ഹവായി: ജോലിയും സാമ്പത്തിക സ്ഥിരതയും എല്ലാം ഉപേക്ഷിച്ച് തന്റെ പ്രിയപ്പെട്ട പൂച്ച ഫീനിക്സിനൊപ്പം കപ്പൽയാത്രയ്ക്ക് ഇറങ്ങിയ ഒറിഗോൺ സ്വദേശി ഒലിവർ വിഡ്ജർ (29) ആഴ്ചകൾ നീണ്ട കടൽയാത്രയ്ക്കൊടുവിൽ തന്റെ ജന്മ സ്ഥലമായ ഹവായിയിലെ യാച്ച് ക്ലബ്ബിൽ തിരിച്ചെത്തി എത്തി. ആഴ്ചകൾ നീണ്ട കടൽയാത്രയ്ക്കൊടുവിൽ ശനിയാഴ്ച എത്തിയ അദ്ദേഹത്തെ ആർപ്പുവിളികളോടെ ആരാധകരും ഹവായ് ഗവർണർ ജോഷ് ഗ്രീനും സ്വാഗതം ചെയ്തു. 

 

 

നാല് വർഷം മുമ്പ് പക്ഷാഘാത സാധ്യതയുള്ള ഒരു സിൻഡ്രോം കണ്ടെത്തിയതോടെയാണ് വിഡ്ജറിന്റെ ജീവിതം മാറിമറിഞ്ഞത്. ടയർ കമ്പനി മാനേജർ എന്ന ജോലി ഉപേക്ഷിച്ച്, 50,000 ഡോളർ കടവും വാങ്ങി 10,000 ഡോളറിന് വാങ്ങിയ ബോട്ടുമായി അദ്ദേഹം ലോകം ചുറ്റാനുള്ള സ്വപ്നത്തിന് പിന്നാലെ പോർട്ട്‌ലാൻഡിൽ നിന്ന് ഒറിഗോൺ തീരത്തേക്ക് താമസം മാറി. യൂട്യൂബ് ട്യൂട്ടോറിയലുകളിലൂടെ കപ്പൽ യാത്ര പഠിച്ച അദ്ദേഹം, മാസങ്ങൾ നീണ്ട പരിശ്രമത്തിനൊടുവിൽ ബോട്ട് പുതുക്കിപ്പണിതു. ഏപ്രിൽ അവസാനം തന്റെ പൂച്ച ഫീനിക്സിനൊപ്പം ഹവായിയി ദ്വീപിലേക്കുള്ള യാത്ര ആരംഭിച്ചു.

 

 

യാത്രയുടെ ഓരോ നിമിഷവും വിഡ്ജർ തന്റെ ടിക് ടോക്കിലെ 10 ലക്ഷത്തിലധികം ഫോളോവേഴ്‌സിനും ഇൻസ്റ്റാഗ്രാമിലെ 17 ലക്ഷം ഫോളോവേഴ്‌സിനും വേണ്ടി പങ്കുവെച്ചു കൊണ്ടിരുന്നു. "ജോലിയിൽ മുഴുകി ജീവിക്കുന്നവർക്ക് പണം മാത്രമല്ല, ജീവിതം ആസ്വദിക്കാനുള്ള അവസരമാണ് വേണ്ടത്. ലോകം വിചിത്രമായ ഒരു സ്ഥലത്താണ്, അവിടെനിന്ന് മോചനം തേടാനുള്ള പ്രചോദനമാണ് ആളുകൾക്ക് ആവശ്യം," അദ്ദേഹം പറഞ്ഞു.

യാത്രയിൽ ഏറ്റവും ഭയപ്പെടുത്തിയ നിമിഷം റഡ്ഡർ തകരാറിലായപ്പോഴാണെന്ന് വിഡ്ജർ വെളിപ്പെടുത്തി. എന്നാൽ, ഡോൾഫിനുകളും തിമിംഗലങ്ങളും കാണുകയും ഗ്ലാസ് പോലെ ശാന്തമായ പസഫിക് സമുദ്രത്തിന്റെ വിസ്മയം ആസ്വദിക്കുകയും ചെയ്ത നിമിഷങ്ങൾ അവിസ്മരണീയമായിരുന്നു. "സമുദ്രത്തിന്റെ നടുവിൽ, ചുറ്റും ഗ്ലാസ് പോലെ നിശ്ചലമായ വെള്ളം മാത്രം കാണുമ്പോൾ അനുഭവപ്പെടുന്നത് അവർണനീയമാണ്," അദ്ദേഹം കൂട്ടിച്ചേർത്തു.

 

 

സ്റ്റാർലിങ്ക് സാറ്റലൈറ്റ് ഇന്റർനെറ്റ് വഴി സുഹൃത്തുക്കളുമായി ബന്ധം നിലനിർത്തിയതിനാൽ ഒറ്റപ്പെടൽ അനുഭവപ്പെട്ടില്ലെന്ന് വിഡ്ജർ പറഞ്ഞു. എന്നാൽ, ഇത്തരം സാങ്കേതികവിദ്യകൾ ഇല്ലാതിരുന്ന മുൻകാല നാവികർ അനുഭവിച്ച കടലിന്റെ ശുദ്ധമായ അനുഭൂതി നഷ്ടമായതിൽ അദ്ദേഹം ഖേദം പ്രകടിപ്പിച്ചു.

അടുത്ത യാത്ര ഫ്രഞ്ച് പോളിനേഷ്യയിലേക്കാകുമെന്ന് വിഡ്ജർ സൂചിപ്പിച്ചു. എന്നാൽ, ഇപ്പോൾ ബോട്ടിന്റെ അറ്റകുറ്റപ്പണികളും വിശ്രമവുമാണ് മുൻഗണന. സോഷ്യൽ മീഡിയയിൽ ദശലക്ഷക്കണക്കിന് ആളുകളെ പ്രചോദിപ്പിച്ച അദ്ദേഹത്തിന്റെ കഥ, ജീവിതത്തിൽ സ്വപ്നങ്ങൾക്ക് പിന്നാലെ പോകാനുള്ള ധൈര്യത്തിന്റെ പ്രതീകമായി മാറിയിരിക്കുകയാണ്.