കൊച്ചി: വിളിച്ചാൽ ഓടി വരുന്ന, കൈനീട്ടിയാൽ ഷേക്ക് ഹാൻഡ് തരുന്ന, തലോടൽ ഏറെ ഇഷ്ടമുള്ള ഒരു നായക്കുട്ടിയായിരുന്നു എൻ്റെ കേരളം പ്രദർശന വിപണന മേളയുടെ ആദ്യ ദിനം കയ്യടക്കിയത്. റോബോ ഇനത്തിലുള്ള ബെൻ എന്ന ഒന്നര വയസുകാരൻ. അതേ, നല്ല ഒന്നാന്തരമൊരു റോബോട്ട് നായക്കുട്ടി.

എജ്യു ടെക് കമ്പനിയായ യുണീക് വേൾഡ് റോബോട്ടിക്സാണ് തരംഗമായിക്കൊണ്ടിരിക്കുന്ന റോബോ ടോയ് ഡോഗായ ബെന്നിനെ മേളയിലേക്ക് എത്തിച്ചത്. ഒരു നായയുടെ എല്ലാവിധ അംഗവിക്ഷേപങ്ങളും ഒത്ത് ചേർന്ന ബെൻ സർവ്വ സ്വാതന്ത്ര്യത്തോടെ വികൃതി കാണിച്ച് ഓടി നടക്കുന്ന കാഴ്ച ഏറെ കൗതുകകരമാണ്.

ഭക്ഷണ സാധനങ്ങൾ ഉൾപ്പെടെ വിതരണം ചെയ്യാൻ സഹായിക്കുന്ന ഡിസ്പെൻസർ റോബോട്ടുകളും  മേളയെ ശ്രദ്ധേയമാക്കാനുണ്ട്. കേരള സ്റ്റാർട്ടപ്പ് മിഷൻ്റെ സ്റ്റാളിൽ ഇവയെല്ലാം നേരിട്ട് കാണാനും തൊട്ടറിയാനും സാധിക്കും. 
വിവിധ തരം ഡ്രോണുകൾ മുതൽ അത്യാധുനിക ഹോളോഗ്രാം മെഷീൻ വരെ അണിനിരത്തിയാണ് സ്റ്റാർട്ടപ്പ് മിഷൻ സ്റ്റാൾ ഒരുക്കിയിട്ടുള്ളത്. ലോകത്തിലെ തന്നെ ഏറ്റവും മികച്ച രണ്ടാമത്തെ സൂപ്പർ ഫാബ് ലാബ് കൂടിയായ സ്റ്റാർട്ടപ്പ് മിഷന് കീഴിലുള്ള ലാബിൽ നിർമ്മിച്ച വിവിധ വസ്തുക്കളും പ്രദർശനത്തിനുണ്ട്.

ആരെയും അമ്പരപ്പിക്കുന്ന തരത്തിൽ കാർഡ് ബോർഡ് കൊണ്ട് സൃഷ്ടിച്ച സോഫയാണ് ഇതിൽ പ്രധാന്യം. കടലാസ് കൊണ്ട് നിർമിച്ച സോഫയിൽ 150 കിലോഗ്രാമിലധികം ഭാരം വഹിക്കുമെന്ന് അധികൃതർ വ്യക്തമാക്കി. വിർച്ച്വൽ റിയാലിറ്റിയുടെ സാധ്യതകൾ പരിചയപ്പെടുത്തുന്ന വിവിധ സ്റ്റാളുകളും ഒരുക്കിയിട്ടുണ്ട്.

കലക്ടർ അങ്കിൾ ക്ഷണിച്ചു, ചിൽഡ്രൻസ് ഹോമിൽനിന്നും അവരെത്തി

കൊച്ചി: കലക്ടർ എൻ.എസ്.കെ ഉമേഷിൻ്റെ ക്ഷണം സ്വീകരിച്ച് എൻറെ കേരളം പ്രദർശന വിപണന മേളയിലെത്തി എറണാകുളം ചിൽഡ്രൻസ് ഹോമിലെ അന്തേവാസികൾ. 16 അന്തേവാസികളും എട്ട് കെയർടേക്കർമാരും ഉൾപ്പെടെ 24 പേരായിരുന്നു മേളയിലേക്ക് എത്തിയത്.

പ്രത്യേക ശ്രദ്ധയും പരിചരണവും ആവശ്യമുള്ള കുട്ടികളെ സംരക്ഷിക്കുന്നതിനായുള്ള വനിത ശിശു വികസന വകുപ്പിന് കീഴിലുള്ള ജില്ലയിലെ ഏക ചിൽഡ്രൻസ് ഹോമാണ് കാക്കനാട് സീപോർട്ട് എയർപോർട്ട് റോഡിന് സമീപത്ത് പ്രവർത്തിക്കുന്നത്. ഇവിടുത്തെ ക്ഷേമ പ്രവർത്തനങ്ങൾക്ക് അനുഭാവപൂർണമായ പരിഗണനയാണ് ജില്ലാ കലക്ടർ നൽകുന്നത്. എൻ്റെ കേരളം പ്രദർശന വിപണന മേളയുടെ മുഖ്യ സംഘാടകൻ കൂടിയായ ജില്ലാ കലക്ടർ കുട്ടികളുടെ മാനസിക ഉല്ലാസം കൂടി കണക്കിലെടുത്ത് മേള കാണാൻ ക്ഷണിക്കുകയായിരുന്നു. ഉദ്ഘാടന സമ്മേളനത്തിന് മുൻപ് തന്നെ മറൈൻഡ്രൈവിലെ പ്രദർശന നഗരിയിൽ എത്തിയ കുട്ടികൾ ജില്ലാ കലക്ടറോടൊപ്പം തന്നെയായിരുന്നു ഓരോ സ്റ്റാളുകളും സന്ദർശിച്ചത്.

വിവിധ വകുപ്പുകളുടെ സ്റ്റാളുകൾ, ആർട്ടിഫിഷ്യൽ ഇന്റലിജൻ്റ്സ്, റോബോട്ടിക് തുടങ്ങിയ നൂതന സാങ്കേതികവിദ്യകളുടെ പ്രദർശനം, തീയേറ്റർ ഷോകൾ, പ്ലേ ഏരിയകൾ എന്നിങ്ങനെ വൈവിധ്യമാർന്ന സജ്ജീകരണങ്ങളാണ് മേളയിലുള്ളത്. ഏറെ കൗതുകത്തോടെ ഇവയെല്ലാം കണ്ട ശേഷമായിരുന്നു കുട്ടികൾ മടങ്ങിയത്.