പാലക്കാട് രാത്രി ഉറങ്ങിക്കിടക്കുകയായിരുന്ന കുട്ടികളുടെ അടുത്തുനിന്ന് നായയെ കടിച്ചെടുത്തു കൊണ്ട് പുലി ഓടി. കട്ടിലില്‍ കിടക്കുകയായിരുന്ന തന്റെ മൂന്നരവയസുള്ള കുട്ടിയെ പുലി തട്ടി താഴെയിട്ടതിന്റെ ഞെട്ടലിലാണ് അവനിക മോള്‍. കുട്ടിയുടെ ജീവന്‍ തലനാരിഴയ്ക്കു രക്ഷപ്പെട്ടതിന്റെ ആശ്വാസത്തില്‍ മാതാപിതാക്കളും.

ഉറങ്ങിക്കിടക്കുകയായിരുന്ന കുട്ടികളുടെ തൊട്ടരികില്‍ നിന്നു നായയെ കടിച്ചെടുത്തു പാഞ്ഞ പുലി നാടിന്റെ മുഴുവന്‍ ഉറക്കം കെടുത്തിയിരിക്കുകയാണ്. മലമ്പുഴ അകമലവാരത്ത് എലിവാല്‍ സ്വദേശി കെ. കൃഷ്ണന്റെ ഒറ്റമുറി വീട്ടിലാണ് വാതില്‍ മാന്തിപ്പൊളിച്ച് പുലി അകത്തുകയറിയത്. മുറിക്കുള്ളില്‍ കെട്ടിയിട്ട ജര്‍മന്‍ ഷെപ്പേര്‍ഡ് ഇനത്തില്‍ പെട്ട നായയായിരുന്നു പുലിയുടെ ലക്ഷ്യം.

നായയുടെ നേരെ ചാടുന്നതിനിടെയാണ് പുലിയുടെ ദേഹത്ത് തട്ടി മൂന്നരവയസുകാരി കട്ടിലില്‍ നിന്ന് താഴെ വീണത്. നിലത്തു കിടന്നിരുന്ന അമ്മ ലത കരച്ചില്‍ കേട്ടു ഉണര്‍ന്നപ്പോള്‍ കണ്ടത് നായയെയും കടിച്ചുപിടിച്ചു നില്‍ക്കുന്ന പുലിയെ. കട്ടിലിലുണ്ടായിരുന്ന പൗര്‍ണമി(5), അനിരുദ്ധ്(7) എന്നീ മക്കളെയും കൂടി ചേര്‍ത്തുപിടിച്ച് ലത നിലവിളിച്ചു.

വീടിനു പുറത്ത് ഉറങ്ങുകയായിരുന്ന കൃഷ്ണന്‍ കരച്ചില്‍ കേട്ട് വന്നപ്പോഴേക്കും നായയുമായി പുലി പുറത്തേക്കു പായുകയായിരുന്നു. കുഞ്ഞിന്റെ കാലിനു നിസാര പരിക്കുണ്ട്. അവനികയ്ക്ക് അങ്കണവാടി അധ്യാപിക സമ്മാനിച്ചതായിരുന്നു റോക്കി എന്ന നായയെ. ഇതിനെയാണ് പുലി പിടിച്ചത്.

മുമ്പും ഇതിനെ പുലി പിടിക്കാന്‍ ശ്രമിച്ചിരുന്നു. അതുകൊണ്ടാണ് രാത്രി വീടിനകത്തു കെട്ടിയിട്ടത്. തകര്‍ന്നുവീഴാറായ ഒറ്റമുറി വീട്ടിലാണ് ഈ കുടുംബം കഴിയുന്നത്. വന്യമൃഗങ്ങളെ പേടിച്ചു കഴിയുന്ന 13 കുടുംബങ്ങളാണ് ഇവിടെയുള്ളത്.