അബൂദബി: യുഎഇയില്‍ ഇന്നലെ റെക്കോഡ് താപനിലയാണ് രേഖപ്പെടുത്തിയത്. അബൂദബിയിലെ അല്‍ ശവാമിഖില്‍ ഇന്നലെ ഉച്ചയ്ക്ക് 50.4 ഡിഗ്രി സെല്‍ഷ്യസ് എന്ന റെക്കോര്‍ഡ് താപനിലയാണ് രേഖപ്പെടുത്തിയത്. 2009ല്‍ രേഖപ്പെടുത്തിയ 50.2 ആണ് മേയ് മാസത്തില്‍ ഇതിന് മുമ്പ് രേഖപ്പെടുത്തിയ ഏറ്റവും വലിയ ചൂട്. 2003 മുതല്‍ ആണ് താപനില സംബന്ധിച്ച സമഗ്രമായ കണക്കുകള്‍ യുഎഇയുടെ ദേശീയ കാലാവസ്ഥാ നിരീക്ഷണ കേന്ദ്രം (എന്‍സിഎം) കൃത്യമായി രേഖപ്പെടുത്തിവന്നത്. അതിന് ശേഷം മേയ് മാസത്തില്‍ അടയാളപ്പെടുത്തിയ ഏറ്റവും ഉയര്‍ന്ന ചൂടാണിതെന്ന് എന്‍സിഎം അറിയിച്ചു. 

കഴിഞ്ഞമാസം രാജ്യത്തെ ഏറ്റവും ചൂടേറിയ ഏപ്രില്‍ മാസമാണ് കടന്നുപോയത്. ശരാശരി പ്രതിദിന ഉയര്‍ന്ന താപനില 42.6ഡിഗ്രി വരെ ഏപ്രിലില്‍ രേഖപ്പെടുത്തുകയുണ്ടായി. വരും നാളുകള്‍ പൊള്ളുമെന്നതിന്റെ സൂചനയായിട്ടാണ് വേനല്‍ക്കാല സീസണ്‍ ആരംഭിക്കുന്നതിന് മുമ്പുതന്നെ സാധാരണയേക്കാള്‍ ഉയര്‍ന്ന താപനില രേഖപ്പെടുത്തിയതിനെ എന്‍സിഎം കാണുന്നത്.

അതേസമയം, വീണ്ടുമൊരു കൊടും വേനല്‍ വരാനിരിക്കുന്ന സാഹചര്യത്തില്‍ സുരക്ഷിതരായിരിക്കാന്‍ യുഎഇ ഭരണകൂടം പൊതുജനങ്ങളോട് അഭ്യര്‍ഥിച്ചു. കടുത്ത ചൂടും ഈര്‍പ്പവും നേരിടാന്‍ താമസക്കാര്‍ക്ക് ആശ്വാസം നല്‍കുന്നതിനായി യുഎഇ നടപടികളും സ്വീകരിച്ചുവരികയാണ്. ഇതിന്റെ ഭാഗമായി പള്ളികളിലും ആളുകള്‍ കൂടുതലായി വരാറുള്ള പൊതു ചത്വരങ്ങളിലും പ്രത്യേക തണല്‍ പ്രദേശങ്ങള്‍ ഒരുക്കുമെന്ന് ജനറല്‍ അതോറിറ്റി ഓഫ് ഇസ്ലാമിക് അഫയേഴ്‌സ്, എന്‍ഡോവ്‌മെന്റ്‌സ് & സക്കാത്ത് അറിയിച്ചു. 

ആരാധകര്‍ക്കും പൊതുജനങ്ങള്‍ക്കും തണുപ്പും സുഖകരവുമായ അന്തരീക്ഷം പ്രദാനം ചെയ്യുന്നതിനായി കനോപ്പികളും മറ്റ് തണലുള്ള ഘടനകളും സ്ഥാപിക്കുന്നതിനും പദ്ധതിയുണ്ട്. നിരവധി സ്ഥലങ്ങളില്‍ ഈ സംരംഭം ഇതിനകം തന്നെ ആരംഭിച്ചതായും വരും മാസങ്ങളില്‍ ഇത് വിപുലീകരിക്കുമെന്നും അധികൃതര്‍ അറിയിച്ചു.

UAE records hottest May in over a decade as temperatures rise to 50.4°C