സാവോ പോളോ: ലാറ്റിനമേരിക്കൻ ഫുട്ബോൾ കരുത്തുമായി 2026 ലോകകപ്പിന് യോഗ്യത നേടി ബ്രസീൽ. പരാഗ്വയെ എതിരില്ലാത്ത ഒരു ഗോളിന് വീഴ്ത്തിയാണ് ബ്രസീൽ ടീമിന്റെ ലോകകപ്പ് പ്രവേശനം. ബ്രസീൽ സൂപ്പർ താരം വിനീഷ്യസ് ജൂനിയറാണ് ബ്രസീലിനായി വലകുലുക്കിയത്. വീഴ്ചകളിൽ നിന്ന് ബ്രസീലിന് കരുത്ത് പകരാൻ എത്തിയ പുതിയ പരിശീലകൻ കാർലോ ആഞ്ചലോട്ടിക്ക് കീഴിൽ ബ്രസീൽ നേടുന്ന ആദ്യ ജയമാണിത്.

ഏറെ നാളുകൾക്ക് ശേഷം, കൊറിന്ത്യൻസ് അരീന മൈതാനത്ത് ബ്രസീൽ ടീമിന്റെ അഴിഞ്ഞാട്ടമാണ് കണ്ടത്. ഗോളുകൾ എണ്ണം കൊണ്ട് കുറഞ്ഞെങ്കിലും പ്രതാപ കാലത്തെ ബ്രസീൽ ടീമിനെ ഓർമ്മിപ്പിക്കുന്ന തരത്തിലുള്ള കളിയാണ് ബ്രസീലിന്റെ പുത്തൻ തലമുറ പുറത്തെടുത്തത്. മത്സരത്തിൽ 73 ശതമാനവും പന്ത് ബ്രസീലിന്റെ കൈവശമായിരുന്നു. പരാഗ്വ പലപ്പോഴും ബോളിന് വേണ്ടി മിനുട്ടുകളോളം ബ്രസീലിന്റെ പിന്നാലെ ഓടുന്ന കാഴ്ചയ്ക്കും കൊറിന്ത്യൻസ് അരീന വേദിയായി. 

ALSO READ: ഞാൻ അദ്ദേഹത്തെ വളരെയധികം ബഹുമാനിക്കുന്നു: തുറന്ന് പറഞ്ഞ്‌ റൊണാൾഡോ

44ാം മിനിറ്റിലാണ് കളിയിലെ വിജയ ഗോൾ പിറന്നത്. മതേവൂസിന്റെ അസിസ്റ്റിൽ വിനീഷ്യസ് ജൂനിയറാണ് ഗോൾ നേടിയത്. പെനാൽട്ടി ബോക്‌സിൽ റഫീന്യയ്ക്ക് നഷ്ടമായ ബോൾ പിടിച്ചെടുത്ത് വലതുവിങ്ങിലൂടെ കുതിച്ച് കയറിയ മതേവൂസ് കുന്യ, വിനീഷ്യസിന് നീട്ടിനൽകി. മുന്നിൽ തുറന്നുകിടന്ന വലയിലേക്ക് ആ ബോളിനെ ഒന്ന് വഴി തിരിച്ച് വിടേണ്ട പണി കൃത്യമായി വിനീഷ്യസ് ജൂനിയർ നിർവഹിച്ചതോടെ കളിയിലെ കാനറിപ്പടയുടെ ഏക ഗോൾ പിറന്നു. 

ഗോളവസരങ്ങൾ പലതും തുറന്നു കിട്ടിയെങ്കിലും അവയൊന്നും ലക്ഷ്യത്തിലെത്തിക്കാൻ ബ്രസീലിന് കഴിഞ്ഞില്ല. കാനറികൾ 11 ഷോട്ടുകൾ പോസ്റ്റിന് നേരെ കളിയിലുടനീളം ഉതിർത്തു. അതിൽ നാലെണ്ണം ഗോളാകാൻ സാധ്യതയേറിയ ഓൺ ടാർജറ്റ് ഷോട്ടുകളായിരുന്നു.