ദുബൈ: സ്കൂബ ഡൈവിങ്ങിനിടെ ഓക്സിജൻ ലഭിക്കാതെ ഹൃദയാഘാതമായുണ്ടായി മരിച്ച തൃശൂർ വടക്കാഞ്ചേരി വേലൂർ ഒലെക്കേങ്കിൽ വീട്ടിൽ ഐസക് പോളിന്റെ (29) മൃതദേഹം നടപടിക്രമങ്ങൾ പൂർത്തിയാക്കി നാട്ടിലേക്ക് കൊണ്ടുപോകും. വെള്ളിയാഴ്ച രാവിലെ ബലിപെരുന്നാൾ ആഘോഷത്തിനിടെ ജുമൈറ ബീച്ചില്‍ സ്കൂബ ഡൈവിങിനിടെ ഐസക് പോളിന് ഹൃദയാഘാതമുണ്ടാവുകയായിരുന്നു. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഐസക്കിനൊപ്പമുണ്ടായിരുന്ന ഭാര്യ രേഷ്മ പരുക്കേൽക്കാതെ രക്ഷപ്പെട്ടു. എന്നാൽ, സഹോദരൻ ഐവിന് പരുക്കേറ്റു. ആശുപത്രിയിൽ ചികിത്സയിലുള്ള ഐവിൻ അപകടനില തരണം ചെയ്തിട്ടുണ്ട്.

അഞ്ചു വർഷമായി യു.എ.ഇയിലുള്ള ഐസക് ദുബൈയിലെ അലെക് എഞ്ചിനീയറിങ് കമ്പനിയിൽ എഞ്ചിനീയറായി ജോലി ചെയ്തു വരികയായിരുന്നു. ഭാര്യ രേഷ്മയും എഞ്ചിനീയറാണ്. വേലൂർ ഒലെക്കേങ്കിൽ വീട്ടിൽ പോൾ-ഷീജ ദമ്പതികളുടെ മകനാണ്. പൊലിസ് മോർച്ചറിയിലുള്ള മൃതദേഹം പെരുന്നാൾ അവധിക്ക് ശേഷം നാട്ടിലേക്ക് കൊണ്ടുപോകാൻ നടപടിക്രമങ്ങൾ പൂർത്തിയായി വരുന്നു. ഐസക്കിന്റെ വിയോഗം പരിചിത വൃത്തങ്ങളിൽ വേദന പടർത്തി.