കൽപ്പറ്റ: പ്രധാനമന്ത്രി നേരിട്ട് സന്ദർശിച്ച് ബോധ്യപ്പെട്ടിട്ടും മുണ്ടക്കൈ ചൂരൽമല ഉരുൾദുരന്തബാധിതരോടുള്ള കേന്ദ്ര സർക്കാർ അവഗണന തുടരുന്നു. അതിതീവ്ര ദുരന്തമായി അംഗീകരിച്ചിട്ടും പ്രത്യേക സഹായം അനുവദിക്കാത്തതിന് പുറമേ, 2005ലെ ദേശീയ ദുരന്ത നിവാരണ നിയമം പൊളിച്ചെഴുതിയാണ് ഏറ്റവും ഒടുവിൽ ദുരന്തബാധിതരുടെ കരണത്തടിച്ചത്. 

ഗുരുതരമായ ദുരന്തങ്ങൾ ഉണ്ടാകുമ്പോൾ, വായ്പകളുടെ തിരിച്ചടവിൽ ആശ്വാസം നൽകാനോ ദുരന്തബാധിതർക്ക് പുതിയ വായ്പകൾ അനുവദിക്കാനോ ദേശീയ ദുരന്ത നിവാരണ അതോറിറ്റിക്ക് അധികാരം നൽകുന്ന 13ാം വകുപ്പാണ് നിയമത്തിൽ നിന്ന് ഒഴിവാക്കിയത്. വകുപ്പ് പ്രകാരമുള്ള അധികാരം ഉപയോഗിച്ച് ഉരുൾപൊട്ടൽ ദുരന്തബാധിതരുടെ വായ്പകൾ എഴുതിതള്ളണമെന്ന് സംസ്ഥാന സർക്കാർ ആവശ്യപ്പെട്ടിരുന്നു. ഇക്കാര്യത്തിൽ നിലപാട് അറിയിക്കാൻ ഹൈക്കോടതിയും കഴിഞ്ഞ ഏപ്രിലിൽ കേന്ദ്രത്തോട് നിർദേശിച്ചിരുന്നു. എന്നാൽ, നിയമത്തിലെ ഈ വകുപ്പ് ഒഴിവാക്കിയെന്നാണ് കഴിഞ്ഞദിവസം ദേശീയ ദുരന്ത നിവാരണ അതോറിറ്റി അണ്ടർ സെക്രട്ടറി ചന്ദൻ സിങ് ഹൈക്കോടതിയിൽ സത്യവാങ്മൂലം നൽകിയത്. 

ഇക്കഴിഞ്ഞ മാർച്ച് 29നാണ് നിയമത്തിൽ ഭേദഗതി വരുത്തി കേന്ദ്ര നിയമ മന്ത്രാലയം ഗസ്റ്റ് വിജ്ഞാപനം ഇറക്കിയത്. പത്തിലധികം ബാങ്കുകളിലായി 35 കോടി രൂപയമാണ് ദുരന്തബാധിതരുടെ വായ്പ. കേന്ദ്രം പൂർണമായും കൈയൊഴിഞ്ഞതോടെ വീടും ഉപജീവന മാർഗങ്ങളും പൂർണമായും നഷ്ടപ്പെട്ടവർ വായ്പ എങ്ങനെ തിരിച്ചടയ്ക്കുമെന്ന ആശങ്കയിലാണ്. 

നിലവിൽ ദുരന്തബാധിത പ്രദേശത്തെ പിൻകോഡിലുള്ളവർക്ക് ധനകാര്യ സ്ഥാപനങ്ങൾ വായ്പകൾ അനുവദിക്കുന്നില്ല. ദുരന്തത്തിന് ശേഷം പ്രധാനമന്ത്രി ദുരന്തഭൂമി സന്ദർശിച്ചതോടെ കേരളം കൂടുതൽ സഹായം പ്രതീക്ഷിച്ചിരുന്നു. 

എന്നാൽ 529.50 കോടിയുടെ മൂലധന നിക്ഷേപ സഹായ വായ്പ മാത്രമാണ് ഇതുവരെ അനുവദിച്ചത്. ദേശീയ ദുരന്ത പ്രതികരണ നിധിയിൽ നിന്ന് അടിയന്തര സഹായം അനുവദിക്കണമെന്ന ആവശ്യവും ഇതുവരെ പരിഗണിക്കപ്പെട്ടിട്ടില്ല.