നിലമ്പൂര്‍: പി.വി അന്‍വര്‍- രാഹുല്‍ മാങ്കൂട്ടത്തില്‍ കൂടിക്കാഴ്ചയില്‍ പരിഹാസവുമായി എല്‍.ഡി.എഫ് സ്ഥാനാര്‍ഥി എം.സ്വരാജ്. അന്‍വറിനെ കാണാന്‍ രാത്രിയില്‍ പോകുന്നത് യു.ഡി.എഫിന്റെ ഗതികേടാണെന്ന് അദ്ദേഹം പരിഹസിച്ചു. യു.ഡി.എഫ് പറഞ്ഞിട്ടായിരുന്നു നിലമ്പൂരിലെ എം.എല്‍.എ സ്ഥാനം അന്‍വര്‍ രാജിവെച്ചത്. ആര്‍ക്കും മത്സരിക്കാന്‍ സ്വാതന്ത്ര്യമുണ്ട് അന്‍വറും മത്സരിക്കട്ടെ. അന്‍വര്‍ മത്സരിക്കുന്നത് എല്‍.ഡി.എഫിനെ ബാധിക്കുന്ന പ്രശ്‌നമല്ലെന്നും എം.സ്വരാജ് കൂട്ടിച്ചേര്‍ത്തു. ഇനിയെത്ര പേര്‍ ക്യു നില്‍ക്കുമെന്ന് മാധ്യമങ്ങള്‍ പുറത്ത് കൊണ്ടു വന്നേക്കാമെന്നും അദ്ദേഹം പരഹസിച്ചു. 

 കവളപ്പാറയില്‍ പോയില്ല എന്നത് അസത്യമാണെന്നും കവളപ്പാറ ദുരന്തം ഉണ്ടായപ്പോള്‍ മുന്‍ എം.എല്‍.എക്ക് ഒപ്പമാണ് അവിടെ പോയതെന്നും  ചൂണ്ടിക്കാട്ടിയ അദ്ദേഹം അതെല്ലാം മറക്കുകയാണെന്നും എല്ലാം മറക്കുന്ന ഒരു സാഹചര്യത്തിലാണ് അദ്ദേഹം ഇപ്പോഴുള്ളതെന്നും സ്വരാജ് പറഞ്ഞു

ALSO READ: 'അന്‍വറിനെ കണ്ടത് പാര്‍ട്ടി നിര്‍ദ്ദേശപ്രകാരമല്ല, വൈകാരികമായ തീരമാനമെടുക്കരുതെന്ന് ആവശ്യപ്പെട്ടു' കൂടിക്കാഴ്ചയില്‍ വിശദീകരണവുമായി രാഹുല്‍ മാങ്കൂട്ടത്തില്‍

കഴിഞ്ഞദിവസം പി.വി അന്‍വറിനെ അനുനയിപ്പിക്കാന്‍ രാഹുല്‍ മാങ്കൂട്ടത്തില്‍ പി.വി അന്‍വറുമായി കൂടിക്കാഴ്ച നടത്തിയിരുന്നു. ശനിയാഴ്ച രാത്രി 11.30 ഓടെ അന്‍വറിന്റെ ഒതായിയിലെ വീട്ടില്‍ എത്തിയാണ് രാഹുല്‍ കൂടിക്കാഴ്ച നടത്തിയത്.ഒരുമണിക്കൂറിലധികം ഇരുവരും ചര്‍ച്ച നടത്തി. സംഭവം വിവാദമായതിന് പിന്നാലെ വിശദീകരണവുമായ രാഹുല്‍ രംഗത്തെത്തി. പി.വി അന്‍വറിനെ രാത്രി വീട്ടിലെത്തി കണ്ടത് പാര്‍ട്ടി നിര്‍ദേശപ്രകാരമല്ലെന്നും  അദ്ദേഹത്തിന്റെ ട്രാക്ക് തെറ്റാണ് എന്നൊരു തോന്നലുണ്ടായെന്നും ഇക്കാര്യം അദ്ദേഹത്തെ ബോധ്യപ്പെടുത്താനുമായിരുന്നു കൂടിക്കാഴ്ചയെന്നും രാഹുല്‍ വിശദീകരിച്ചു. 

പിണറായിസത്തിനെതിരെ നിലപാട് എടുക്കുന്നയാള്‍ വൈകാരികമായി പ്രതികരിക്കരുതെന്ന് അന്‍വറിനോട് ആവശ്യപ്പെട്ടെന്നും നിലമ്പൂരില്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടിയായി രാഹുല്‍ വ്യക്തമാക്കി.