കോഴിക്കോട് : യാതൊരു പ്രകോപനവുമില്ലാതെ മംഗളൂരുവിലെ എസ് കെ എസ് എസ് എഫ് പ്രവർത്തകനും പള്ളി സെക്രട്ടറിയുമായ അബ്ദുറഹീമിനെ വെട്ടിക്കൊലപ്പെടുത്തിയ സംഘ്പരിവാർ ശക്തികളുടെ ഹീനമായ നടപടിക്കെതിരെ മുഴുവൻ ജനാധിപത്യ മതേതര വിശ്വാസികളും പ്രതിഷേധിക്കണമെന്ന് എസ് കെ എസ് എസ് എഫ് സംസ്ഥാന കമ്മിറ്റി ആഹ്വാനം ചെയ്തു.

ബജ്‌റംഗ്ദൾ ഉൾപ്പെടെയുള്ള തീവ്ര ഹിന്ദുത്വ സംഘങ്ങൾ രാജ്യത്തെ തെരുവുകളിൽ നടത്തുന്ന ഗുണ്ടാ വിളയാട്ടം പരിഷ്കൃത സമൂഹത്തിന്
ഭീഷണിയാണ്. ഇത് നിയന്ത്രിക്കാൻ ഭരണകൂടങ്ങൾക്കും നിയമപാലകർക്കും ബാധ്യതയുണ്ട്. കൊലപാതകങ്ങൾ ആവർത്തിക്കാതിരിക്കാൻ റഹീമിന്റെ ഘാതകരെ പിടികൂടി മാതൃകാപരമായി ശിക്ഷിക്കണം. കൊല്ലപ്പെട്ടത് കൂലി വേല ചെയ്തു കുടുംബം പോറ്റുന്ന സാധാരണക്കാരനായ യുവാവാണ്. കുടുംബത്തിന് അർഹമായ നഷ്ടപരിഹാരം നൽകണം. മതവിദ്വേഷവും ശത്രുതയും മാത്രം കുത്തിവെക്കുന്ന വർഗീയശക്തികൾക്ക് നാട് എന്നും സംഘർഷ ഭരിതമായിരിക്കണമെന്ന താല്പര്യത്തിന്റെ ഭാഗമാണ് അകാരണമായി നടത്തുന്ന ഇത്തരം പ്രകോപനപരമായ കൊലപാതകങ്ങളെന്നും ഇതിനെ പ്രതിരോധിക്കാൻ നീതിപീഠവും ഭരണകൂടവും ഉചിതമായ നടപടികൾ സ്വീകരിക്കണമെന്നും യോഗം ആവശ്യപ്പെട്ടു.

 പാണക്കാട് സയ്യിദ് ഹാശിറലി ശിഹാബ് തങ്ങൾ അധ്യക്ഷത വഹിച്ചു. സത്താർ പന്തല്ലൂർ ഉദ്ഘാടനം ചെയ്തു. ഒ പി അശ്റഫ് കുറ്റിക്കടവ്, റശീദ് ഫൈസി വെള്ളായിക്കോട്, സയ്യിദ് മുബശ്ശിർ തങ്ങൾ ജമലുല്ലൈലി, പാണക്കാട് സയ്യിദ് അബ്ദുറശീദലി ശിഹാബ് തങ്ങൾ. ബശീർ അസ്അദി നമ്പ്രം, ശമീർ ഫൈസി ഒടമല, ജലീൽ മാസ്റ്റർ പട്ടർക്കുളം, അനീസ് ഫൈസി മാവണ്ടിയൂർ, ഫാറൂഖ് ഫൈസി മണിമൂളി, ശാഫി മാസ്റ്റർ ആട്ടീരി, ഡോ. അബ്ദുൽ ഖയ്യൂം , അലി അക്ബർ കറുത്തപറമ്പ്, ഫാറൂഖ് ദാരിമി കൊല്ലമ്പാടി, നസീർ മൂരിയാട്, നൂറുദ്ധീൻ ഫൈസി മുണ്ടുപാറ തുടങ്ങിയവർ സംബന്ധിച്ചു.