മലപ്പുറം: പി.വി അന്‍വറിനെ രാത്രി വീട്ടിലെത്തി കണ്ടത് പാര്‍ട്ടി നിര്‍ദേശപ്രകാരമല്ലെന്ന വിശദീകരണവുമായി രാഹുല്‍ മാങ്കൂട്ടത്തില്‍ എംഎല്‍എ. അദ്ദേഹത്തിന്റെ ട്രാക്ക് തെറ്റാണ് എന്നൊരു തോന്നലുണ്ടായെന്നും ഇക്കാര്യം അദ്ദേഹത്തെ ബോധ്യപ്പെടുത്താനുമായിരുന്നു കൂടിക്കാഴ്ചയെന്നും രാഹുല്‍ വിശദീകരിച്ചു. 

പിണറായിസത്തിനെതിരെ നിലപാട് എടുക്കുന്നയാള്‍ വൈകാരികമായി പ്രതികരിക്കരുതെന്ന് അന്‍വറിനോട് ആവശ്യപ്പെട്ടെന്നും നിലമ്പൂരില്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടിയായി രാഹുല്‍ വ്യക്തമാക്കി.

'' രണ്ട് പേര്‍ സംസാരിച്ചൊരു കാര്യത്തെക്കുറിച്ച് പുറത്തുപറയുന്നത് ശരിയല്ലാത്തത് കൊണ്ടാണ് കൂടിക്കാഴ്ചയുടെ വിശദാംശങ്ങളിലേക്ക് പോകാത്തത്. അദ്ദേഹത്തിന്റെ ട്രാക്ക് തെറ്റാണ് എന്നൊരു തോന്നല്‍ എനിക്കുണ്ടായി. പിണറായിസത്തിനെതിരെ സംസാരിക്കുന്നൊരാളെന്ന നിലയില്‍ എടുക്കേണ്ടുന്ന നിലപാടല്ല അദ്ദേഹം ഇപ്പോള്‍ എടുക്കുന്നത്. അതുകൊണ്ട് അദ്ദേഹത്തെ കണ്ടു''- രാഹുല്‍ പറഞ്ഞു. 

അന്‍വന്‍ എന്നയാളോട് ഏതെങ്കിലും കാലത്ത് രാഷ്ട്രീയമോ, വ്യക്തിപരമോ ആയ താല്‍പര്യം തോന്നിയിട്ടില്ലെന്നും രാഹുല്‍ കൂട്ടിച്ചേര്‍ത്തു. 'രാഹുല്‍ ഗാന്ധിക്കെതിരെയും വി.ഡി. സതീശനെതിരെയും കെ.സി. വേണുഗോപാലിനെതിരെയും അന്‍വര്‍ സംസാരിക്കുമ്പോള്‍ അതിനെതിരെ ശക്തമായി പ്രതികരിച്ചിട്ടുള്ളയാളാണ് ഞാന്‍. എന്നാല്‍, അന്‍വര്‍ പിണറായിസത്തിനെതിരെ സംസാരിക്കാന്‍ തുടങ്ങിയ നിമിഷം മുതലാണ് അന്‍വറിനോടും അദ്ദേഹം പറയുന്ന കാര്യങ്ങളോടും യോജിക്കുന്നത്. ഞങ്ങള്‍ പറയുന്നും പറഞ്ഞുകൊണ്ടിരിക്കുന്നതുമായ കാര്യമാണ് അദ്ദേഹവും പറയുന്നത് എന്നതാണ് അതിന് കാരണം.  പിണറായിസം വേട്ടയാടിയ ഒരാളാണ് ഞാന്‍. നാലു തവണയായി 40 ദിവസമാണ് പിണറായിയുടെ പൊലിസ് എന്നെ ജയിലിലിട്ടത്' -രാഹുല്‍ മാധ്യമങ്ങള്‍ക്കു മുന്നില്‍ ചൂണ്ടിക്കാട്ടി.  

അന്‍വറിനെ കാണാന്‍ പാര്‍ട്ടി ചുമതലപ്പെടുത്തിയിട്ടില്ലെന്നും അതിന് മുതിര്‍ന്ന നേതാക്കളുണ്ടെന്നും അദ്ദേഹം പറഞ്ഞു. മുന്നണിയിലെടുക്കുന്നത് സംബന്ധിച്ചോ അന്‍വറിന്റെ ഉപാധികളെക്കുറിച്ചോ ചര്‍ച്ച ചെയ്തിട്ടില്ല. പാര്‍ട്ടി നേതൃത്വത്തിന് അതിന്റേതായ തീരുമാനമുണ്ട്. അതുമായി തന്നെയാണ് മുന്നോട്ടുപോകുന്നത്. കെ.സി വേണുഗോപാല്‍ കാണുന്നത് പോലെയല്ല ഞാന്‍ കാണുന്നത്. കെ.സി പാര്‍ട്ടിയിലെ രണ്ടാമനാണ്. ഞാന്‍ കണ്ടതിന് ഒരൊറ്റ ലക്ഷ്യമേയുള്ളൂ. അത് പിണറായിസത്തിനെതിരെ സംസാരിക്കുന്നൊരാള്‍ എന്ന നിലയിലാണ്- രാഹുല്‍ മാങ്കൂട്ടത്തില്‍ കൂട്ടിച്ചേര്‍ത്തു. അന്‍വറിന്റെ കാലുപിടിക്കാനല്ല പോയതെന്നും രാഹുല്‍ വ്യക്തമാക്കി.

ALSO READ: നിലമ്പൂര്‍ അങ്കത്തിന് അന്‍വറും; മത്സരിക്കാന്‍ തൃണമൂലിന്റെ അനുമതി, പാര്‍ട്ടി ചിഹ്നവും അനുവദിച്ചു

ശനിയാഴ്ച രാത്രി 11.30 ഓടെയാണ് അന്‍വറിന്റെ ഒതായിയിലെ വീട്ടില്‍ എത്തി, രാഹുല്‍ കൂടിക്കാഴ്ച നടത്തിയത്. ഒരുമണിക്കൂറിലധികം ഇരുവരുടെയും കൂടിക്കാഴ്ച നീണ്ടു. അന്‍വറുമായി ഇനി ചര്‍ച്ചയില്ലെന്ന് പാര്‍ട്ടി വ്യക്തമാക്കിയിരിക്കെയായിരുന്നു രാഹുല്‍ മാങ്കൂട്ടത്തിലിന്റെ കൂടിക്കാഴ്ച.  അന്‍വര്‍ തൃണമൂല്‍ കോണ്‍ഗ്രസ് സ്ഥാനാര്‍ഥിയാകുമെന്ന് കൂടിക്കാഴ്ചക്ക് മുന്‍പ് തന്നെ വ്യക്തമാവുകയും ചെയ്തിരുന്നു. 

Rahul Mankootathil MLA clarifies his visit to P.V. Anvar’s residence was personal and not instructed by the party.