ബെംഗളൂരു: ചിന്നസ്വാമി സ്റ്റേഡിയത്തിന് പുറത്തുണ്ടായ തിക്കിലും തിരക്കിലും 11 പേർ മരിക്കുകയും 50-ലധികം പേർക്ക് പരുക്കേൽക്കുകയും ചെയ്ത ദാരുണ സംഭവത്തിൽ റോയൽ ചലഞ്ചേഴ്‌സ് ബെംഗളൂരുവിലെ (ആർസിബി) മുതിർന്ന ഉദ്യോഗസ്ഥനടക്കം നാല് പേരെ ബെംഗളൂരു പൊലീസ് അറസ്റ്റ് ചെയ്തു. ആർസിബിയുടെ മാർക്കറ്റിംഗ് ആൻഡ് റവന്യൂ മേധാവി നിഖിൽ സോസാലെ, ഇവന്റ് മാനേജ്‌മെന്റ് സ്ഥാപനമായ ഡിഎൻഎ എന്റർടൈൻമെന്റുമായി ബന്ധപ്പെട്ട സുനിൽ മാത്യു, കിരൺ കുമാർ എന്നിവരും സംഭവത്തിൽ പങ്കുള്ള മറ്റൊരാളുമാണ് അറസ്റ്റിലായത്.

വ്യാഴാഴ്ച, കർണാടക മുഖ്യമന്ത്രി സിദ്ധരാമയ്യ, ആർസിബി, ഡിഎൻഎ ഇവന്റ് മാനേജർമാർ, കർണാടക സ്റ്റേറ്റ് ക്രിക്കറ്റ് അസോസിയേഷൻ (കെഎസ്സിഎ) എന്നിവരുടെ പ്രതിനിധികളെ ഉടൻ അറസ്റ്റ് ചെയ്യാൻ ഡിജിപിക്കും ഐജിപിക്കും നിർദ്ദേശം നൽകിയിരുന്നു. പ്രാഥമിക അന്വേഷണത്തിൽ ഇവരുടെ ഭാഗത്ത് "നിരുത്തരവാദിത്തവും അശ്രദ്ധയും" കണ്ടെത്തിയതിനെ തുടർന്ന്, ഭാരതീയ ന്യായ സംഹിത (ബിഎൻഎസ്) പ്രകാരം കൊലപാതകമല്ലാത്ത കുറ്റകരമായ നരഹത്യ, പരിക്കേൽപ്പിക്കൽ, ജീവൻ അപകടപ്പെടുത്തൽ തുടങ്ങിയ വകുപ്പുകൾ ചുമത്തി കബ്ബൺ പാർക്ക് പൊലീസ് എഫ്ഐആർ രജിസ്റ്റർ ചെയ്തു. പരുക്കേറ്റ റോലോംഗ്യൂംസ് എന്നയാളുടെ പരാതിയിൽ രണ്ടാമത്തെ എഫ്ഐആർ കൂടി രജിസ്റ്റർ ചെയ്തിട്ടുണ്ട്.

ബുധനാഴ്ചയാണ് ഐപിഎൽ കിരീട വിജയത്തിന്റെ ആഘോഷ പരേഡിനിടെ ആയിരക്കണക്കിന് ആരാധകർ സ്റ്റേഡിയത്തിന് പുറത്ത് തടിച്ചുകൂടി ദുരന്തത്തിന് കാരണമായത്. സംഭവത്തിൽ കർണാടക സർക്കാർ കർശന നടപടികൾ എടുത്തിട്ടുണ്ട്. ബെംഗളൂരു പൊലീസ് കമ്മീഷണർ ബി ദയാനന്ദ ഉൾപ്പെടെയുള്ള ഉന്നത ഉദ്യോഗസ്ഥരെ സസ്‌പെൻഡ് ചെയ്തു. ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെന്റിന്റെ (സിഐഡി) പ്രത്യേക അന്വേഷണ സംഘം (എസ്ഐടി) സംഭവത്തെക്കുറിച്ച് അന്വേഷണം നടത്തും. കർണാടക ഹൈക്കോടതി വ്യാഴാഴ്ച കേസ് അടിയന്തരമായി പരിഗണിക്കുകയും സംസ്ഥാന സർക്കാരിനോട് തൽസ്ഥിതി റിപ്പോർട്ട് ആവശ്യപ്പെട്ട് നോട്ടീസ് അയക്കുകയും ചെയ്തു.