ഇന്റർനാഷണൽ ക്രിക്കറ്റിൽ നിന്നും വിരമിക്കൽ പ്രഖ്യാപിച്ച് വെസ്റ്റ് ഇൻഡീസ് സൂപ്പർ താരം നിക്കോളാസ് പൂരൻ. തന്റെ സോഷ്യൽ മീഡിയ അക്കൗണ്ടിലൂടെയാണ് വെസ്റ്റ് ഇൻഡീസ് താരം വിരമിക്കൽ പ്രഖ്യാപിച്ചത്. തന്റെ കരിയറിൽ മിന്നും ഫോമിൽ നിൽക്കെയാണ് പൂരന്റെ ഈ വിരമിക്കൽ പ്രഖ്യാപനം. തന്റെ 29ാം വയസ്സിൽ തന്നെ പൂരൻ വിരമിക്കൽ പ്രഖ്യാപനം നടത്തിയത് ക്രിക്കറ്റ്‌ ലോകത്തിൽ വലിയ ഞെട്ടലാണ് ഉണ്ടാക്കിയിരിക്കുന്നത്.

2016ൽ അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ച പൂരൻ വിൻഡീസ് ക്രിക്കറ്റിന് ഒരു പിടി മികച്ച സംഭാവനകൾ നൽകിയ താരങ്ങളിൽ ഒരാളാണ്. കഴിഞ്ഞ വർഷത്തെ ടി-20 ലോകകപ്പിലാണ് താരം അവസാനമായി വെസ്റ്റ് ഇൻഡീസിന് വേണ്ടി കളിച്ചത്. 2021, 2022, 2023 എന്നീ വർഷങ്ങളിൽ വിൻഡീസ് ടി-20 ടീമിനെ നയിക്കാനും പൂരന് സാധിച്ചിട്ടുണ്ട്.

ALSO READ: വിക്കറ്റ് നഷ്ടമായതിന് പിന്നാലെ വനിതാ അംപയറുമായി തര്‍ക്കം; ആർ. അശ്വിന്‍ വീണ്ടും വിവാദത്തിൽ

വെസ്റ്റ് ഇൻഡീസിനായി 106 ടി-20 മത്സരങ്ങളിൽ നിന്നും 2275 റൺസാണ് പൂരൻ അടിച്ചെടുത്തത്. 13 അർദ്ധ സെഞ്ച്വറികളും താരം സ്വന്തമാക്കിയിട്ടുണ്ട്. ഏകദിനത്തിൽ 61 മത്സരങ്ങളിൽ വിൻഡീസ് ജേഴ്സി അണിഞ്ഞ താരം 1983 റൺസാണ് സ്വന്തമാക്കിയിട്ടുള്ളത്. വൈറ്റ് ബോൾ ക്രിക്കറ്റിൽ മൂന്ന് സെഞ്ച്വറികളും 11 അർദ്ധ സെഞ്ച്വറികളും താരം നേടിയിട്ടുണ്ട്. അന്താരാഷ്ട്ര ക്രിക്കറ്റിൽ നിന്നും വിരമിക്കൽ പ്രഖ്യാപിച്ചെങ്കിലും ഫ്രാഞ്ചൈസി ടീമുകൾക്ക് വേണ്ടി പൂരൻ കളിക്കുന്നത് തുടരും. 

ഇന്ത്യൻ പ്രീമിയർ ലീഗിൽ നിലവിൽ ലഖ്നൗ സൂപ്പർ ജയന്റ്സിന്റെ താരമാണ് പൂരൻ. 21 കോടി രൂപയ്ക്കായിരുന്നു മെഗാ ലേലത്തിൽ ലഖ്നൗ പൂരനെ നിലനിർത്തിയിരുന്നത്. ഐപിഎല്ലിൽ  ലഖ്നൗവിന് പുറമേ പഞ്ചാബ് കിങ്‌സ്, സൺറൈസേഴ്സ് ഹൈദരാബാദ്, മുംബൈ ഇന്ത്യൻസ് എന്നീ ടീമുകൾക്ക് വേണ്ടിയും താരം കളിച്ചിട്ടുണ്ട്. 

West Indies superstar Nicholas Pooran announces retirement from international cricket