അഹമ്മദാബാദ്: "ഗതാഗതക്കുരുക്ക് എന്നെ രക്ഷിച്ചു," ബിസിനസ് അഡ്മിനിസ്ട്രേഷൻ വിദ്യാർത്ഥിനിയായ ഭൂമി ചൗഹാൻ (28) ബിബിസി ഗുജറാത്തി സർവീസിനോട് പറഞ്ഞ വാക്കുകളാണിത്. അഹമ്മദാബാദ് വിമാനത്താവളത്തിലേക്കുള്ള യാത്രയിൽ ഗതാഗതക്കുരുക്കിൽപ്പെട്ടതിനാൽ, ലണ്ടൻ ഗാറ്റ്വിക്കിലേക്കുള്ള എയർ ഇന്ത്യ വിമാനം (AI171) വെറും 10 മിനിറ്റിന്റെ വ്യത്യാസത്തിൽ നഷ്ടമായ ഭൂമി ചൗഹാന് ഇത് പുനർ ജന്മം എന്ന് തന്നെ പറയുന്നതിൽ അത്ഭുതമൊന്നുമില്ല. വിമാനം പറന്നുയർന്ന് മിനിറ്റുകൾക്കുള്ളിലാണ് തകർന്നുവീഴുന്നതും, 241 യാത്രക്കാരും 24 പ്രദേശവാസികളും ഉൾപ്പെടെ 265 പേരാണ് മരിക്കുന്നതും

ബ്രിസ്റ്റലിൽ ഭർത്താവിനൊപ്പം താമസിക്കുന്ന ഭൂമി, അവധിക്കാലം ആഘോഷിക്കാൻ പശ്ചിമ ഇന്ത്യയിലെത്തിയതായിരുന്നു. വ്യാഴാഴ്ച ഉച്ചയ്ക്ക് 12:20ന് പുറപ്പെടേണ്ട വിമാനത്തിൽ 36G സീറ്റിൽ യാത്ര ചെയ്യാനാണ് അവർ ഓൺലൈൻ ചെക്ക്-ഇൻ പൂർത്തിയാക്കിയത്. എന്നാൽ, അങ്കലേശ്വറിൽ നിന്ന് 201 കിലോമീറ്റർ ദൂരം യാത്ര ചെയ്തെത്തിയ ശേഷം, അഹമ്മദാബാദിലെ ഗതാഗതക്കുരുക്കിൽപ്പെട്ട് വിമാനത്താവളത്തിൽ ഒരു മണിക്കൂർ മുമ്പെത്തിയെങ്കിലും, എയർലൈൻ ജീവനക്കാർ ബോർഡിംഗ് അനുവദിച്ചില്ല.

"ഞാൻ 10 മിനിറ്റ് മാത്രമേ വൈകിയുള്ളൂ. അവസാന യാത്രക്കാരിയാണെന്നും എന്നെ കയറ്റണമെന്നും ഞാൻ അഭ്യർത്ഥിച്ചു, പക്ഷേ അവർ സമ്മതിച്ചില്ല," ഭൂമി പറഞ്ഞു. വിമാനം നഷ്ടമായതിൽ ദേഷ്യവും നിരാശയും തോന്നിയ അവർ, ഡ്രൈവറോട് ദേഷ്യപ്പെട്ട ശേഷം വിമാനത്താവളം വിട്ടു. "ചായ കുടിക്കാൻ ഒരു കടയിൽ നിന്നപ്പോൾ, വിമാനം തകർന്നുവീണ വിവരം അറിഞ്ഞു. എനിക്ക് അത്ഭുതമായി തോന്നി," ഭൂമി ചൗഹാൻ പറഞ്ഞു.

പറന്നുയർന്ന് 30 സെക്കൻഡിനുള്ളിൽ വിമാനം ജനവാസ മേഖലയിൽ ഇടിച്ചിറങ്ങി.  ബ്രിട്ടീഷ് പൗരനായ വിശ്വഷ്കുമാർ രമേശ് പരുക്കുകളോടെ രക്ഷപ്പെട്ട് ആശുപത്രിയിൽ ചികിത്സയിലാണ്.

"നേരത്തെ യാത്ര തുടങ്ങിയിരുന്നെങ്കിൽ ഞാൻ ആ വിമാനത്തിൽ കയറുമായിരുന്നു," എന്ന് നിരാശയോടെ ചിന്തിച്ച ഭൂമിക്ക്,  ഗതാഗതക്കുരുക്ക് ജീവൻ രക്ഷിച്ചത് അത്ഭുതമായി മാറി.