ന്യൂഡൽഹി: പഹൽഗാം ഭീകരാക്രമണം, ഓപ്പറേഷൻ സിന്ദൂർ ചർച്ചയിൽ പ്രിയങ്ക ഗാന്ധിയ്ക്ക് പിന്നാലെ ഭരണപക്ഷത്തെ കടന്നാക്രമിച്ച് പ്രതിപക്ഷ നേതാവ് രാഹുൽ ഗാന്ധി. പ്രധാനമന്ത്രി നരേന്ദ്ര മോദിയെ വെല്ലുവിളിച്ചാണ് രാഹുൽ ഗാന്ധി ലോക്സഭയിൽ പ്രസംഗിച്ചത്. യു.എസ് പ്രസിഡന്റ് ഡൊണാൾഡ് ട്രംപ് നുണയനാണെന്ന് പറയാൻ പ്രധാനമന്ത്രിക്ക് ധൈര്യമുണ്ടോയെന്ന് രാഹുൽ ഗാന്ധി ചോദിച്ചു.

ഓപ്പറേഷൻ സിന്ദൂർ വെടിനിർത്തൽ പ്രഖ്യാപിച്ചത് ട്രംപ് ആയിരുന്നു. ഇക്കാര്യം 29 തവണയാണ് അമേരിക്കൻ പ്രസിഡന്റ് പറഞ്ഞത്. എന്നാൽ ഇന്ത്യ ഇത് നിഷേധിക്കുകയോ സമ്മതിക്കുകയോ ചെയ്തിട്ടില്ല. അതിനാൽ സത്യം എന്താണെന്ന് പ്രധാനമന്ത്രി പറയണമെന്നും രാഹുൽ ഗാന്ധി ആവശ്യപ്പെട്ടു  ധൈര്യമുണ്ടെങ്കിൽ ട്രംപ് പറയുന്നത് നുണയാണെന്ന് മോദി പറയണം. ഇന്ദിരാഗാന്ധിയുടെ ധൈര്യമുണ്ടെങ്കിൽ അദ്ദേഹം അത് പറയട്ടെ. മോദി സംസാരിക്കുമ്പോൾ അദ്ദേഹമത് വ്യക്തമാക്കണമെന്നും രാഹുൽ ​ഗാന്ധി പാർലമെന്റിൽ ആഞ്ഞടിച്ചു.

ഇന്ത്യ പാകിസ്ഥാനിൽ നടത്തിയ ആക്രമത്തിൽ ഒരു വിമാനം പോലും നഷ്ടമായില്ലെന്ന് മോദി പറയട്ടെ എന്നും രാഹുൽ ഗാന്ധി വെല്ലുവിളിച്ചു. തീവ്രവാദത്തെ പ്രോത്സാഹിപ്പിക്കുന്ന അസം മുനീറിന് ട്രംപ് വിരുന്ന് നൽകി. നമ്മുടെ പ്രധാനമന്ത്രി എന്തെങ്കിലും പറഞ്ഞോ. വളരെ അപകടകരമായ രീതിയിലാണ് നമ്മൾ കടന്നു പോകുന്നത് എന്നും രാഹുൽ ഗാന്ധി പറഞ്ഞു. 

ALSO READ: 'രാജ്യത്തെ പൗരന്‍മാരുടെ സുരക്ഷയുടെ ഉത്തരവാദിത്തം പ്രധാനമന്ത്രിക്ക് ഇല്ലേ' പ്രിയങ്ക; ഓപറേഷന്‍ സിന്ദൂര്‍ ചര്‍ച്ചയില്‍ മോദി സര്‍ക്കാറിനെ കുടഞ്ഞ് ഇന്നും പ്രതിപക്ഷം

ഇന്ദിരാ ഗാന്ധിയെ പോലെ ധൈര്യമുള്ള പ്രധാനമന്ത്രിയെയാണ് ഇന്ത്യക്ക് ആവശ്യം. രാജ്യത്തെ ഒരിക്കലും യുദ്ധക്കളമാക്കി മാറ്റരുത്. പ്രധാനമന്ത്രിയുടെ ഇമേജിനേക്കാൾ വലുതാണ് നമ്മുടെ രാഷ്ട്രമെന്ന് മോദി മനസിലാക്കണമെന്നും രാഹുൽ ഗാന്ധി പറഞ്ഞു.

അതേസമയം, രാജ്യത്തെ പൗരൻമാരുടെ സുരക്ഷയുടെ ഉത്തരവാദിത്തം പ്രധാനമന്തിക്കില്ലേ എന്ന് പ്രിയങ്കാ ഗാന്ധി പാർലമെന്റിൽ ചോദിച്ചു. പർവതങ്ങളിലും സംരക്ഷിക്കുന്ന എല്ലാ സൈനികരെയും ഞാൻ അഭിവാദ്യം ചെയ്യാൻ ആഗ്രഹിക്കുന്നു. രാജ്യത്തിനുവേണ്ടി എപ്പോഴും ജീവൻ ത്യജിക്കാൻ തയ്യാറുള്ളവർ- അവർ പറഞ്ഞു. 

'ഇന്നലെ പ്രതിരോധ മന്ത്രി ഒരു മണിക്കൂർ നീണ്ട പ്രസംഗത്തിൽ പല കാര്യങ്ങളെക്കുറിച്ചും സംസാരിച്ചു, പക്ഷേ ഒരു കാര്യം വിട്ടുപോയി. 2025 ഏപ്രിൽ 22 ന് 26 പൗരന്മാർ പരസ്യമായി കൊല്ലപ്പെട്ടപ്പോൾ, ഈ ആക്രമണം എങ്ങനെ, എന്തുകൊണ്ട് സംഭവിച്ചു?

പഹൽഗാം ആക്രമണത്തിൽ വീരമൃത്യു വരിച്ച ശുഭം ദ്വിവേദിയുടെ ഭാര്യ പറഞ്ഞു-'എന്റെ ലോകം എന്റെ കൺമുന്നിൽ അവസാനിക്കുന്നത് ഞാൻ കണ്ടു, അവിടെ ഒരു സുരക്ഷാ ജീവനക്കാരൻ പോലും ഉണ്ടായിരുന്നില്ല. സർക്കാർ ഞങ്ങളെ അവിടെ അനാഥരാക്കി എന്ന് എനിക്ക് പറയാൻ കഴിയും.'

രാജ്യത്തെ പൗരന്മാരുടെ സുരക്ഷയ്ക്ക് ആരാണ് ഉത്തരവാദിയെന്ന് ഞാൻ ചോദിക്കട്ടെ?  ഈ രാജ്യത്തിന്റെ പ്രധാനമന്ത്രിയല്ലേ? ഈ രാജ്യത്തിന്റെ ആഭ്യന്തര മന്ത്രിയല്ലേ? ? ഈ രാജ്യത്തിന്റെ പ്രതിരോധ മന്ത്രിയല്ലേ? ? ഈ രാജ്യത്തിന്റെ ദേശീയ സുരക്ഷാ ഏജൻസിയല്ലേ?- പ്രിയങ്ക ഗാന്ധി തുറന്നടിച്ചു.