ആലപ്പുഴ: തപാൽ വോട്ട് വിവാദത്തിൽ പാർട്ടിയിൽ ഒറ്റപ്പെട്ട് സി.പി.എം മുതിർന്ന നേതാവ് ജി.സുധാകരൻ.1989ൽ കെ.വി ദേവദാസ് ആലപ്പുഴയിൽ എൽ.ഡി.എഫ് സ്ഥാനാർഥിയായി മത്സരിച്ചപ്പോൾ തപാൽ വോട്ട് പൊട്ടിച്ച് തിരുത്തിയെന്ന വെളിപ്പെടുത്തലിൽ പാർട്ടിയിലും പുറത്തും വൻ വിവാദവും കേസുമായതോടെയാണ് സി.പി.എം പൂർണമായും ജി.സുധാകരനെ കൈയൊഴിഞ്ഞത്. ഇത് സംബന്ധിച്ച് നിലവിൽ രൂക്ഷമായ വിമർശനങ്ങളാണ് ഉയരുന്നത്. സംസ്ഥാന സെക്രട്ടറി എം.വി ഗോവിന്ദൻ സുധാകരനെ പോലുള്ളവർ പ്രസ്താവന നടത്തുമ്പോൾ ശ്രദ്ധിക്കണമെന്ന് കഴിഞ്ഞ ദിവസം താക്കീത് നൽകിയിരുന്നു.
ആലപ്പുഴയിൽ ജി.സുധാകരനെതിരേ പടയൊരുക്കം ശക്തമായിട്ടുണ്ട്. അതേസമയം, അമ്പലപ്പുഴയിലെ കുഞ്ചൻ നമ്പ്യാർ സ്മാരകം യുദ്ധക്കളത്തിന് സമാനമാക്കിയെന്ന ജി.സുധാകരന്റെ പരാമർശത്തിനെതിരേ രൂക്ഷ വിമർശനവുമായി എച്ച്.സലാം എം.എൽ.എ രംഗത്തുവന്നു.

ഫെയ്‌സ് ബുക്ക് പോസ്റ്റിലൂടെയായിരുന്നു എച്ച്.സലാമിന്റെ വിമർശനം. 'കണ്ടാലറിവാൻ സമർഥനല്ലെങ്കിൽ നീ കൊണ്ടാലറിയുമതിനില്ല സംശയം' എന്ന കുഞ്ചൻ നമ്പ്യാരുടെ വരികൾ പരാമർശിച്ചായിരുന്നു എച്ച്. സലാമിന്റെ വിമർശനം.

അതേസമയം വെളിപ്പെടുത്തലിന്റെ പശ്ചാത്തലത്തില്‍ ആരംഭിച്ച അന്വേഷണത്തില്‍ തിരഞ്ഞെടുപ്പ് രേഖകല്‍ ആവശ്യപ്പെട്ടുകൊണ്ട് പൊലിസ് തിരഞ്ഞെടുപ്പ് കമ്മീഷനു കത്തു നല്‍കും. ഇത്തരത്തില്‍ ഒരു സംഭവം ഉണ്ടായിട്ടുണ്ടോ എന്ന് ഉറപ്പിക്കാനാണിത്. രേഖകള്‍ കിട്ടിയ ശേഷമാകും സുധാകരന്റെയും അദ്ദേഹം പ്രസംഗിക്കുമ്പോള്‍ കൂടെയുണ്ടായിരുന്നവരുടെയും മൊഴി രേഖപ്പെടുത്തുകയുള്ളൂ. 

പൊലിസ് അന്വേഷണത്തിന്റെ പുരോഗതി സമയാസമയം അറിയിക്കണമെന്ന് സംസ്ഥാന മുഖ്യ തിരഞ്ഞെടുപ്പ് ഓഫീസര്‍ ജില്ലാ കലക്ടര്‍ക്ക് നിര്‍ദേശം നല്‍കി. എന്നാല്‍ 36 വര്‍ഷം മുമ്പു നടന്ന സംഭവത്തെപ്പറ്റിയുള്ള അന്വേഷണം അത്ര എളുപ്പത്തിലാകില്ലെന്നാണ് പൊലിസിന്റെ കണക്കുകൂട്ടല്‍.