കൊച്ചി: സാങ്കേതിക സർവ്വകലാശാലയിൽ നിന്ന് വിരമിച്ച വൈസ് ചാൻസലർ ഡോ. സിസ തോമസിനുള്ള പെൻഷൻ അടക്കമുള്ള ആനുകൂല്യങ്ങൾ രണ്ടാഴ്ചക്കുള്ളിൽ നൽകാൻ ഹൈക്കോടതി ഉത്തരവ്. ജസ്റ്റിസുമാരായ മുഹമ്മദ് മുഷ്താഖ്, ജോൺസൺ ജോൺ എന്നിവർ ഉൾപ്പെട്ട ബെഞ്ചാണ് ഉത്തരവിട്ടത്. കേരള ഹൈക്കോടതിയാണ് വിഷയത്തിൽ സർക്കാർ അടിയന്തിരമായി നടപടി എടുക്കണമെന്ന് നിർദേശിച്ചത്. രണ്ട് വർഷത്തോളമായി തടഞ്ഞ പെൻഷൻ തുകയുടെ പലിശയിൽ അഡ്മിനിസ്‌ട്രേറ്റീവ് ട്രൈബ്യൂണലിന് തീരുമാനമെടുക്കാമെന്നും കോടതി ഉത്തരവിൽ വ്യക്തമാക്കി. 

അച്ചടക്കത്തിൻറെ പേരിൽ ആനുകൂല്യങ്ങൾ നിഷേധിക്കരുതെന്നും ഹൈക്കോടതി പറഞ്ഞു. കേരള സാങ്കേതിക സർവകലാശാല വൈസ് ചാൻസലർ സ്ഥാനത്തു നിന്ന് രണ്ടുവർഷം മുൻപാണ് ഡോ.സിസ തോമസ് വിരമിച്ചത്. എന്നാൽ കഴിഞ്ഞ രണ്ട് വർഷമായി പെൻഷനോ ഗ്രാറ്റുവിറ്റിയോ മറ്റു വിരമിക്കൽ ആനുകൂല്യങ്ങളോ നൽകാതെ സർക്കാർ തടഞ്ഞു വെക്കുകയായിരുന്നു. സർക്കാർ നടപടിയെ ഹൈക്കോടതി നേരത്തെ കേസ് പരിഗണിച്ചപ്പോൾ രൂക്ഷമായി വിമർശിച്ചിരുന്നു. ഇതിനു പിന്നാലെയാണ് ആനുകൂല്യങ്ങൾ നൽകാനുള്ള വിധി. 

ആനുകൂല്യങ്ങൾ നൽകാത്തതിന്റെ കാരണം എന്താണെന്ന് അറിയിക്കാൻ ഹൈക്കോടതി സർക്കാരിനു നിർദേശം നൽകിയിരുന്നു. ജീവനക്കാരുടെ ബാധ്യതകൾ ഉൾപ്പടെയുള്ളവയിൽ അവർ വിരമിക്കും മുൻപ് സർക്കാർ തീരുമാനമെടുക്കണമെന്നായിരുന്നു കഴിഞ്ഞതവണ കേസ് പരിഗണിച്ചപ്പോൾ ഹൈക്കോടതി പറഞ്ഞ്. 

എന്നാൽ, സിസ തോമസിനെതിരെ അച്ചടക്ക നടപടി സ്വീകരിച്ചിട്ടുണ്ടെന്നും വിരമിക്കുന്നതിനു മുന്നേയുള്ള ബാധ്യതകളും വിരമിക്കുമ്പോഴുള്ള ബാധ്യതകൾക്ക് ഉൾപ്പെടെയുള്ള കാര്യങ്ങളുമാണ് തടസ്സമായി നിൽക്കുന്നതെന്നാണ് സർക്കാർ ഹൈക്കോടതിയിൽ വിശദീകരണം നൽകിയിരുന്നു. എന്നാൽ പ്രശ്‌നങ്ങൾ വിരമിക്കുന്നതിന് മുമ്പ് തീർക്കേണ്ടതല്ലേ എന്നായി കോടതിയുടെ മറുചോദ്യം. ഇത്രയും കാലം സർക്കാരിനെ സേവിച്ചവരോട് ഇങ്ങനെയാണോ ചെയ്യുന്നതെന്നും കോടതി ചോദിച്ചിരുന്നു.