ഗസ്സയില്‍ മാധ്യമപ്രവര്‍ത്തകന്റെ വീടിന് മുകളില്‍ ബോംബിട്ട് ഇസ്‌റാഈല്‍. ഗസ്സയില്‍ മാധ്യമപ്രവര്‍ത്തകനായ ഉസാമ അല്‍ അര്‍ബീദിന്റെ വീടിന് നേരെയാണ് ആക്രമണമുണ്ടായത്. ആക്രമണത്തില്‍ അദ്ദേഹത്തിന്റെ കുടുംബത്തിലെ എട്ടു പേര്‍ കൊല്ലപ്പെട്ടു. അതേസമയം, അര്‍ബീദ് അത്ഭുതകരമായി ആക്രമണത്തില്‍ നിന്ന് രക്ഷപ്പെട്ടു. അദ്ദേഹത്തെ തകര്‍ന്നടിഞ്ഞ വീടിന്റെ അവശിഷ്ടങ്ങള്‍ക്കിടയില്‍ നിന്ന് വലിച്ചെടുക്കുകയായിരുന്നു. ഇന്ന് പുലര്‍ച്ചെ മുതല്‍ മാത്രം ഇസ്‌റാഈല്‍ 15 ലേറെ മനുഷ്യരെ കൊന്നൊടുക്കിയെന്ന് ഗസ്സയിലെ മെഡിക്കല്‍ സോഴ്‌സുകള്‍ റിപ്പോര്‍ട്ട് ചെയ്യുന്നു. 

First moments of the Israeli airstrike targeting Al-Arbeed family home in Al-Saftawi neighborhood, north of Gaza City. pic.twitter.com/ssVfvnk64w

— Quds News Network (@QudsNen) May 28, 2025

വെസ്റ്റ് ബാങ്കില്‍ ഇസ്‌റാഈല്‍ ആക്രമണത്തില്‍ ഒരാള്‍ മരിച്ചതായി റിപ്പോര്‍ട്ടുണ്ട്. ജസീം ഇബ്രാഹിം അല്‍ സദയാണ് കൊല്ലപ്പെട്ടത്. ഗസ്സയില്‍ സഹായത്തിനായി കാത്തു നില്‍ക്കുന്നവര്‍ക്കിടയിലേക്ക് നടത്തിയ വെടിവെപ്പില്‍ മൂന്ന് ഫലസ്തീനികള്‍ കൊല്ലപ്പെടുകയും 46 പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്. 

അതിനിടെ, യു.എസ് മുന്നോട്ടുവച്ച വെടിനിര്‍ത്തല്‍ പദ്ധതി ഹമാസ് അംഗീകരിച്ചെങ്കിലും ഇസ്‌റാഈല്‍ തള്ളിയിരിക്കുകയാണ്. ഈ സാഹചര്യത്തില്‍ യു.എസും നിലപാട് മാറ്റിയെന്നാണ് സൂചന. മുതിര്‍ന്ന യു.എസ് ഉദ്യോഗസ്ഥര്‍ കരാര്‍ അംഗീകരിക്കാന്‍ കഴിയില്ലെന്ന നിലപാടെടുത്തതായി റിപ്പോര്‍ട്ടുകള്‍ പറയുന്നു. ചര്‍ച്ചകള്‍ക്കു നേതൃത്വം നല്‍കിയ യു.എസ് പ്രസിഡന്റിന്റെ പ്രത്യേക പ്രതിനിധി സ്റ്റീവ് വിറ്റ്‌കോഫ് ആണ് ഹമാസിന്റെ ചില നിര്‍ദേശങ്ങള്‍ അംഗീകരിക്കാനാകില്ലെന്നു പറഞ്ഞത്. ഇക്കാര്യത്തില്‍ താന്‍ മാത്രമല്ല തീരുമാനമെടുക്കുന്നതെന്നും വിറ്റ്‌കോഫ്  പറഞ്ഞു.

70 ദിവസം നീളുന്ന വെടിനിര്‍ത്തലും ജീവനോടെയുള്ള 10 ഇസ്‌റാഈല്‍ തടവുകാരെ വിട്ടുകൊടുക്കുകയുമാണ് കരാറിന്റെ പ്രധാന നിര്‍ദേശം. ഗസ്സയില്‍നിന്ന് ഇസ്‌റാഈല്‍ സേനയുടെ ഭാഗിക പിന്‍മാറ്റവും കരടില്‍ ഉള്‍പ്പെടുത്തിയിരുന്നു. കൂടാതെ ദീര്‍ഘകാലം ഇസ്‌റാഈല്‍ തടവനുഭവിക്കുന്ന ഫലസ്തീനികളെ വിട്ടയക്കാനും തീരുമാനമായിരുന്നു. എന്നാല്‍ കരാറിനോട് ഇസ്‌റാഈല്‍ വിയോജിപ്പ് പ്രകടിപ്പിച്ചതോടെ യു.എസും കരാര്‍ നടക്കില്ലെന്ന് നിലപാടെടുക്കുയായിരുന്നു.