റിയാദ്: ഹജ്ജ് തീര്‍ത്ഥാടകര്‍ക്ക് സംശയ നിവാരണത്തിനും മറ്റു സേവനങ്ങള്‍ക്കുമായി പുതിയ പോര്‍ട്ടല്‍ ആരംഭിച്ച് അധികൃതര്‍. മക്കയിലും മദീനയിലും സഹായകമാകും വിധം ഇരു കേന്ദ്രങ്ങള്‍ക്കും രണ്ടു വിഭാഗങ്ങളായാണ് പോര്‍ട്ടല്‍ ആരംഭിച്ചിരിക്കുന്നത്.

തീര്‍ത്ഥാടകരുടെ ആവശ്യങ്ങള്‍ നിറവേറ്റുന്നതിനായി ലളിതവും സമഗ്രവുമായ രീതിയിലാണ് സ്മാര്‍ട്ട് പോര്‍ട്ടല്‍ രൂപകല്‍പ്പന ചെയ്തിരിക്കുന്നത്. ഇത്തരത്തിലുള്ള ആദ്യത്തെ സ്മാര്‍ട്ട് പോര്‍ട്ടലാണിതെന്ന് ഇരു ഹരമുകളുടെയും മതകാര്യ പ്രസിഡന്റ് ഷെയ്ഖ് അബ്ദുള്‍റഹ്മാന്‍ അല്‍സുദൈസ് പറഞ്ഞു. നൂതനവും, ആഗോളതലത്തില്‍ ആക്‌സസ് ചെയ്യാവുന്ന തരത്തിലുമാണ് പോര്‍ട്ടല്‍ ഒരുക്കിയിരിക്കുന്നത്. 

ഒന്നിലധികം ഭാഷകളില്‍ രൂപകല്‍പ്പന ചെയ്തിരിക്കുന്ന പോര്‍ട്ടല്‍ സ്റ്റാന്‍ഡേര്‍ഡ് ഡാറ്റാബേസിനെ അടിസ്ഥാനമാക്കിയാകും തീര്‍ത്ഥാടകര്‍ക്ക് സഹായകമായി വര്‍ത്തിക്കുക.

നിരവധി സ്മാര്‍ട്ട് സാങ്കേതികവിദ്യകളാല്‍ പ്രവര്‍ത്തിക്കുന്ന ഈ ഇന്ററാക്ടീവ് പ്ലാറ്റ്‌ഫോം വഴി പ്രാര്‍ത്ഥന സമയം, ഇമാമുമാരെയും മുഅദ്ദിനുകളെയും കുറിച്ചുള്ള അറിയിപ്പുകള്‍, ഷെഡ്യൂളുകള്‍ എന്നിവയുള്‍പ്പെടെ നിരവധി കാര്യങ്ങള്‍ അറിയാനാകും. ആപ്പിനുള്ളിലെ സ്മാര്‍ട്ട് മാപ്പുകള്‍ ഉപയോഗിച്ച് സന്ദര്‍ശകര്‍ക്ക് സേവനങ്ങളും സ്ഥലങ്ങളും നേരിട്ട് ആക്‌സസ് ചെയ്യാന്‍ അനുവദിക്കുന്ന ഒരു നാവിഗേഷന്‍ സവിശേഷതയാണ് പോര്‍ട്ടലിനെ വ്യത്യസ്തമാക്കുന്നത്.

സന്ദര്‍ശകരുടെ ചോദ്യങ്ങള്‍ക്ക് തത്സമയ ചാറ്റിലൂടെ മറുപടി നല്‍കാനും, പ്രാര്‍ത്ഥനയും വുദുവും എങ്ങനെ നിര്‍വഹിക്കാമെന്നതിനെക്കുറിച്ചുള്ള മാര്‍ഗ്ഗനിര്‍ദ്ദേശം നല്‍കാനും ഇസ്‌ലാമിക പദങ്ങളുടെ നിര്‍വചനങ്ങള്‍ നല്‍കാനും പോര്‍ട്ടല്‍ സഹായിക്കുന്നു. https://services.prh.gov.sa വഴി ഇത് ആക്‌സസ് ചെയ്യാന്‍ കഴിയും .

തീര്‍ത്ഥാടകരുടെ ആത്മീയ അനുഭവങ്ങള്‍ വര്‍ധിപ്പിക്കുന്നതിന് നൂതന സാങ്കേതികവിദ്യകള്‍ പ്രയോജനപ്പെടുത്തുക എന്ന ലക്ഷ്യത്തോടെയുള്ള സംരംഭത്തിന്റെ ഭാഗമായി, AIയില്‍ പ്രവര്‍ത്തിക്കുന്ന മനാരത്ത് അല്‍ഹറമൈന്‍ റോബോട്ടിന്റെ അപ്‌ഡേറ്റ് ചെയ്ത രണ്ടാം പതിപ്പും ബുധനാഴ്ച അധികൃതര്‍ പുറത്തിറക്കിയിരുന്നു.

The Haram Office in Mecca and Medina has launched a new smart portal to streamline services and provide real-time assistance for Hajj pilgrims, enhancing their spiritual journey with digital convenience.