കീവ്: ഉക്രെയ്നിലുടനീളം റഷ്യ നടത്തിയ ഡ്രോൺ, മിസൈൽ ആക്രമണങ്ങളിൽ എട്ട് പേർ കൊല്ലപ്പെടുകയും 30-ലധികം പേർക്ക് പരുക്കേൽക്കുകയും ചെയ്തതായി പ്രാദേശിക ഉദ്യോഗസ്ഥർ അറിയിച്ചു. പടിഞ്ഞാറൻ ഖ്മെൽനിറ്റ്സ്കി മേഖലയിൽ നാല് പേരും കീവ് മേഖലയിൽ മൂന്ന് പേരും തെക്കൻ നഗരമായ മൈക്കോലൈവിൽ ഒരാളുമാണ് കൊല്ലപ്പെട്ടത്.

റഷ്യൻ അധിനിവേശം ആരംഭിച്ചത് മുതൽ ഉക്രെയ്നിന്റെ ഏകദേശം 20% പ്രദേശം മോസ്കോയുടെ നിയന്ത്രണത്തിലാണ്. 2014-ൽ റഷ്യ പിടിച്ചെടുത്ത ക്രിമിയ ഉപദ്വീപും ഇതിൽ ഉൾപ്പെടുന്നു.

കീവിൽ നടന്ന ആക്രമണത്തിൽ 11 പേർക്ക് പരിക്കേല്ക്കുകയും ഒരു ഡോർമിറ്ററി ഉൾപ്പെടെയുള്ള റെസിഡൻഷ്യൽ കെട്ടിടങ്ങൾക്ക് കേടുപാടുകൾ സംഭവിക്കുകയും ചെയ്തു. നിരവധി വീടുകൾ കത്തിനശിച്ചതിന്റെ ദൃശ്യങ്ങൾ കീവ് മേഖലാ മേധാവി മൈക്കോള കലാഷ്നിക് സോഷ്യൽ മീഡിയയിൽ പോസ്റ്റ് ചെയ്തു. മൈക്കോലൈവിൽ ഡ്രോൺ ഇടിച്ച അഞ്ച് നില കെട്ടിടത്തിൽ നിന്ന് ഒരു വൃദ്ധന്റെ മൃതദേഹം പുറത്തെടുത്തതായി ഉക്രെയ്നിന്റെ സ്റ്റേറ്റ് എമർജൻസി സർവീസ് ഡിഎസ്എൻഎസ് റിപ്പോർട്ട് ചെയ്തു. ഖാർകിവിൽ മൂന്ന് പേർക്കാണ് പരുക്കേറ്റത്.

അതേസമയം, ശനിയാഴ്ച രാത്രി നാല് മണിക്കൂറിനുള്ളിൽ മോസ്കോ ഉൾപ്പെടെയുള്ള റഷ്യൻ പ്രദേശങ്ങളിൽ 95 ഉക്രേനിയൻ ഡ്രോണുകൾ വ്യോമ പ്രതിരോധ യൂണിറ്റുകൾ തടയുകയോ വെടിവച്ചിടുകയോ ചെയ്തതായി റഷ്യൻ പ്രതിരോധ മന്ത്രാലയം വ്യക്തമാക്കി. മോസ്കോയിലേക്ക് വന്ന 12 ഡ്രോണുകൾ വെടിവച്ചിട്ടതായി മോസ്കോ മേയർ സെർജി സോബിയാനിൻ അറിയിച്ചു. ഡ്രോൺ അവശിഷ്ടങ്ങൾ മൂലമുണ്ടായ നാശനഷ്ടങ്ങൾ വിലയിരുത്താൻ അടിയന്തര സേവന സംഘങ്ങളെ വിന്യസിച്ചിട്ടുണ്ട്. ആക്രമണത്തെ തുടർന്ന് മോസ്കോയിലെ വിമാനത്താവളങ്ങളിലെ സർവീസുകൾ താൽക്കാലികമായി നിർത്തിവച്ചു. ഞായറാഴ്ച കീവ് വാർഷിക കീവ് ദിനം ആഘോഷിക്കവെ, നൂറുകണക്കിന് ആളുകൾ മെട്രോയിലെ ഭൂഗർഭ സ്റ്റേഷനുകളിൽ അഭയം തേടിയിരിക്കുകയാണ്.