ഡൽഹി: കഠിനമായ ചൂടിന് പിന്നാലെ രാജ്യത്ത് രണ്ട് പതിറ്റാണ്ടിനിടെ മരണപ്പെട്ടത് 34,000ത്തിലധികം ആളുകളെന്ന് പഠനം. കടുത്ത ചൂട് മാത്രമല്ല കടുത്ത തണുപ്പും നിരവധി മരണങ്ങൾ ഉണ്ടാവാൻ കാരണമായിട്ടുണ്ട്. 2001 മുതൽ 2019 വരെയുള്ള വർഷണളിലെ കണക്കുകളാണ് പുറത്തുവന്നത്. ഇന്ത്യൻ കാലാവസ്ഥ വകുപ്പ്, നാഷണൽ ക്രൈം റെക്കോർഡ്‌സ് ബ്യൂറോയുടെയും ഡാറ്റകൾ പരിശോധിച്ചാണ് ഒപി ജിൻഡാൽ ഗ്ലോബൽ യൂണിവേഴ്സിറ്റിയിലെ ഗവേഷകർ പഠനം നടത്തിയത്. 

2001 മുതൽ 2019 വരെയുള്ള കാലയളവിലെ കണക്കുകൾ പ്രകാരം 19, 693 ആളുകൾ ഉഷ്ണഘാതം മൂലം മരണപ്പെട്ടപ്പോൾ 15, 197 ആളുകൾ തണുപ്പ് കൂടിയത് മൂലവും മരിച്ചു. കടുത്ത താപനിലയിൽ ആരോഗ്യ പ്രശ്നങ്ങൾ നേരിടുന്ന ആളുകളെ സംരക്ഷിക്കുന്നതിന് വേണ്ടി ശക്തമായ നടപടികൾ സ്വീകരിക്കണമെന്ന് ടെമ്പറേച്ചർ ജേണലിൽ പ്രസിദ്ധീകരിച്ച ഒരു പഠനത്തിൽ ഗവേഷകർ സർക്കാരിനോട് ആവശ്യപ്പെട്ടിട്ടുണ്ട്. 

 ചില സംസ്ഥാനങ്ങളിൽ മറ്റു സംസ്ഥാനങ്ങളെക്കാൾ കൂടുതൽ മരണങ്ങൾ റിപ്പോർട്ട് ചെയ്തിട്ടുണ്ട് എന്നാണ് പഠനങ്ങൾ ചൂണ്ടിക്കാണിക്കുന്നത്. പഞ്ചാബ്, ആന്ധ്രപ്രദേശ്, ഉത്തർപ്രദേശ് എന്നീ സംസ്ഥാനങ്ങളിലാണ് ഏറ്റവും കൂടുതൽ ആളുകൾ ചൂട് മൂലം മരണപ്പെട്ടത്. ഉത്തർപ്രദേശ്, പഞ്ചാബ്, ബീഹാർ എന്നീ സംസ്ഥാനങ്ങളാണ് തണുപ്പ് മൂലം ഏറ്റവും കൂടുതൽ ആളുകൾ മരിച്ചത്. ദീർഘനേരം പുറത്തുനിന്ന് ജോലി ചെയ്യേണ്ടി വരുന്നതിനാൽ പുരുഷന്മാരാണ് മരിച്ചവരിൽ കൂടുതലും.

Study finds over 34000 people died in India due to extreme heat in two decades