നിലമ്പൂരില്‍ എല്‍.ഡി.എഫ് സ്ഥാനാര്‍ഥിയെ പ്രഖ്യാപിച്ചു. എം.സ്വരാജ് ആണ് എല്‍.ഡി.എഫ് സ്ഥാനാര്‍ഥി. സി.പി.എം സംസ്ഥാനസെക്രട്ടറി എം.വി ഗോവിന്ദനാണ് സ്ഥാനാര്‍ഥിയെ പ്രഖ്യാപിച്ചത്. പാര്‍ട്ടി ചിഹ്നത്തിലാണ് എം.സ്വരാജ്  മത്സരിക്കുക. മലപ്പുറം ജില്ലാ കമ്മിറ്റിയുടെയും നിലമ്പൂര്‍ മണ്ഡലം കമ്മിറ്റിയുടെയും അഭിപ്രായം കൂടി പരിഗണിച്ച് രാവിലെ ചേര്‍ന്ന സംസ്ഥാന സെക്രട്ടറിയേറ്റ് യോഗത്തിലാണ് സ്ഥാനാര്‍ഥിയുടെ കാര്യത്തില്‍ അന്തിമ തീരുമാനമെടുത്തതെന്ന് എം.ഗോവിന്ദന്‍ അറിയിച്ചു. 

നിലമ്പൂരില്‍ മത്സരം കടുക്കുമെന്ന് എം വി ഗോവിന്ദന്‍ സ്ഥാനാര്‍ത്ഥി പ്രഖ്യാപനത്തിന് പിന്നാലെ പ്രതികരിച്ചു.
 രാഷ്ട്രീയ പ്രാധാന്യമുള്ള മണ്ഡലമാണ് നിലമ്പൂര്‍. സഖാവ് കുഞ്ഞാലിയുടെ നാടാണ്. രാഷ്ട്രീയ പോരാട്ടമാണ് നിലമ്പൂരില്‍ നടക്കാന്‍ പോകുന്നത്. പാര്‍ട്ടിയെ ഒറ്റുകൊടുത്ത യൂദാസ് ആണ്  പി വി അന്‍വര്‍. പി വി അന്‍വര്‍ ഇടതുമുന്നണിയെ വഞ്ചിച്ചു. കാല് പിടിക്കുമ്പോള്‍ മുഖത്ത് ചെളിവാരിയെറിയുന്നുവെന്നാണ് യു.ഡി.എഫിനെക്കുറിച്ച് അന്‍വര്‍ പറഞ്ഞത്. അന്‍വറിന്റെ ദയനീയ ചിത്രം കേരളം കാണുന്നുണ്ടെന്നും എം വി ഗോവിന്ദന്‍ ചൂണ്ടിക്കാട്ടി.  
ആര് മത്സരിക്കും എന്ന് നോക്കിയല്ല എല്‍.ഡി.എഫ് നിലപാടുകള്‍ എടുക്കുന്നതെന്ന് സ്വരാജ് പ്രതികരിച്ചു. ജനങ്ങളുടെ നന്മ മുന്‍നിര്‍ത്തിയാണ് സ്ഥാനാര്‍ഥികളെ തീരുമാനിക്കുന്നതെന്നും അദ്ദേഹം കൂട്ടിച്ചേര്‍ത്തു. 

പാര്‍ട്ടി ചിഹ്നത്തിലാണ് മത്സരിക്കുന്നതെങ്കില്‍ സംസ്ഥാന സെക്രട്ടറിയേറ്റ് അംഗം എം.സ്വരാജിനാണ് പ്രഥമ പരിഗണനയെന്ന് നേരത്തെ തന്നെ സംസാരമുണ്ടായിരുന്നു. എന്നാല്‍ ഡി.വൈ.എഫ്.ഐ ജില്ലാ പ്രസിഡന്റ് പി. ഷബീറിന്റെ പേരും ചര്‍ച്ചയിലുണ്ടായിരുന്നു. നിലമ്പൂര്‍ ജില്ലാ ആശുപത്രി സൂപ്രണ്ടായ ഡോ. ഷിനാസ് ബാബു, ജില്ലാ പഞ്ചായത്തംഗം ഷെറോണ റോയ് തുടങ്ങിയവരും പരിഗണനയിലുണ്ടായിരുന്നു. അതേസമയം, അന്‍വറിനെതിരെ കരുത്തുറ്റ സ്ഥാനാര്‍തിയെ ഇറക്കണമെന്ന പ്രവര്‍ത്തകരുടെ ആവശ്യം കൂടി കണക്കിലെത്താണ് സ്വരാജിനെ ഗോദയിലിറക്കാനുള്ള തീരുമാനം എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. 

The LDF has announced M. Swaraj as its candidate for the Nilambur constituency. The decision was finalized in the CPM state secretariat meeting, considering inputs from the Malappuram district and Nilambur constituency committees.