നീണ്ട 18 വർഷത്തെ കിരീട വരൾച്ച അവസാനിപ്പിച്ചുകൊണ്ട് റോയൽ ചലഞ്ചേഴ്സ് ബെംഗളൂരു ഐപിഎല്ലിന്റെ ചാമ്പ്യന്മാരായി മാറിയിരിക്കുകയാണ്. ഫൈനൽ പോരാട്ടത്തിൽ പഞ്ചാബ് കിങ്സിനെ ആറ് റൺസിന് വീഴ്ത്തിയാണ് ആർസിബി ചരിത്രത്തിലെ ആദ്യ കിരീടം സ്വന്തമാക്കിയത്. ഇതോടെ വിരാട് കോഹ്‌ലിയുടെ ആദ്യ ഐപിഎൽ കിരീടമെന്ന സ്വപ്നവും സാക്ഷാത്കാരമായിരിക്കുകയാണ്.   

ഇപ്പോൾ കോഹ്‌ലിയുടെ ഈ കിരീട നേട്ടത്തെക്കുറിച്ച് സംസാരിക്കുകയാണ് മുൻ ഇന്ത്യൻ ഓപ്പണർ വിരേന്ദർ സെവാഗ്. കൊഹ്‍ലിയെക്കാൾ കൂടുതൽ ഒരു കിരീടത്തിനായി സച്ചിൻ ടെണ്ടുൽക്കർ കാത്തിരുന്നുവെന്നാണ് സെവാഗ് പറഞ്ഞത്. ക്രിക് ബസ്സിന്‌ നൽകിയ അഭിമുഖത്തിലാണ് സെവാഗ് ഇക്കാര്യം പറഞ്ഞത്. 

''കിരീടം നേടാനുള്ള കോഹ്‌ലിയുടെ കാത്തിരിപ്പ് വെറും 18 വർഷമാണ്. 1989 മുതൽ 2011 വരെ സച്ചിൻ ഒരു ട്രോഫിക്കായി കാത്തിരുന്നു. അതിനാൽ കോഹ്‌ലിയുടെ കാത്തിരിപ്പ് വളരെ കുറവാണ്. സച്ചിൻ ഒരിക്കൽ പോലും  പ്രതീക്ഷ കൈവിട്ടില്ല. അദ്ദേഹം തീരുമാനം എടുത്തിരുന്നു. ഒരു ലോകകപ്പ് കിരീടം നേടിയിട്ട് മാത്രമേ ക്രിക്കറ്റിൽ നിന്നും വിരമിക്കുകയുള്ളുവെന്ന്'' വിരേന്ദർ സെവാഗ് പറഞ്ഞു. 

ഈ സീസണിൽ ബെംഗളൂരുവിന് വേണ്ടി മിന്നും പ്രകടനമാണ് വിരാട് നടത്തിയത്. 15 ഇന്നിംഗ്സുകളിൽ നിന്നും 657 റൺസ് ആണ് താരം നേടിയിട്ടുള്ളത്. ഈ സീസണിൽ എട്ട് അർദ്ധ സെഞ്ച്വറികളും കോഹ്‌ലി സ്വന്തമാക്കിയിട്ടുണ്ട്. 

ഫൈനൽ പോരാട്ടത്തിൽ ഗുജറാത്തിലെ അഹമ്മദാബാദ് നരേന്ദ്രമോദി സ്റ്റേഡിയത്തിൽ നടന്ന മത്സരത്തിൽ നഷ്ടപ്പെട്ട് ആദ്യം ബാറ്റ് ചെയ്ത ബംഗളൂരു 20 ഓവറിൽ 9 വിക്കറ്റ് നഷ്ടത്തിൽ 190 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ പഞ്ചാബിനെ 20 ഓവറിൽ 7 വിക്കറ്റ് നഷ്ടത്തിൽ 184 റൺസിൽ എത്താനെ സാധിച്ചുള്ളൂ. 

Former Indian opener Virender Sehwag talks about Virat Kohlis IPL title win