കണ്ണൂർ: കണ്ണൂർ സർവകലാശാലയിലും, കോളജുകളിലും നടക്കുന്ന വിവിധ പരിപാടികൾ പരിശോധിക്കുന്നതിനായി നിയമിച്ച നിരീക്ഷണ സമിതി പിൻവലിച്ചു. സർവകലാശാല പരിപാടികളിൽ ദേശവിരുദ്ധമായി ഒന്നുമില്ലെന്ന് ഉറപ്പുവരുത്താൻ പ്ര​ത്യേക നിരീക്ഷണ സമിതിയുണ്ടാക്കി വെെസ് ചാൻസിലർ പുറത്തിറക്കിയ ഉത്തരവാണ് പിൻവലിച്ചത്. വിദ്യാർഥികളിൽ നിന്നടക്കം ശക്തമായ പ്രതിഷേധം ഉയർന്നതിന് പിന്നാലെയാണ് ഉത്തരവ് പിൻവലിച്ചത്. 

വിസിയുടെ നടപടി ആർഎസ്എസിനെ പ്രീതിപ്പെടുത്താനാണെന്ന് നേരത്തെ വിമർശനം ഉയർന്നിരുന്നു. എസ്.എഫ്.ഐ അടക്കമുള്ള വിദ്യാർഥി സംഘടനകളിൽ നിന്നും ശക്തമായ പ്രതിഷേധമാണ് ഉയർന്നത്. ഇതിനിടെ സർവകലാശാല ഭരണകാര്യാലയത്തിൽ സിൻഡിക്കേറ്റ് യോഗം നടക്കുന്ന സമയത്ത് എസ്.എഫ്.ഐ പ്രവർത്തകർ പ്രതിഷേധവുമായെത്തി. ശാഖയല്ല, സർവകലാശാലയാണ് എന്ന ബാനറുമായി എത്തിയ പ്രവർത്തകർ ഭരണ കാര്യാലയത്തിലേക്ക് തള്ളിക്കയറാൻ ശ്രമിച്ചത് സംഘർഷാവസ്ഥയുണ്ടാക്കി. വിവാദ ഉത്തരവിനെതിരെ സിൻഡിക്കേറ്റിലെ ഭൂരിപക്ഷം അംഗങ്ങളും എതിർത്തു.

ALSO READ: തേങ്ങ മുതൽ ശരീരത്തിന് ഹാനികരമായ കാത്സ്യം കാർബെെഡ് വരെ; കൊച്ചിയിൽ മുങ്ങിയ കപ്പലിലെ കണ്ടയ്നറുകളിലെ ചരക്ക് വിവരങ്ങൾ പുറത്ത് 

ഇതോടെ, ഉത്തരവ് പിൻവലിക്കുന്നതായി ​വൈസ് ചാൻസലർ യോഗത്തെ അറിയിക്കുകയായിരുന്നു. സർവകലാശാലയിലെ പരിപാടികളുടെ ഉള്ളടക്കം നിരീക്ഷിക്കാനായി വൈസ് ചാൻസലർ ഡോ. കെ.കെ. സാജുവിന്റെ നിർദേശപ്രകാരമായിരുന്നു രജിസ്ട്രാർ ഏഴംഗ സമിതി രൂപവത്കരിച്ചു ഉത്തരവിറക്കിയത്. സർവകലാശാലയിലെ പരിപാടികൾക്ക് മൂക്കുകയറിടുന്നതാണ് ഉത്തരവെന്നാണ് ആരോപണം. കേന്ദ്ര സർക്കാരിനെതിരെ രൂക്ഷമായി വിമർശിക്കുന്ന ചിലർ സർവകലാശാലയിലെ ചില പരിപാടികളിൽ അടുത്തിടെ പ​​ങ്കെടുത്തിരുന്നു. ഇതിനെതിരെ ആർഎസ്എസ് അടക്കമുള്ള സം​ഘപരിവാർ സംഘടനകൾ പ്രതിഷേധവുമായി രം​ഗത്തെത്തിയിരുന്നു. പിന്നാലെയാണ് നിരീക്ഷണ സമിതിയെ നിയമിക്കാൻ വിസി ഉത്തരവിട്ടത്. 

Student Protest: No Monitoring Committee at Kannur University; Controversial order by the Vice-Chancellor withdrawn