുന്നതിന് തൊട്ടുമുമ്പാണ്, ഒരു യാത്രക്കാരൻ ശുചിമുറിയിൽ നിന്ന് മൃതദേഹം കണ്ടെത്തിയത്. ട്രെയിനിന്റെ പിൻഭാഗത്തുള്ള ജനറൽ കോച്ചിലെ ശുചിമുറിയിൽ നിന്നാണ് മൃതദേഹം കണ്ടെത്തിയത്. 

ട്രെയിൻ ബിന ജംഗ്ഷൻ കടന്ന് സാഗറിൽ എത്തുന്നതിന് മുമ്പ്, ഒരു യാത്രക്കാരൻ ശുചിമുറി ഉപയോ​ഗിക്കാൻ ശ്രമിച്ചപ്പോഴായിരുന്നു അകത്ത് മൃതദേഹം കണ്ടെത്തിയത്. വിവരം ഉടൻ ടിടിഇയെ അറിയിച്ചു. ടിടിഇ സംഭവം ട്രെയിൻ മാനേജർക്കും സംസ്ഥാന റെയിൽവേ പൊലിസിലും റിപ്പോർട്ട് ചെയ്തു.

ഉച്ചയ്ക്ക് 2:10ന് ട്രെയിൻ സാഗർ സ്റ്റേഷനിൽ എത്തിയപ്പോൾ, സംസ്ഥാന റെയിൽവേ പൊലിസും റെയിൽവേ സംരക്ഷണ സേനയും കോച്ചിൽ പരിശോധന നടത്തി. മൃതദേഹം ട്രെയിനിൽ നിന്ന് ഇറക്കിയ ശേഷം ഫോറൻസിക് ടീം തെളിവുകൾ ശേഖരിച്ചു. മരിച്ചയാൾക്ക് 30-35 വയസ് പ്രായം വരുമെന്ന് കണ്ടെത്തി. എന്നാൽ, ഇതുവരെ മൃതദേഹം, തിരിച്ചറിയാൻ കഴിഞ്ഞിട്ടില്ല.

മൃതദേഹം പരിശോധിച്ചപ്പോൾ തിരിച്ചറിയൽ രേഖകളോ യാത്രാ ടിക്കറ്റോ ലഭിച്ചിട്ടില്ലെന്ന് പൊലിസ് പറയുന്നു. സംഭവത്തെ തുടർന്ന്, റെയിൽവേ പൊലിസ് അയൽപ്രദേശങ്ങളിലെ പൊലിസ് സ്റ്റേഷനുകളിലേക്കും റെയിൽവേ സ്റ്റേഷനുകളിലേക്കും വിവരങ്ങൾ അയച്ചു. ഒരു മണിക്കൂർ സാഗർ സ്റ്റേഷനിൽ പിടിച്ചിട്ട ശേഷം ട്രെയിൻ യാത്ര തുടർന്നു.

A young man was found dead in the toilet of the Ahmedabad-Kolkata Express train. Authorities are investigating the circumstances surrounding the incident. Further details are awaited as officials work to determine the cause of death.