ഇടുക്കി മലങ്കര ഡാമിന്റെ ഷട്ടറുകള്‍ മുന്നറിയിപ്പില്ലാതെ തുറന്നു. ഡാമിന്റെ ആറ് ഷട്ടറുകളില്‍ അഞ്ചെണ്ണവും തുറന്നിട്ടുണ്ട്. ഇതിന്റെ ഭാഗമായി തൊടുപുഴ, മൂവാറ്റുപുഴ ആറുകളില്‍ ജലനിരപ്പ് ഉയരാന്‍ സാധ്യതയുണ്ട്. ഇന്ന് പുലര്‍ച്ചയോടെയാണ് ഡാമിന്റെ ഷട്ടറുകള്‍ തുറന്നത്. 

അതേസമയം ഡാം തുറക്കുന്നതുമായി ബന്ധപ്പെട്ട് യാതൊരുവിധ മുന്നറിയിപ്പികളും നല്‍കിയിരുന്നില്ല. ജലവിഭവ വകുപ്പിന്റെ നിയന്ത്രണത്തിലുള്ള അണക്കെട്ട് തുറന്നത് പിആര്‍ഡിയോ, ജില്ല ഭരണകൂടമോ പ്രതികരിച്ചിട്ടില്ല. എന്തുകൊണ്ടാണ് മുന്നറിയിപ്പ് നല്‍കാതിരുന്നതെന്ന് വ്യക്തമല്ല. 

നിലവില്‍ ആശങ്കപ്പെടേണ്ട സാഹചര്യം നിലനില്‍ക്കുന്നില്ല. റെഡ് അലര്‍ട്ട് നിലനില്‍ക്കുന്ന സാഹചര്യത്തില്‍ ഡാമിലെ ജലനിരപ്പ് ക്രമീകരിക്കുന്നതിന് ഷട്ടറുകള്‍ തുറക്കാറുണ്ട്. എന്നാല്‍ ആകെയുള്ള ആറ് ഷട്ടറുകളില്‍ അഞ്ചെണ്ണവും തുറക്കുമ്പോള്‍ മുന്നറിയിപ്പ് നല്‍കേണ്ടത് ആവശ്യമാണ്. ഇതാണ് ആശയക്കുഴപ്പത്തിന് കാരണമായിരിക്കുന്നത്. 

ഷട്ടറുകള്‍ തുറന്നതായി വാര്‍ത്ത വന്നതിന് ശേഷമാണ് പിആര്‍ഡി സമീപ പ്രദേശത്ത് താമസിക്കുന്നവര്‍ക്ക് ജാഗ്രത നിര്‍ദേശം നല്‍കിയത്. ഡാം തുറന്ന സാഹചര്യത്തില്‍ ആദ്യം വെള്ളം തൊടുപുഴ ആറിലേക്കാണ് എത്തുക. പിന്നീട് മൂവാറ്റുപുഴ ആറിലേക്ക് എത്തും. 

five shutters of the Idukki Malankara Dam were opened without proper warning