പാകിസ്ഥാൻ കടുത്ത ആഭ്യന്തര പ്രതിസന്ധിയെ നേരിടുകയാണ്. ബലൂജ് ലിബറേഷൻ ആർമി (ബിഎൽഎ) രാജ്യവ്യാപകമായി സർക്കാർ, സൈനിക കേന്ദ്രങ്ങൾ ലക്ഷ്യമിട്ട് ആക്രമണങ്ങൾ ശക്തമാക്കിയിരിക്കുന്നു. പോലീസ് സ്റ്റേഷനുകളും സർക്കാർ ഓഫീസുകളും ഉൾപ്പെടെ ചില കേന്ദ്രങ്ങൾ പിടിച്ചെടുക്കുകയും ചെയ്തിട്ടുണ്ട്. ബലൂചിസ്ഥാന്റെ സ്വാതന്ത്ര്യത്തിനായി പോരാടുന്ന സംഘടന, പാകിസ്ഥാൻ സർക്കാർ പ്രദേശത്തെ ചൂഷണം ചെയ്യുകയും മനുഷ്യാവകാശ ലംഘനങ്ങൾ നടത്തുകയും ചെയ്യുന്നുവെന്ന് ആരോപിക്കുന്നു.

ആക്രമണങ്ങളിൽ വൻനാശമാണ് റിപ്പോർട്ട് ചെയ്തിരിക്കുന്നത്. ഒരു ആക്രമണത്തിൽ 14 സൈനിക ഉദ്യോഗസ്ഥർ കൊല്ലപ്പെട്ടു. ബോലനിലും കെച്ചിലും ഉൾപ്പെടെ ബിഎൽഎയുടെ സ്പെഷ്യൽ ടാക്ടിക്കൽ ഓപ്പറേഷൻ സ്ക്വാഡ് റിമോട്ട് കൺട്രോൾ ബോംബുകൾ ഉൾപ്പെടെയുള്ള തന്ത്രങ്ങൾ ഉപയോഗിക്കുന്നു. പാകിസ്ഥാൻ സൈന്യത്തെ ബലൂചിസ്ഥാനിൽ നിന്ന് പുറത്താക്കാനുള്ള പോരാട്ടമാണ് തങ്ങളുടെ ലക്ഷ്യമെന്ന് ബിഎൽഎ നേതൃത്വം വ്യക്തമാക്കുന്നു.

അതിനിടെ, രാഷ്ട്രീയ അസ്വസ്ഥതയും വർധിക്കുന്നു. ജയിലിൽ കഴിയുന്ന മുൻ പ്രധാനമന്ത്രി ഇംറാൻ ഖാന്റെ മോചനം ആവശ്യപ്പെട്ട് പാകിസ്ഥാൻ തെഹ്‌രീക്-ഇ-ഇൻസാഫ് (പിടിഐ) നടത്തുന്ന പ്രതിഷേധം ശക്തമാണ്. ബിഎൽഎയുടെ ആക്രമണങ്ങളും പിടിഐയുടെ പ്രക്ഷോഭവും പാകിസ്ഥാൻ ഭരണകൂടത്തെ വലിയ പ്രതിസന്ധിയിലാക്കിയിരിക്കുകയാണ്. ബിഎൽഎയുടെ ആവശ്യങ്ങൾ അംഗീകരിക്കാതെയും ഇംറാൻ ഖാന്റെ മോചനം നിഷേധിച്ചും സർക്കാർ മുന്നോട്ടുപോകുന്നു.