തിരുവനന്തപുരം: നാളെ സ്‌കൂളുകൾ തുറക്കാനിരിക്കെ 104 സ്‌കൂളുകൾ ലഹരിപ്പിടിയിലെന്ന് കണ്ടെത്തി എക്‌സൈസ്. ഹൈസ്‌കൂൾ, ഹയർ സെക്കൻഡറി വിഭാഗങ്ങളിലെ സർക്കാർ, എയ്ഡഡ്, സ്വകാര്യ സ്‌കൂളുകളാണ് പട്ടികയിൽ ഉൾപ്പെട്ടിരിക്കുന്നത്. ഇത് ഹോട്ട് സ്‌പോട്ടുകളാക്കി പൊലിസുമായി ചേർന്ന് നിരീക്ഷണം ശക്തമാക്കാൻ എക്‌സൈസ് തീരുമാനിച്ചു. സ്‌കൂളുകളിലെ അധികൃതർക്കും അധ്യാപകർക്കും പി.ടി.എ ഭാരവാഹികൾക്കും നാളെ വിവരങ്ങൾ കൈമാറും. 

കൂടുതൽ സ്‌കൂളുകളുള്ളത് തിരുവനന്തപുരത്താണ്. 43 സ്‌കൂളുകളാണ് ലഹരിപ്പിടിയിലുള്ളത്. എറണാകുളം, കോഴിക്കോട് ജില്ലകളും പട്ടികയിൽ രണ്ടും മൂന്നും സ്ഥാനത്തുണ്ട്. ഈ സ്‌കൂളുകളിൽ നിരീക്ഷണം ശക്തമാക്കാനാണ് എക്‌സൈസിന്റെ തീരുമാനം. ലഹരി ഉപയോഗിക്കുന്നുവെന്ന് സംശയിക്കുന്ന കുട്ടികൾ, വിൽക്കുന്നുവെന്ന് സംശയിക്കുന്ന സമീപത്തുള്ള കടകൾ, ലഹരിസംഘത്തിന്റെ സാന്നിധ്യം എന്നിവ അടിസ്ഥാനമാക്കിയാണ് ഹോട്ട് സ്‌പോട്ടുകൾ തയാറാക്കിയത്. പട്ടികയിൽ നിന്ന് ലഹരിപ്പിടിയിലായ വിദ്യാർഥികളെ കണ്ടെത്തി രഹസ്യമായി മോചിപ്പിക്കാനുള്ള നടപടി സ്വീകരിക്കാൻ എക്‌സൈസ്പൊതു വിദ്യാഭ്യാസ വകുപ്പിന് നിർദേശം നൽകിയിട്ടുണ്ട്. തയാറാക്കിയ പട്ടിക പൊലിസിനും വിദ്യാഭ്യാസ വകുപ്പിനും കൈമാറിയിട്ടുണ്ട്. 

പരിശോധന കർശനമാക്കാനാണ് തീരുമാനം. ലഹരി വിൽപന നടത്തുന്നുവെന്ന് സംശയിക്കുന്ന കടകളുടെ പട്ടികയും കൈമാറിയിട്ടുണ്ട്. ഇവരുടെ ലൈസൻസ് റദ്ദാക്കാനും ഉടമകൾക്കെതിരെ കേസെടുക്കാനും എക്‌സൈസ് തദ്ദേശ സ്ഥാപനങ്ങളുടെ സഹായം തേടിയിട്ടുണ്ട്. അതേ സമയം, ഭൂരിഭാഗം കടകളും ലൈസൻസില്ലാതെ പ്രവർത്തിക്കുന്നതിനാൽ നിയമത്തിലെ മറ്റ് വ്യവസ്ഥകൾ ഉപയോഗിച്ച് കടകൾക്കെതിരേ നടപടിയെടുക്കാനാണ് എക്‌സൈസ് തീരുമാനം. 

എക്‌സൈസ് ഉദ്യോഗസ്ഥർ അത്തരം സ്‌കൂളുകളുടെ പ്രിൻസിപ്പൽമാരുമായോ ഹെഡ്മാസ്റ്റർമാരുമായോ ബന്ധപ്പെടുകയും അവരുടെ സഹകരണം തേടുകയും ചെയ്തിട്ടുണ്ട്. വിദ്യാർഥികൾക്കുള്ള പ്രവേശന കവാടം പുറത്തേക്കുള്ള വഴി സ്‌കൂൾ കാംപസുകളിലെ വിദ്യാർഥികൾ ഒത്തുകൂടുന്ന ഒഴിഞ്ഞ മുറികൾ, സ്ഥലങ്ങൾ എന്നിവയുടെ വിശദാംശങ്ങൾ നൽകണമെന്ന് സ്‌കൂൾ അധികൃതരോട് ആവശ്യപ്പെട്ടിട്ടുണ്ട്. പട്ടികയിലുള്ള സ്‌കൂളുകൾ നിരീക്ഷണത്തിലായിരിക്കുമെന്ന് എക്‌സൈസ് കമ്മിഷണർ അറിയിച്ചു. 

The Kerala Excise Department has identified 104 schools across the state as drug hotspots, with Thiruvananthapuram district accounting for 43 of them. In response, authorities have initiated a comprehensive crackdown involving surveillance, raids, and rehabilitation programs. Measures include deploying excise officers to monitor schools, revoking licenses of nearby shops involved in drug peddling, and conducting saliva tests to detect drug use among students. Schools are collaborating with officials to monitor student activities, and those found using drugs will receive counseling and treatment under the 'Vimukthi' de-addiction program .