കുവൈത്ത് സിറ്റി: സബാഹ് അല്‍ സലീം ജില്ലയില്‍ മാതാവിനെ മാരകമായി കുത്തിക്കൊലപ്പെടുത്തുകയും 10 വയസ്സുള്ള സഹോദരനെ ഗുരുതരമായി പരുക്കേല്‍പ്പിക്കുകയും ചെയ്ത 28 കാരനെതിരെയുള്ള വിചാരണ നടപടികള്‍ പുരോഗമിക്കുന്നു. കുവൈത്ത് ക്രിമിനല്‍ കോടതിയിലാണ് യുവാവിനെതിരെയുള്ള വിചാരണാ നടപടികള്‍ പുരോഗമിക്കുന്നത്.

ആക്രമണം നടന്ന സമയത്ത് താന്‍ മയക്കുമരുന്ന് ഉപയോഗിച്ചിരുന്നതായി പ്രതി സമ്മതിച്ചു. കൂടുതല്‍ മയക്കുമരുന്ന് വാങ്ങാന്‍ പണം നല്‍കാന്‍ വിസമ്മതിച്ചതിനെ തുടര്‍ന്നാണ് അമ്മയെ കൊലപ്പെടുത്തിയതെന്നും ഇയാള്‍ പറഞ്ഞു.

മയക്കുമരുന്ന് വാങ്ങാന്‍ പണം നല്‍കാതിരുന്നത് തന്നെ കോപാകുലനാക്കിയെന്നും ഇതിനെ തുടര്‍ന്നാണ് താന്‍ മാതാവിനെ കുത്തിക്കൊലപ്പെടുത്തിയതെന്നും യുവാവ് മൊഴി നല്‍കി. ആക്രമണം കണ്ടുനിന്ന ഇളയ സഹോദരനെയും പ്രതി കത്തി കൊണ്ട് ഗുരുതരമായി പരുക്കേല്‍പ്പിച്ചു.

ജഹ്‌റ പ്രോസിക്യൂഷന്‍ ഡെപ്യൂട്ടി ഡയറക്ടര്‍ മുഹമ്മദ് തലാല്‍ അല്‍ ഹജ്‌രി യുവാവിന് വധശിക്ഷ നല്‍കണമെന്ന് ആവശ്യപ്പെട്ടു. ഹീനവും അത്യധികം അസ്വസ്ഥത ഉളവാക്കുന്നതുമായ തെറ്റാണ് യുവാവ് ചെയ്തതെന്ന് എന്ന് അദ്ദേഹം ചൂണ്ടിക്കാട്ടി. തന്റെ ജീവിതവും ആരോഗ്യവും യൗവനവും മകനെ വളര്‍ത്തുന്നതിനായി സമര്‍പ്പിച്ച അമ്മയുടെ ജീവിതം പക്ഷേ അവന്റെ കൈകളാല്‍ തന്നെ അവസാനിച്ചുവെന്നും അദ്ദേഹം പറഞ്ഞു.

പ്രതിക്കെതിരെ ആവശ്യത്തില്‍ അധികം തെളിവുകള്‍ ഉണ്ടെന്നും അദ്ദേഹം പറഞ്ഞു. അടിസ്ഥാന മാനുഷിക മൂല്യങ്ങളോടുള്ള അഗാധമായ വഞ്ചനയായാണ് അല്‍ ഹജ്‌രി കുറ്റകൃത്യത്തെ വിശേഷിപ്പിച്ചത്. 

'ഇത് ഒരു ശത്രുവിനെ കൊല്ലുന്നതോ ഒരു എതിരാളി ഒരു പ്രശ്‌നം പരിഹരിക്കുന്നതോ ആയിരുന്നില്ല. ഒരു മകന്‍ സ്വന്തം അമ്മയെ കൊലപ്പെടുത്തുന്നതായിരുന്നു. ഈ കുറ്റകൃത്യം മനുഷ്യത്വത്തിന്റെ ഹൃദയത്തിനേറ്റ മുറിവാണ്, ദൈവിക നിയമത്തോടുള്ള അപമാനവുമാണ്. എല്ലാ മതങ്ങളും ധാര്‍മ്മിക നിയമങ്ങളും ജീവിതത്തില്‍ സ്ഥാപിക്കുന്ന പവിത്രതയെ ഇത് ഇല്ലാതാക്കുന്നു.' ഹിജ്‌രി പറഞ്ഞു.  മനുഷ്യന്റെ അധഃപതനത്തിന്റെ ആഴം വെളിപ്പെടുത്തുന്ന ഒരു ദുരന്തം എന്നാണ് പ്രോസിക്യൂഷന്‍ സംഭവത്തെ വിശേഷിപ്പിച്ചത്.

A young man allegedly stabbed his mother to death after she refused to give him money to purchase drugs. The tragic incident has shocked the local community as police launch a full investigation.